ZUŴA linyake mu mwezi wa Meyi, ku caru ca Altay Republic, kukaca makora. Ici ncharu cakutowa ico cili kumwera ca kumanjiliro gha dazi kwa Siberia. Tikati talaŵiska pa windo, tikawona nkhorongo yakubiliŵira kweniso tikamba kuwona mapiri agho ghakaŵa na ciwuvi cakukhoma. Ici ncharu ca mapirimapiri ca Ŵaaltai ico cili kutali comene. Ŵaaltai ni mtundu wa ŵanthu ŵa ku Asia uwo uli na ciyowoyero cawo na cawo. Kanandi ŵanthu aŵa ŵakutemwa kusangika pa nyumba zawo ku Mapiri gha Altai, zina ilo likung’anamura “golide.”

Pakajumpha vilimika vicoko waka kufuma apo ine na muwoli wane tikasambilira Ciyowoyero ca Mawoko ca ku Russia, ndipo tikamba kwendera mipingo ya ciyowoyero ca mawoko na tumagulu twa Ŵakaboni ŵa Yehova awo mbakumangwa. Mu caru ici muli ŵanthu ŵa mitundu pafupifupi 170, ŵamitheto yakupambanapambana, kweni wose ŵakuyowoya ciyowoyero cimoza, ca ku Russia. Ŵakumangwa awo Mbakaboni ŵakugwiliskira nchito ciyowoyero ca mawoko ca ku Russia. Ŵanthu ŵakumangwa mbakukolerana ndipo ŵanandi awo tikukumana nawo ŵakuŵa ŵakunweka kutiphalirako mdauko wawo ndiposo kutipokelera mu nyumba zawo. Ndimo viliri ku Altay.

Apo tikaŵa mu msumba wa Gorno-Altaysk, tikapulika za kagulu kacoko waka ka ŵakumangwa awo ŵakakhalanga pa ka muzi kanyake ako kakaŵa pa mtunda wa makilomita 250. Tikamanyanga kuti kuli Ŵakaboni ŵa Yehova ŵacoko waka, kweni pakaŵavya uyo wakamanyanga ciyowoyero ca mawoko. Tikati taghanaghanirapo za ŵanthu aŵa, tikaluta kuti tikaŵawovwire. Tikakondwa comene kuwona kuti Yury na Tatyana awo nawo mba ciyowoyero ca mawoko ŵakazomera kuluta nase. Tikapakira mu galimoto vyakupharazgira vya ciyowoyero ca mawoko vya pa DVD pamoza na cakwimbira cake. Tikayegha fulasiki yikuru, na vyakurya nga ni buledi, soseji, na vyakurya vinyake vyakunowa vya ku Russia ivyo ŵakasazgangako kabici na katofeni. Pakuti uko tikalutanga kukaŵa matenda ghanyake agho ghakwamba cifukwa ca mphanthi tikapementhera munkhwala mu mathupi yithu. Tikapemetheraso malaya na skapato.

Nthowa iyo tikendanga yikajumphanga mu mapiri ghakutowa. Mu malo agha mukaputanga tumphepo twa sungu liwemi lakufuma ku tumaluŵa tunyake twakucemeka jasmine. Tikasangwa comene. Tikakondwa kuwona gulu la nyiska za ku Siberia zikurya utheka mwakufwasa. Ŵaaltai ŵakukhala mu nyumba za makuni izo zikuzengeka mu magulumagulu ndipo zikuŵa za malata. Pafupi na nyumba zinandi pakaŵanga tunyumba twa mathabwa twakucemeka ayyl, uto kanandi tukaŵanga twa makona 6 ndipo tukaŵanga na mtenje wakuwoneka nga ni ambulera. Tunyumba tunyake tukakozgananga na mahema ghakupangika na vikwa vya  makuni. Mbumba zinandi zikukhala mu tunyumba utu kwamba mu Meyi mpaka Seputembala ndipo zikunjira mu nyumba zikuru para vula yamba panji para kwamba kuzizima.

Ŵakaboni ŵa ku malo agha ŵakatipokelera makora ndipo ŵakatilongozgera ku mbumba yinyake ya Cialtai iyo njakumangwa. Mbumba iyi yikakondwa ndipo yikanweka kumanya uko tafuma na ivyo tikacitanga. Tikabowozga kuti mbumba iyi yikaŵa na kompyuta, ntheura tati taŵalongora DVD, ŵakakosera kuti ŵayiwonelere. Mwaluŵiro kukati waka zii, nga nipara palije ŵanthu. Maso ghawo ghakaŵa dodoli pa kompyuta ndipo ŵakayezgeleranga vinthu vinyake ivyo ŵakawonanga na kukunchira mutu. Mwakusuzgikira, tikaŵapempha kuti tiyiwezgere kumasinda DVD mwakuti tiwone kukwambilira uko kukaŵa cithuzithuzi cakutowa ca paradiso pa caru capasi. Tikati tayiyimiska pa malo ghanyake, tikamba kudumbiskana ivyo Ciuta wazamucitira ŵanthu awo ŵazamukhala kwamuyirayira pa caru capasi. Tikasangwa comene cifukwa mbumba iyi yikaŵa yakunweka ndipo paumaliro yikatiphaliraso za mbumba yinyake yakumangwa iyo yikakhalanga mu muzi unyake wapafupi.

Tikanyamuka na kujumpha mu kanthowa kawemi ako kakendanga mu malibwe kunjilira mu mapiri na kubamukira mu kamsewu kakugombeleka mpaka pa kamuzi kacoko comene. Uku tikasanga mbumba yinyake yakumangwa. Pakaŵa mfumu na muwoli, amamavyara ŵa mwanalume, na mwana msepuka wa mbumba iyi. Ndipo wose ŵakaŵa ŵakukondwa comene cifukwa ŵakaghanaghanangako yayi vyakuti ŵanthu ŵangaŵayendera. Tikanjira pa ka mulyango kacoko ka nyumba yawo ya ayyl, umo mukapulikikwanga kasungu kawemi ka mathabwa na mkaka. Pa mtenje wa kanyumba aka pakaŵa kacidolozi ako kakawovwiranga kuti ungweru unjirenge. Ndipo mukati mukaŵa uvuno wakuphikirapo na sitovu. Mbumba iyi yikatipa cakurya ca Ŵaaltai, nga nthumadonasi na tiyi mu tumabakule twa ku Asia. Tikaŵafumba usange ŵali kughanaghanapo vyakuti ŵangaŵa paubwezi na Ciuta. Ŵati ŵaghanaghanirapo pa fumbo ili, anyina ŵa mwanakazi ŵakatiphalira kuti apo ŵakaŵa ŵana, ŵakatoranga cakurya na kuluta naco ku mapiri kukapeleka sembe ku ŵaciuta. Pamasinda wakamwemwetera na kuyowoya kuti: “Kweni nkhalimanyanga yayi ng’anamuro lake. Ukaŵa mutheto withu.”

Tikaŵalongora DVD yakukhwaskana na nkhani iyi ndipo ŵakabanuka kumaso. Ŵakaŵa ŵakukhumbisiska kuti tilutilire kudumbiskana, kweni kasi tikatenge tidumbiskanenge mu nthowa wuli? Nangauli cikuŵa cipusu kupulikana makora na ŵakumangwa mwa kulemberana uthenga, kweni ku malo agha kukaŵavya netiweki ya mafoni. Ntheura, tikaŵalayizga kuti tilutilirenge kudumbiskana kwizira mu makalata.

Apo tikalayilanga pa nyumba iyi dazi likaŵa pafupi kunjira, ndipo likatinjilira mu msewu ukuru apo tikaweleranga ku Gorno-Altaysk. Tikavuka comene kweni tikaŵa ŵakukhorwa. Nyengo yikati yajumphapo, tikafumba Ŵakaboni ŵanyake za mbumba iyi. Ndipo ŵakatiphalira kuti masabata ghanyake, mfumu wakuluta ku tawuni yikuru kukasambira Baibolo na kukawungana na mpingo mwakovwirika na mudumbu munyake, uyo wakamanyanga ciyowoyero ca mawoko. Ndise ŵakukondwa comene kuwona kuti mwamphu withu ukupambika vipambi.

Kupenja ŵanthu ŵakumangwa tingakuyaniska na kupenja usambazi wakubisika mu mapiri. Tikatumbikika comene tati tasanga ngale yakuzgeŵa iyo tikawona nga tayisanga mwamwaŵi, pamanyuma pakuti tenda maora ghanandi. Nyengo zose mapiri gha Altay kwa ise ghaŵenge nga ni golide, ghatikumbuskenge ŵanthu ŵawemi mtima awo tikakumana nawo ku mapiri agha.