‘Muŵe na Citemwa Pakati Pinu’

“Nkhumupani dango liphya, lakuti mutemwanenge yumoza na munyake; umo ine namutemwerani, kuti namweso mutemwanenge yumoza na munyake. Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.”—YOHANE 13:34, 35.

Kasi Mazgu Agha Ghakung’anamuraci?: Khristu wakaphalira ŵalondezgi ŵake kuti ŵatemwanenge yumoza na munyake nga umo iyo wakaŵatemweranga. Kasi Yesu wakalongora wuli kuti wakaŵatemwanga? Yesu wakatemwanga ŵanthu wose kwambura kutimbanizgika na nkharo ya ŵanthu ŵa mu nyengo yake awo ŵakatinkhanga mitundu yinyake kweniso kuyuyura ŵanakazi. (Yohane 4:7-10) Citemwa ndico cikatuma Yesu kuti wamalire nyengo, kweniso nkhongono zake pakovwira ŵanji. Ndipo wakajinora na nyengo ya kupumulira wuwo. (Mariko 6:30-34) Paumaliro, Khristu wakalongora citemwa cake cikuru comene. Iyo wakati: “Ndine muliska muwemi; muliska muwemi wakupeleka umoyo wake cifukwa ca mberere.”—Yohane 10:11.

Umo Ŵakhristu Ŵakwambilira Ŵakacitira: Ŵakhristu ŵakwambilira ŵakacemananga kuti ‘mubali’ panji “mudumbu.” (Filemone 1, 2) Ŵanthu ŵa mitundu yose ŵakapokelerekanga mu mpingo Wacikhristu cifukwa ŵakamanyanga kuti “palije mphambano pakati pa Muyuda na Mugiriki, cifukwa kuli Fumu yimoza pera pa wose.” (Ŵaroma 10:11, 12) Pamasinda pa Pentekoste wa 33 C.E., ŵasambiri mu Yerusalemu “ŵakaguliskanga ivyo ŵakaŵa navyo na katundu, ndipo ivyo ŵakasanganga ŵakagaŵira wose, mwakuyana na kusoŵerwa kwa munthu.” Na cilato wuli? Mwakuti awo ŵakaŵa kuti ŵabapatizika waka ŵakhalire mu Yerusalemu na kulutilira “kujipeleka ku kusambizga kwa ŵapositole.” (Milimo 2:41-45) Nchivici cikaŵakhuŵirizga kucita nthena? Vilimika pafupifupi 200 kufuma apo ŵapositole ŵakafwira, Tertulliani wakalemba ivyo ŵanji ŵakayowoya umo Ŵakhristu “ŵakatemwerananga yumoza na munyake . . . ndiposo umo ŵakaŵira ŵakunozgeka kufwirana yumoza na munyake.”

Mbanjani Mazuŵa Ghano Ŵakucita nga Ndiwo? Buku linyake likuti kwa vilimika vinandi awo ŵakatenge Mbakhristu “ŵakacitirananga nkhaza comene, kuluska izo ŵanthu ŵambura kusopa ŵakaŵacitiranga.” (The Decline and Fall of the Roman Empire 1837) Kusanda uko kwacitika sonosono ku U.S. kwalongora kuti ŵanthu ŵa visopa awo ŵakujicema kuti Mbakhristu ndiwo ŵakusankhana mtundu comene. Kanandi Ŵakhristu ŵa mu caru cinyake, ŵakupwelerako yayi za Ŵakhristu ŵanyawo awo ŵali mu cisopa cenecico mu vyaru vinyake, ntheura ŵakutondeka kuŵawovwira para ŵali mu suzgo.

Mu 2004 mphepo iyo ŵakuyicema hurricane yikati yatimba msumba wa Florida kanayi pa myezi yiŵiri, ceyamani wa mu Komiti ya Kulaŵilira uko Kwacitika Vyamabuci ku Florida wakendera kuti wawone usange wovwiri uwo ŵakapeleka ukagwiriskika nchito makora. Wakasanga kuti pakaŵavya gulu ilo likendeskanga vinthu makora nga Mbakaboni ŵa Yehova. Ndipo wakaphalira Ŵakaboni kuti ngwakunozgeka kuŵapa wovwiri wuliwose uwo ŵangakhumba. Mu cilimika ca 1997 pambere ivi vindacitike, gulu lakupeleka wovwiri la Ŵakaboni ŵa Yehova, likaluta ku caru ca Democratic Republic of Congo, kukapeleka wovwiri wa munkhwala, cakurya na vyakuvwara ku Ŵakhristu ŵanyawo kweniso ŵanji. Ŵakaboni ŵa ku Europe ŵakapeleka katundu wakukwana madola 1 miliyoni gha U.S.