KASI munthu wali kumuphaliranipo kuti mudemelere ku cinthu cinyake?— * Ŵapapi na ŵasambizgi ŵangaphalira ŵana kuti ŵaŵikenge mtima pa masambiro. Fundo iyi yikung’anamura kuti ŵakwenera kughawona kuŵa ghakuzirwa. Tikukhumba kuyowoya za munthu uyo Baibolo likuti “wakademelera kwa Yehova,” Ciuta waunenesko. Zina la munthu uyu ni Hezekiya. Tiyeni tiwone ivyo tingasambirako kwa iyo.

Apo Hezekiya wakaŵa mwanici vinthu vikaŵa makora yayi. Awiske ŵa Ahazi Themba la Ŵayuda ŵakaleka kuteŵetera Yehova. Ŵakamba kudangilira pakusopa ŵaciuta ngoza. Awiske ŵakalangura kuti mukuru wa Hezekiya wakomeke na kumupeleka sembe kwa ciuta uyo iwo ŵakasopanga.

Nangauli Ahazi wakacitanga viheni, kweni Hezekiya wakaleka yayi kupulikira Ciuta. Kasi ukughanaghana kuti cikaŵa cipusu kwa Hezekiya kucita nthena?— Cikwenera kuti cikaŵa cipusu yayi. Kweni Hezekiya wakawelera nyuma yayi. Tiye tiwone ico cikamovwira kuti wademelere kwa Yehova, ndiposo umo nase tingacitira nga ndiyo.

Hezekiya wakasambiranga za ŵanji awo ŵakademelera kwa Yehova. Davide wakaŵa yumoza wawo. Nangauli pakajumpha vilimika vinandi kufuma apo Davide wakafwira, kweni Hezekiya wakamanya vinandi vya iyo kwizira mu Malemba. Davide wakalemba kuti: “Ŵadada na ŵamama nanga ŵandiside, kweni Yehova tiwanditorenge.”

Kasi wawona ico cikamovwira Davide kuti  wapulikirenge Yehova?— Cikaŵa cipulikano. Davide wakamanyanga kuti para wakupulikira, Yehova wamovwirenge. Davide wakakayikiranga yayi. Hezekiya nayo wakademelera kwa Yehova na kumupulikira cifukwa ca kughanaghanira ivyo Davide wakacita. Nawe ungaŵa na cigomezgo cose kuti Yehova wakovwirenge para ukudemelera kwa iyo na kumupulikira.

Kweni kasi ungacita wuli usange adada na amama ŵako ŵakusopa Yehova yayi?— Ciuta wakuti ŵana ŵapulikirenge ŵapapi ŵawo. Ntheura, ukwenera kupulikira ŵapapi ŵako. Ndipouli, para ŵapapi ŵako ŵakukuphalira kuti ucite cinthu ico Ciuta wakukana, ungaŵalongosolera cifukwa ico ungacitira yayi cinthu ico. Uleke kuteta, kwiba, panji kucita cinthu cilicose ico Ciuta wakuwona kuti nchiheni, nanga kwali munthu uyo wangakutuma wangaŵa njani. Cakuzirwa nkhupulikira Ciuta.

Tili na ŵanthu awo tingasambirako. Hezekiya wakasambira kwa Davide pera yayi kweniso ku ŵasekuru ŵake a Yotamu. Nangauli Yotamu wakafwa pambere Hezekiya wandababike, kweni Hezekiya wakasambira vya iyo, nga umo ise tingasambilira mu Baibolo lithu mazuŵa ghano. Kasi ungazunurapo ŵanthu ŵanji awo ukuwona kuti tingatolerako vyakucita vyawo?—

Enya, mu Baibolo tingasambiraso za maubudi agho Hezekiya, Davide na Yotamu ŵakacita. Kweni ŵanthu aŵa ŵakatemwanga Yehova, ŵakazomera zakwananga zawo, ndipo ŵakaŵikapo mtima kucita ico nchakwenelera. Kumbuka kuti Yesu pera Mwana wa Ciuta ndiyo wakaŵa murunji. Tiye tisambire vinandi vyakukhwaskana na Yesu na kuyezga kulondezga ivyo wakacita.