Kucezga na Munthu​—Kasi Yesu Ni Ciuta?

ŴAKABONI ŴA YEHOVA ŵakutemwa kudumbiskana na ŵanthu vya mu Baibolo. Kasi muli na fumbo pa ivyo Baibolo likusambizga? Kasi pali vinthu ivyo Ŵakaboni ŵa Yehova ŵakugomezga, kweni imwe mukuvipulikiska yayi? Usange ni nthena, fumbani yumoza wa Ŵakaboni ŵa Yehova para mwakumana nayo. Wazamukondwa comene kumuzgorani.

Musi umu, muwonenge umo Ŵakaboni ŵa Yehova ŵakuzgolera mafumbo agho ŵanthu ŵakuŵafumba. Titore kuti Nyangwira, uyo njumoza wa Ŵakaboni ŵa Yehova, wiza ku nyumba ya Nyamoyo.

Kasi Mbunenesko Kuti Imwe Mulije Cipulikano mwa Yesu?

Nyamoyo: Ŵaliska ŵithu ŵakuti Ŵakaboni ŵa Yehova ŵalije cipulikano mwa Yesu. Kasi mbunenesko?

Nyangwira: Yayi. Unenesko ngwakuti tili na cipulikano mwa Yesu. Nakuti kwambura cipulikano mwa Yesu, munthu wangapona yayi.

Nyamoyo: Nane ndivyo nkhugomezga.

Nyangwira: Ndikuti pa fundo iyi takoleranako. Kweni cakwamba timanyane dankha. Ine ndine Nyangwira. Munganibwerekako linu?

Nyamoyo: Ndine Nyamoyo. Fwatukani, mphanyumba yinu.

Nyangwira: Nawonga akuru. Kweni panji mukujifumba kuti, ‘Usange Ŵakaboni ŵa Yehova ŵali na cipulikano mwa Yesu, cifukwa wuli ŵanji ŵakususka?’

Nyamoyo: Enya nadi na, nchifukwa wuli?

Nyangwira: Tili na cipulikano cikuru mwa Yesu, kweni vinthu vinyake ivyo ŵanthu ŵakuyowoya pa nkhani ya Yesu tikuvigomezga yayi.

Nyamoyo: Nga vici?

Nyangwira: Oho. Ŵanji ŵakuti Yesu wakaŵa waka munthu muwemi. Kweni fundo iyi tikukolerana nayo yayi.

Nyamoyo: Nane nkhukolerana nayo yayi.

Nyangwira: Apa napo tili lumoza. Fundo yinyake iyo Ŵakaboni ŵa Yehova ŵakugomezga yayi ni visambizgo ivyo vikupambana na vyeneivyo Yesu wakayowoya pa nkhani ya ubali wake na Ciuta.

Nyamoyo: Mukung’anamuraci a Nyangwira?

Nyangwira: Visopa vinandi vikuti Yesu ni Ciuta? Panyake namwe ndivyo mukugomezga.

Nyamoyo: Enya yayi! Ŵaliska ŵakutisambizga kuti Yesu na Ciuta, njumoza.

Nyangwira: Nthowa yiwemi yakumanyira unenesko pa nkhani ya Yesu nkhuwona ivyo iyo mweneco wakayowoya. Imwe mukuti wuli?

Nyamoyo: Enya, fundo iyo nkhukolerana nayo.

Ivyo Yesu Wakayowoya

Nyangwira: Tiyeni tiwone ivyo Baibolo likuyowoya pa nkhani iyi. Nkhumupemphani kuti tiwonere limoza ivyo vili pa Yohane 6:38. Yesu wakati: “Nili kukhira kufuma kucanya, kuzakacita  khumbo lane cara, kweni khumbo la uyo wakanituma.” Fundo iyi yingaŵa yakupulikikwa yayi usange Yesu ni Ciuta.

Nyamoyo: Mukung’anamura vici?

Nyangwira: Wonani ivyo Yesu wakayowoya. Wakati wakakhira kufuma kucanya kuzakacita khumbo lake yayi.

Nyamoyo: Wakati wakiza kuzakacita khumbo la Uyo wakamutuma.

Nyangwira: Usange Yesu ni Ciuta, ni njani uyo wakamutuma? Ndipo cifukwa wuli Yesu wakamupulikira?

Nyamoyo: Sono namba kuwamo. Kweni nkhukayika kuti vesi limoza lingaŵa ukaboni wakuti Yesu ni Ciuta yayi.

Nyangwira: Tiyeni tiwone ivyo Yesu wakayowoya pa nyengo yinyake. Wakayowoya fundo yakuyana waka mu cipaturo 7 ca Yohane. Kasi mungaŵazga Yohane 7:16?

Nyamoyo: Enya, ningaŵazga. Vesi ili likuti: “Yesu wakaŵazgora wakati: ‘Ivyo nkhusambizga ni vyane cara, kweni vya uyo wakanituma.’”

Nyangwira: Nawonga comene a Nyamoyo. Kasi vesi ili layowoya kuti Yesu wakasambizganga maghanoghano ghake?

Nyamoyo: Yayi. Iyo wakati ivyo wakasambizganga vikafuma kwa Uyo wakamutuma.

Nyangwira: Mbunenesko. Fumbo ndakuti: ‘Ni njani wakatuma Yesu? Ni njani uyo wakamuphalira ivyo wakasambizganga?’ Asi uyo wakamuphalira ivyo wakasambizganga wakwenera kuŵa mukuru kuluska Yesu? Nakuti uyo wakutuma munyake wakuŵa mukuru kuluska uyo wakutumika.

Nyamoyo: Fundo iyi njakupulikwika, kweni nkhakwamba kuŵazga vesi ili.

Nyangwira: Tiyeni tiwone mazgu gha Yesu agho ghali pa Yohane 14:28: “Mwapulika kuti nati kwa imwe, Nkhuluta ndipo nkhwizaso kwa imwe. Munitemwenge ine, mphanyi mwasekelera kuti nkhuluta ku Ŵadada, cifukwa Ŵadada mbakuru kuluska ine.” Kwakuyana na umo likuyowoyera vesi ili, kasi mukughanaghana kuti Yesu wakajiwonanga wuli pakuyaniska na Ŵawiske?

Nyamoyo: Yesu wakati Ŵawiske mbakuru kuluska iyo. Ndikuti wakajiwonanga kuti ni mucoko kwa Ciuta.

Nyangwira: Nkhanira. Tiyeni tiwone fundo yinyake iyo Yesu wakaphalira ŵasambiri ŵake. Yikusangika pa Mateyu 28:18. Vesi ili likuti: “Ndipo Yesu wakiza pafupi na kuyowoya nawo, wakati: ‘Mazaza ghose ghapika kwa ine kucanya na caru capasi.’” Kasi Yesu wakati wakaŵa na mazaza ghose kwamba papo kale?

Nyamoyo: Yayi, wakati wakacita kupika.

Nyangwira: Usange Yesu ni Ciuta, kasi wangacita kupika mazaza? Nakuti ni njani wakamupa?

Nyamoyo: Kweni nadi mwe!

Kasi Wakayowoyanga kwa Njani?

Nyangwira: Pali fundo yinyake iyo yingaŵa yakusuzga kuyipulikiska usange Yesu ni Ciuta nadi.

Nyamoyo: Fundo wuli?

Nyangwira: Ni ivyo vikacitika apo Yesu wakabapatizikanga. Wonani ivyo vikuyowoyeka pa Luka 3:21, 22. Ŵazgani mavesi agha.

Nyamoyo: “Sono apo ŵanthu wose ŵakabapatizikanga, Yesu nayo wakabapatizika ndipo apo wakalombanga, kucanya kukajulika ndipo mzimu utuŵa wakuwoneka nga ni nkhunda ukakhira pa iyo, ndipo lizgu likafuma kucanya likati: ‘Ndiwe Mwana wane wakutemweka; nkhukondwa nawe.’”

Nyangwira: Kasi mwawona ivyo Yesu wakacitanga apo wakabapatizikanga?

Nyamoyo: Wakalombanga.

Nyangwira: Mwaneneska. Usange Yesu ni Ciuta, wakalombanga kwa njani?

Nyamoyo: Ilo ni fumbo liwemi. Namufumba ku ŵaliska.

Nyangwira: Pa fundo yakuyana waka, wonani kuti Yesu wati wazuwuka mu maji, munthu munyake wakayowoya nayo kufuma kucanya. Kasi mwawona ivyo Munthu uyu wakayowoya?

 Nyamoyo: Wakati Yesu ni Mwana Wake, wakumutemwa, ndipo wakukondwa nayo.

Nyangwira: Ni mwenemumo nadi. Usange Yesu ni Ciuta, ni njani uyo wakayowoya mazgu agha kufuma kucanya? Ndipo wakayowoyanga kwa njani?

Nyamoyo: Nindaghanaghanirepo fundo iyi.

Cifukwa Wuli Munyake Ni ‘Dada,’ Munyake “Mwana”?

Nyangwira: Tiyeni tiwone fundo yinyake. Tanguŵazga kuti Yesu wakatenge Ciuta Mbadada ŵake ŵakucanya. Ndipo wati wabapatizika, uyo wakayowoya mazgu kufuma kucanya wakati Yesu ni Mwana Wake. Yesu nayo wakati ni Mwana wa Ciuta. Usange mukuniphalira kuti ŵanthu ŵaŵiri ŵa nthumbo yimoza mbakuyana waka, kasi ndikuti pali ubali wuli?

Nyamoyo: Mphaukuru na unung’una.

Nyangwira: Mwaneneska. Panyake titi ŵamuleza. Kweni Yesu wakati Ciuta Mbawiske ndipo iyo ni Mwana. Kasi mukughanaghana kuti Yesu wakang’anamurangaci?

Nyamoyo: Napulikiska. Yesu wakati munyake ni mulara ndipo wali na mazaza kuluska munyake.

Nyangwira: Ni mwenemumo nadi. Ghanaghanirani fundo iyi: Imwe mwanguti ŵanthu ŵa nthumbo yimoza awo mbakuyana, mphaukuru na unung’una, panji ŵamuleza. Yesu wakaŵa Msambizgi Waluso kuluska ise. Ntheura waŵenge Ciuta, asi mphanyi wakalongosora makora comene kuti iyo na Ciuta mbakuyana?

Nyamoyo: Kweni nadi.

Nyangwira: Kweni pakuyowoya za ubali wake na Ciuta wakati iyo ni “Mwana,” ndipo kwa Ciuta wakatenge “Ŵadada.”

Nyamoyo: Apa mwayowoya.

Kasi Ŵasambiri ŵa Yesu Ŵakati Wuli?

Nyangwira: Pambere nindalute, paliso fundo yinyake yakuti niyowoye pa nkhani iyi. Kasi munganizomerezga?

Nyamoyo: Enya, yowoyani.

Nyangwira: Yesu waŵenge Ciuta, asi mphanyi ŵasambiri ŵake ŵakayowoya?

Nyamoyo: Mphanyi ŵakayowoya nadi.

Nyangwira: Baibolo likuyowoyapo yayi kuti ŵasambiri ŵake ŵakasambizganga fundo iyi. Kweni wonani ivyo mpositole Paulosi wakalemba. Pa Ŵafilipi 2:9 tikuŵazga kuti: “Ciuta nayo wakamukwezga [Yesu] pa malo ghapacanya ndipo mwalusungu wakamupa zina ilo lili pacanya pa zina linyake lililose.” Kasi vesi ili layowoya kuti Ciuta wakacita nayo wuli Yesu?

Nyamoyo: Likuti Ciuta wakamukwezga pa malo ghapacanya.

Nyangwira: Enya. Usange Yesu wakaŵa wakuyana na Ciuta pambere wandafwe, ndipo wakati wawuka, Ciuta wakamukwezga pa malo ghapacanya, asi ndikuti Yesu ni mukuru kuluska Ciuta? Kasi walipo uyo wakuluska Ciuta?

Nyamoyo: Vingacitika yayi. Palije uyo wangaluska Ciuta.

Nyangwira: Nkhukolerana namwe. Pa fundo zose izo tawona, kasi tingayowoya kuti Baibolo likusambizga kuti Yesu ni Ciuta?

Nyamoyo: Yayi. Baibolo likuti Yesu ni Mwana wa Ciuta.

Nyangwira: Mbunenesko nadi. Kweni cakuti mumanye a Nyamoyo nchakuti Ŵakaboni ŵa Yehova ŵakumuzirwiska comene Yesu. Tikugomezga kuti nyifwa yake yikujura nthowa ya ciponosko ku ŵanthu wose ŵakugomezgeka.

Nyamoyo: Ndivyo nane nkhugomezga.

Nyangwira: Panji mungajifumba kuti, ‘Kasi tingalongora wuli kuti tikuwonga cifukwa cakuti Yesu wakatifwira?’ *

Nyamoyo: Nkhujifumba nadi fumbo ili.

Nyangwira: Wuli nkhizeso kuti tizakawone ivyo Baibolo likuyowoya pa nkhani iyi? Ningiza pawuli?

Nyamoyo: Mwize sabata yikwiza. Muzamunisanga.

Nyangwira: Mbwenu niwelere kumanyuma. Pawemi.

[Mazgu ghamusi]