Kupenja Mazgoro

“Pafupifupi waliyose wali na maghanoghano ghake na ghake pa nkhani ya Yesu. Kwali munthu wali na cipulikano mwa Yesu, kwali yayi, tose tikujifumba kuti ‘Kasi Yesu ni njani comenecomene?’”—STAN GUTHRIE.

ŴANTHU mbakunweka kumanya vya Yesu. Mabuku ghakulongosora vya Yesu ghakwenda malonda comene. Nanga ni mafilimu ghakuwoneska vya Yesu ghakuguza ŵanthu ŵanandi. Ndipouli, ŵanandi ŵacali ŵandamumanye makora Yesu. Ŵanthu ŵakumulongosolera panandi Yesu.

Kumanyuma uku, ŵamutolamakani ŵaŵiri ŵakafumba ŵanthu kuti ŵazgore fumbo lakuti “Kasi Yesu wakaŵa njani?” Ŵanji ŵakazgora ntheura:

● “Vikuwoneka kuti wakaŵa msambizgi, ndipo wakaŵa walusungu mwakuti ŵanji ŵasambireko lusungu lwake.”

● “Wakaŵa munthu bweka, kweni wakacita vikuru pa umoyo wake.”

● “Palije ukaboni wakuti kukaŵa Yesu.”

● “Yesu ni Mwana wa Ciuta uyo wakababika, kufwa, na kuwuka mwakuti watiwombore ku kwananga. Ngwamoyo, ndipo wizengeso pa caru capasi.”

● “Ine nkhugomezga kuti pa ŵana wose ŵa Ciuta, Yesu yekha ndiyo ni munthu kweniso ciuta.”

● “Munthu mulara waka wangagomezga vidokoni vya Yesu yayi.”

Pakuti mazgoro agha ghakupambana, vingacitika yayi kuti ghose ghaŵe ghaunenesko. Kasi ni nkhu uko tingasanga mazgoro ghaunenesko pa nkhani iyi? Awo ŵakulemba magazini iyi ŵakugomezga kuti Baibolo ni Mazgu gha Ciuta ndipo ndilo lekha likutiphalira unenesko. *—2 Timote 3:16.

Mu nkhani yakulondezgapo, tiwonenge umo Baibolo likuzgolera mafumbo agho ŵanthu ŵanandi ŵakufumba pa nkhani iyi. Yesu iyomwene wakati nthowa yakuya ku ciponosko njakujulika kwa “waliyose uyo wakupulikana mwa iyo.” (Yohane 3:16) Tikumupemphani kuti mughanaghanirepo mazgoro agha na kuwona usange mungakhumbikwira kusambira vinandi vya Yesu na umo mungaŵira na cipulikano mwa iyo.

[Mazgu ghamusi]