Kasi Tingacita Wuli nga Mbakhristu Kweniso Ŵenecaru?

KASI ni vinthu wuli viŵiri ivyo Yesu wakafiska mu uteŵeti wake? Cakwamba, Yesu wakakhumbanga kusintha mitima ya ŵanthu, mawupu gha ndyali yayi. Mwaciyelezgero, wonani ivyo Yesu wakayowoya mu upharazgi wake wa pa lupiri. Pambere wandayowoye za kuŵa nga ni mcere na ungweru, wakaphalira awo ŵakategherezganga kuti munthu wakuŵa wakukondwa para wamanya ‘kusoŵerwa kwake kwauzimu.’ Wakatiso: ‘Mbakukondwa awo mbakuzika, ŵakutowa mu mtima, na ŵamtende.’ (Mateyu 5:1-11) Yesu wakawovwira ŵalondezgi ŵake kuti ŵasinthe kaghanaghaniro kawo mwakuti kayane na fundo za Ciuta pa nkhani ya ico nchiwemi na ciheni. Kweniso wakaŵawovwira kuti ŵamanye kuzirwa kwa kuteŵetera Ciuta na mtima wose.

Caciŵiri, cifukwa ca lusungu, Yesu wakawovwiranga ŵanthu ŵakusuzgika. Ndipouli, cilato cake cikaŵa cakuti wawuskepo masuzgo ghose yayi. (Mateyu 20:30-34) Wakacizganga ŵalwari, kweni ŵanthu ŵakalutilira kulwara. (Luka 6:17-19) Wakawovwiranga ŵanthu wakuyuzgika, kweni vinthu vyambura urunji vikalutilira kucitika. Wakapelekanga cakurya ku ŵanjara, kweni njara yikalutilira kuyuzga ŵanthu.—Mariko 6:41-44.

Kusintha Mitima ya Ŵanthu na Kucepeskako Masuzgo

Cifukwa wuli Yesu wakaŵika comene mtima pa kusintha mitima ya ŵanthu na kucepeskako vyakuŵinya vyawo, m’malo mwa kusintha vinthu mu mawupu panji kumazga masuzgo ghose? Yesu wakamanya kuti Ufumu wa Ciuta ndiwo kunthazi uzamumazga maboma gha ŵanthu na vyose ivyo vikwambiska masuzgo. (Luka 4:43; 8:1) Lekani nyengo yinyake apo ŵasambiri ŵakamupemphanga kuti wamalire nyengo yinandi pa kucizga waka ŵanthu, Yesu wakaŵaphalira kuti: “Tiyeni tilute kunyake, mu vikaya vya pafupi, kuti nkhapharazge na kura wuwo, cifukwa ndico nkhizira.” (Mariko 1:32-38) Nangauli Yesu wakacepeskangako masuzgo gha ŵanthu ŵanandi, kweni mulimo wa kupharazga na kusambizga Mazgu gha Ciuta ndiwo ukaŵa wakuzirwa comene kwa iyo.

Ŵakaboni ŵa Yehova nawo ŵakuyezgayezga kucita nga ni Yesu apo ŵakucita mulimo wawo wakupharazga. Ŵakucepeskako masuzgo gha ŵanthu mwa kupeleka ulongozgi wakovwira pa umo ŵangacitira na masuzgo ghawo. Kweni Ŵakaboni ŵakulimbana na kufumiskapo vinthu vyambura urunji ivyo vikucitika mu caru yayi. Ŵakugomezga kuti Ufumu wa Ciuta uzamuphyera vyose ivyo vikwambiska masuzgo. (Mateyu 6:10) Nga ni Yesu, nawo ŵakufwilirapo kovwira ŵanthu kuti ŵasinthe mitima yawo m’malo mwa kusintha mawupu gha ndyali. Fundo iyi njakupulikikwa cifukwa masuzgo ghanandi ghakwiza cifukwa ca ndyali yayi, kweni cifukwa ca nkharo ziheni.

Kovwirapo nga Mbenecaru

Ŵakaboni ŵa Yehova ŵakugomezga kuti Ŵakhristu ŵakwenera kuŵa ŵenecaru ŵawemi. Ntheura ŵakucindika ŵamazaza ŵaboma. Kwizira mu mabuku ghawo na mulimo wa kupharazga, ŵakukhuŵilizga ŵazengezgani ŵawo kuti ŵapulikirenge malango. Ndipouli, para ivyo boma likukhumba vikususkana na  malango gha Ciuta, Ŵakaboni ŵakupulikira “Ciuta nga muwusi m’malo mwa ŵanthu.”—Milimo 5:29; Ŵaroma 13:1-7.

Ŵakaboni ŵa Yehova ŵakwendera ŵanthu mu vikaya vyawo kuti ŵasambirenge nawo Baibolo kwambura kulipira. Cifukwa ca masambiro agha, mitima ya ŵanthu mamiliyoni ghanandi yasintha. Cilimika cilicose ŵanthu ŵanandi ŵakovwirika. Ŵakuleka vinthu ivyo vingananga umoyo wawo nga nkhukhweŵa, uloŵevu, kugwiliskira nchito uheni munkhwala, njuga, na kugonana mwambura kwenelera. Cifukwa cakuti ŵakulondezga malango gha mu Baibolo, ŵakuŵa na nkharo yakutowa na kuŵa ŵenecaru ŵakugomezgeka.—Wonani nkhani yakuti, “Baibolo Likusintha Umoyo wa Ŵanthu,” pa peji 18 mu magazini iyi.

Kweniso kusambira Baibolo kukovwira ŵamumbumba kuti ŵacindikanenge na kuyowoyeskana makora. Fundo izi ndizo zikovwira kuti ubwezi mu mbumba uŵe wakukhora. Para mbumba ni zakukhora, vikaya navyo vikuŵa vyakukhora.

Pakuti mwaŵazga fundo zose izo zalongosoreka mu nkhani izi, kasi sono maghanoghano ghinu ngakuti wuli? Kasi Baibolo likuzomerezga kuti visopa vinjilirengepo pa ndyali? Zgoro ndakuti, likuzomerezga yayi. Kweni kasi Ŵakhristu ŵaunenesko ŵakwenera kovwirapo pa vinthu vinyake mu caru cawo? Enya. Kasi ŵangacita wuli? Ŵangawovwirapo para ŵakulondezga languro la Yesu lakuti ŵaŵe nga ni mcere na ungweru mu caru.

Awo ŵakuyezgayezga kulondezga ulongozgi wa Yesu uwu, ŵasangenge vyandulo pamoza na mbumba zawo kweniso vikaya ivyo ŵakukhala. Ŵakaboni ŵa Yehova ŵazamuŵa ŵakukondwa kumulongosolerani vinandi vyakukhwaskana na umo ŵakusambilira na ŵanthu Baibolo mu cigaŵa cinu. *

[Mazgu ghamusi]

[Mazgu Ghakukhozgera pa peji 10]

Yesu wakakhumbanga kusintha mitima ya ŵanthu kuti mawupu gha ndyali yayi.

[Mazgu Ghakukhozgera pa peji 11]

Ŵakaboni ŵa Yehova ŵakumanya kuti ŵakwenera kuŵa ŵenecaru ŵawemi