Kasi Yesu Wangazgora Wuli?

Ŵanthu ŵanandi awo ŵakutemwa kusopa ŵakuti visopa vikwenera kunjilirapo pa ndyali. Ŵakugomezga kuti visopa vingawovwira comene pakumazga masuzgo gha ŵanthu. Ndipouli, Ŵakhristu ŵakuwona kuti visopa na ndyali vikwenera yayi kwendera pamoza. Kasi imwe mukuti wuli? Kasi visopa vikwenera kunjilirapo pa ndyali?

YESU KHRISTU wakumanyikwa kuti “ni munthu wakucindikika comene mu mdauko wa ŵanthu ŵakusopa.” Ipo kasi Yesu wangazgora wuli usange tingamufumba kuti, kasi visopa vikwenera kunjilirapo pa ndyali? Apo wakaŵa pa caru capasi wakazgora fumbo ili kwizira mu ivyo wakayowoya na kucita. Mwaciyelezgero, mu upharazgi wake wakumanyikwa comene wa pa lupiri, Yesu wakapeleka ulongozgi uwo ukawovwira ŵalondezgi ŵake kumanya ivyo ŵangacitako mu vikaya vyawo. Tiyeni tidumbiskane zinyake mwa fundo izo wakayowoya mu upharazgi uwu.

 Wovwirani Ŵanji

Yesu wakalongosora umo ŵalondezgi ŵake ŵakwenera kuwonera caru. Wakati: “Ndimwe mcere wa caru capasi; kweni usange mcere wamara nkhongono yake, kasi nkhongono yake yiwelerengemo wuli? Uliso na nchito pa cinthu cilicose cara kweni ukuponyeka kuwaro kuti ukandike na ŵanthu. Ndimwe ungweru wa caru. . . . Ungweru winu uŵale panthazi pa ŵanthu, mwakuti ŵawone milimo yinu yiwemi na kupeleka ucindami ku Ŵawiskemwe awo ŵali kucanya.” (Mateyu 5:13-16) Cifukwa wuli Yesu wakayaniska ŵalondezgi wake na mcere kweniso ungweru?

Pakuzunura mazgu agha, Yesu wakalongora pakweru kuti wakakhumbanga yayi kuti ŵalondezgi ŵake ŵajipaturenge ku ŵanyawo. Mazgu gha Yesu agha ghakung’anamura kuti ŵalondezgi ŵake ŵali nga ni mcere na ungweru wa ŵanthu ŵacoko waka yayi, kweni ŵanthu wose. Cifukwa wuli?

Wonani fundo iyi: Usange mcere undathilike mu cakurya ungawovwira yayi kuti cileke kuvunda. Mdima ungafumamo yayi mu cipinda usange nyali mulije. Lekani Yesu wakaŵaphalirapo yayi ŵasambiri ŵake kuti ŵakakhale kwaŵekha na kupanga muzi wawo. Nesi kukakhala ku caru ca ŵekha kwambura ŵanthu ŵavisopa vinyake. M’malo mwake, nga umo mcere ukwenera kuŵira ku cakurya na ungweru mu mdima, Ŵakhristu nawo ŵakwenera kuŵa pakati pa ŵanthu kuti ŵaŵawovwire.

“Ŵali ku Cigaŵa ca Caru Cara”

Ulongozgi uwo Yesu wakapeleka ku ŵalondezgi ŵake wa umo ŵangacitira na ŵanji ukuwuska fumbo lakuzirwa pa umo Ŵakhristu ŵakwenera kuwonera ndyali. Cifukwa wuli vili nthena? Kukati kwakhala nyengo yicoko waka kuti wafwe, Yesu wakalombera ŵalondezgi ŵake, wakati: “Nkhumulombani imwe, kuti muŵafumyemo mu caru cara, kweni kuti muŵavikilire cifukwa ca muheni. Ŵali ku cigaŵa ca caru cara, umo ine niliri ku cigaŵa ca caru cara.” (Yohane 17:15, 16) Ipo kasi vingacitika wuli kuti Ŵakhristu ŵaleke kuŵa ku cigaŵa ca caru uku ŵakucitako milimo yinyake mu vikaya vyawo? Kuti tisange zgoro, tiyeni tiwoneso mafumbo ghanyake ghatatu agha:

• Kasi Yesu wakaziwonanga wuli ndyali?

• Kasi Ŵakhristu ŵakwenera kucita wuli mazuŵa ghano?

• Kasi ivyo Ŵakhristu ŵakusambizga vikukhwaska wuli ŵanthu mu vikaya?

[Mazgu Ghakukhozgera pa peji 4]

Yesu wakalongora pakweru kuti wakakhumbanga yayi kuti ŵalondezgi ŵake ŵajipaturenge ku ŵanyawo