Sendelerani Kwa Ciuta
Mupi wa Njombe ku Wose Awo Ŵakumuteŵetera
“TAWONGA COMENE.” Waliyose wakukondwa usange ŵanthu ŵamuwonga pa viwemi ivyo wacita. Tose tikukhumba kuwongeka pa ivyo tikuyezgayezga kucita, comene na ŵanthu awo tikuŵatemwa. Ndipouli, tikutemwa comene Ciuta withu Yehova kuluska cilicose. Kasi wakuzirwiska ivyo tikuyezgayezga kucita pakumuteŵetera? Tiyeni tiwone umo wakacitira na Ebedimeleki, uyo wakaŵika umoyo wake pangozi kuti wathaske nchimi ya Ciuta.—Ŵazgani Yeremiya 38:7-13; 39:16-18.
Kasi Ebedimeleki wakaŵa njani? Vikuwoneka kuti wakaŵa wa nchito mulara pa nyumba ya Zedekiya, Themba la Yuda. * Ebedimeleki wakaŵako mu nyengo iyo Yehova wakatuma nchimi Yeremiya, kuti yikasoke Juda za pharanyiko ilo likaŵa pafupi kucitika. Nangauli Ebedimeleki wakakhalanga na ŵanthu ŵambura kopa Ciuta, kweni wakasopanga Ciuta ndipo wakamucindikanga comene Yeremiya. Ebedimeleki wakayezgeka apo ŵawusi ŵaheni ŵakapusikizgira Yeremiya kuti ngwakuwukira boma ndipo ŵakamuponya mu cinkhando ca mathakalimbwa na kumuleka kuti wafwe. (Yeremiya 38:4-6) Kasi Ebedimeleki wakacita wuli?
Ebedimeleki wakacita mwacikanga kweniso mwakucenjera kwambura kopa kuti wangalangika na ŵakaronga. Wakaluta kwa Zedekiya na kumuphalira vinthu vyambura urunji vyose ivyo ŵakaronga ŵakacitira Yeremiya. Mutepanji wakaphaliranga themba uku wakulongora ŵanthu awo ŵakaponya Yeremiya mu mathakalimbwa kuti: ‘Ŵanthu aŵa ŵacitira uheni Yeremiya.’ (Yeremiya 38:9) Mwakuzomerezgeka na Zedekiya, Ebedimeleki wakatora ŵanalume ŵanji kuti ŵakathaske Yeremiya.
Ebedimeleki wakalongoraso lusungu. Wakatora salu zikoloŵere na vizwazwa ndipo wakavikhizgira kwa Yeremiya mu cisimi. Cifukwa wuli wakatora salu zikoloŵere na vizwazwa? Mwakuti Yeremiya waviŵike munkhwapa kuti waleke kupwetekeka apo ŵakamuguzanga kufuma mu cinkhando cakunyang’amira ca mathakalimbwa.—Yeremiya 38:11-13.
Yehova wakawona ivyo Ebedimeleki wakacita. Kasi wakamuwonga? Kwizira mwa Yeremiya, Ciuta wakaphalira Ebedimeleki kuti wali pafupi kuparanya Yuda. Paumaliro Ciuta wakasimikizgira Ebedimeleki kuti wamuthaskenge. Yehova wakati: “Nditi ndikuthaske . . . Wamkuperekeka cara mu woko la ŵanthu . . . Nadi tindikuthaske iwe . . . Uwenge na lupanga cara . . . Umoyo wako tiuŵenge ngati skoghi kwa iwe.” Cifukwa wuli Yehova wakalayizga Ebedimeleki kuti wamuthaskenge? Yehova wakamuphalira kuti: “Cifukwa waŵika cigomezgo cako mwa Ine.” (Yeremiya 39:16-18) Yehova wakamanya kuti Ebedimeleki wakacita nthena cifukwa ca kufipira mtima Yeremiya kweniso cifukwa cakuti wakagomezganga Yehova.
Apa sambiro ndakuwonekerathu. Yehova wakuwonga ivyo tikucita pakumuteŵetera. Baibolo likutisimikizgira kuti wakukumbuka nanga kanthu kacoko wuli ako tacita pakumusopa cikuru tacita na mtima wose. (Mariko 12:41-44) Kasi namwe mukuciskika yayi kuti musendelere kwa Ciuta uyo wakuzirwiska uteŵeti uwo mukucita? Para ni nthena mungagomezga kuti Ciuta wazamucita mwakukolerana na ivyo Mazgu ghake ghakuyowoya kuti ni “mupi wa njombe ku awo ŵakumupenja na mtima wose.”—Ŵahebere 11:6.
Vipaturo ivyo mungaŵazga mu Meyi:
[Mazgu ghamusi]
^ ndime 4 Ebedimeleki wakacemekanga “nthunguli.” (Yeremiya 38:7) Nangauli lizgu ili likung’anamura mwanalume uyo watheneka, kweni likang’anamurangaso wanchito waliyose pa nyumba ya themba.
