Ŵaŵazgi Ŵithu Ŵakufumba Kuti . . .

Cifukwa wuli Ŵakaboni ŵa Yehova ŵakupharazga nyumba na nyumba?

▪ Mu Baibolo tikusangamo languro ilo Yesu wakapa ŵalondezgi ŵake. Wakati: “Ntheura, lutaninge mukazgore ŵanthu ŵa mitundu yose kuŵa ŵasambiri . . . [na] kuŵasambizga.” (Mateyu 28:19, 20) Kasi Ŵakhristu wose ŵakwenera kulondezga languro ili? Ŵasambiri ŵakwambilira ŵa Yesu ŵakamanya kuti ndimo ŵakwenera kucitira. Mwaciyelezgero, mpositole Petrosi wakati: “[Yesu] wakatilangura kupharazga ku ŵanthu na kupeleka ukaboni wakukwana.” (Milimo 10:42) Mpositole Paulosi nayo wakati: “Capika kwa ine kucita ntheura. Nadi, soka kwa ine usange nkhupharazga cara makani ghawemi!”—1 Ŵakorinte 9:16.

Ni Paulosi na Petrosi pera yayi awo ŵakacita mwakuyana na languro la Yesu, kweni Ŵakhristu wose ŵa mu nyengo yakale. Kupharazga ndiwo ukaŵa mulimo wakuzirwa comene. (Milimo 5:28-32, 41, 42) Ŵakaboni ŵa Yehova nawo ŵakuŵikapo mtima mazuŵa ghano kucita mwakuyana waka. Ŵakupharazga uthenga wakuyana na uwo Yesu wakapharazganga wakukhwaskana na “Ufumu wa kucanya.”—Mateyu 10:7.

Kasi uthenga wa Ufumu ukwenera kupharazgika ku ŵanthu wuli? Yesu wakalongora kuti ukwenera kupharazgika ku ŵanthu wose kulikose uko ŵangaŵa. Wakaphalira ŵasambiri ŵake kuti: “Muzamuŵa ŵakaboni ŵane . . . ku vigaŵa vyakutali comene vya caru capasi.” (Milimo 1:8) Wakayowoyerathu kuti pambere umaliro wa mgonezi undafike, “makani ghawemi agha gha ufumu, ghazamupharazgika mu caru cose kuti uŵe ukaboni.” (Mateyu 24:14) Lekani Ŵakhristu ŵakwambilira ŵakafwilirapo kupharazgira ŵanthu wose na cilato cakuti ŵafiske languro ili. (Ŵakolose 1:23; 1 Timote 2:3, 4) Ntheura, Ŵakaboni ŵa Yehova nawo ŵakuyezga kupharazgira waliyose. a

Kasi nthowa yiwemi comene yakupharazgira uthenga wa Ufumu ni nji? Yesu wakamanyanga ico wangacita kuti wapharazgire ŵanandi, ntheura wakatuma ŵasambiri ŵake ŵaŵiriŵaŵiri ku misumba, mu mizi na mu nyumba za ŵanthu. (Mateyu 10:7, 11, 12) Pamasinda pakuti Yesu wafwa na kuwuskika, ŵasambiri ŵake ŵakalutilira kupharazga “ku nyumba na nyumba.” (Milimo 5:42) Nga umo Yesu wakacitira, nawo ŵakapharazganga mwamwaŵi kweniso mu malo agho mukasangikanga ŵanthu ŵanandi. (Yohane 4:7-26; 18:20; Milimo 17:17) Mazuŵa ghano napo Ŵakaboni ŵa Yehova ŵakupharazga mwakuyana waka.

Yesu wakalongora kuti ni wose yayi awo ŵategherezgenge. (Mateyu 10:14; 24:37-39) Kasi fundo iyi yikwenera kuŵagongoweska Ŵakhristu? Wonani ciyelezgero ici: Tiyelezgere kuti muli pagulu lakuponoska ŵanthu pamanyuma pakuti cindindindi cikuru cacitika. Kasi mungagongowa kupenja ŵanthu cifukwa cakuti ŵasangikapo ŵacoko waka? Yayi, mungafwilirapo kuti panji mungaponoskaposo ŵanji. Yesu wakaphalira ŵasambiri ŵake kuti ŵawovwire ŵanandi kuti panji ŵangazomera makani ghawemi gha Ufumu. (Mateyu 10:23; 1 Timote 4:16) Para Ŵakaboni ŵa Yehova ŵakupharazga nyumba na nyumba ŵakulongora kuti ŵakutemwa Ciuta na ŵazengezgani ŵawo. Ŵanthu aŵa kuti ŵazakapone vikuthemba pakupulika uthenga wa Ufumu.—Mateyu 22:37-39; 2 Ŵatesalonika 1:8.

Magazini iyi yikulongosora uthenga wa mu Baibolo. Kuti mumanye vinandi, fumbani Ŵakaboni ŵa Yehova, panji lemberani ku ŵeneco ŵa magazini iyi.

[Mazgu ghamusi]