Kalata Yakufuma Ku Ireland

Holide Yambura Kuluwika

ŴAPAPI ŵane ŵakati: “Kuti uleke kwenjerwa na mayeso ukwenera kucitako kanthu kanyake kakukondweska kwanyengo yicoko waka. Tiye tilute ku ŵavyara ŵako ku Ireland na kukapharazgira nawo lumoza makani ghawemi ku malo uko kukupharazgika viŵi yayi.”

Nkhawonanga kuti fundo iyi njakovwira viŵi yayi. Padera pa mayeso nkhaŵaso wakwenjerwa na ulendo cifukwa nkhaŵa kuti nindalutepo ku caru cinyake pa ndege. Nkhajifumbanga kuti, kasi ningakakhala wuli mu ka tawuni kacoko ka mu cirwa apo nazgoŵera tawuni yikuru ya London?

Kweni nkheneranga kwenjerwa yayi. Ndege yikati yafika waka ku Ireland nkhawona kuti malo agha ngakukondweska. Ndipouli, nkhamba kugona mu galimoto apo tikambanga ulendo cifukwa tikanyamuka usikusiku. Nyengo yiliyose para nawuka nkhawonanga caru camalibwemalibwe kweniso cakutowa.

Usiku wakwamba tikafika mu tawuni yakucemeka Skibbereen ndipo tikasangwa na mbumba yinyake iyo yikasamira mu caru ici kuti yikapharazge makani ghawemi. Tikaseŵera magemu gha mu Baibolo. Waliyose wakatorangapo kapepara ako pakaŵanga zina la munthu wa mu Baibolo na kuyezgelera ivyo munthu uyu wakacita. Ndipo ŵanji ŵakeneranga kuzunura zina la munthu uyu.

Pa zuŵa lakulondezgapo, ine, ŵapapi ŵane, mudumbu wane, ŵavyara ŵithu, na mbumba yinyake, tikakwera boti na kuluta ku cirwa cakucemeka Heir uko kukukhala ŵanthu ŵacoko comene. Yesu wakati makani ghawemi ghakwenera kupharazgika kulikose uko kuli ŵanthu. Ntheura, tikatandala zuŵa lose kupharazga uthenga wakukhozga kwa ŵanthu ŵa ku malo agha awo ŵakatipokelera makora comene.

Dazi likawocha, ndipo tikapulikanga kasungu kawemi kakufuma ku vyakumera vyakucemeka coconut. Maluŵa ghakathaza makora mu cirwa ici. Mcenga wa mumphepete mwa nyanja ukafikanga ku malibwe uko kukaŵanga vivwimbo (vizimbo) vya njoyo na ŵakakoŵa. Capataliko tikawonangaso tuvirwa tucokotucoko uto mukakhalanga ŵanthu yayi. Tikazizwa comene na umo Yehova wali kulengera vinthu mwakukolerana.

Apo nkhaŵa ku Skibbereen, nkhakondwa kuŵa na ŵabwezi ŵanandi mu mpingo wa Ŵakaboni ŵa Yehova ndipo nkhacitako vinthu ivyo nkhaŵa kuti nindacitepo. Kwendeska boti ndico nchinthu cakukondweska comene ico nizamuluwa yayi. Nkhawonanga makora mumphepete  mwa nyanja apo nkhaŵa mu boti. Tikaluta kukaloŵa somba za cakurya camise, kweni mbawo panji kuti ŵakatubwi ndiwo ŵakambanga kukora somba. Tikambiska maseŵera ghithu na ghithu ku nyanja kweniso nkhavinako gule wa ku Ireland.

Tikamanyaso vinthu vinyake ivyo vikacitika mu tawuni ya Skibbereen. Mu vilimika vya m’ma 1840, ŵanthu ŵa mu tawuni iyi na ŵakufupi na tawuni iyi ŵakasuzgika comene apo katofeni wakatondeka kuca makora. Ŵanthu ŵanandi ŵakafwa ndipo ŵanthu pafupifupi 9,000 ŵakaŵikika mudindi limoza. Tikapembuzgika apo tikakumbuka kuti sonosono apa mu Ufumu wa Ciuta muzamuŵavya njara kweniso ŵanthu mamiliyoni ghanandi awo ŵali kufwa ŵazamuwuskika na kuŵaso ŵamoyo mu caru ciphya ca paradiso.

Tikaluta pamoza na mpingo wa ku Skibbereen ku vigaŵa vyakutali ivyo ŵakapharazgangako viŵi yayi. Tikenda mu kamsewu kafinyi na kugodobokera ku nyumba za mumphepete mwa Nyanja ya Ireland. Uku nako ŵanthu awo tikaŵapharazgiranga ŵakatipokelera makora. Nga umo tikacitiranga ku cirwa ca Heir, ŵanthu tikaŵaphaliranga kuti tili kuno cifukwa ca holide ndipo tikupharazgira ŵanthu uthenga uwemi wa mu Baibolo.

Amama ŵakapharazgira mwanakazi munyake uyo wakapokera magazini gha Gongwe la Mulinda na Galamukani! Tikati takumanaso nayo zuŵa linyake wakatiphalira kuti wakakondwa na magazini agha apo wakaŵazganga.

Mwanakazi uyu wakati: “Conde mukawereso kweni mukayegheko magazini ghanyake.” Tikamuphalira kuti tikaŵa pafupi kuluta kwithu, kweni tikamumanyiska kuti tiphalirenge munthu munyake kuti wazakamucezgere.

Mwanakazi uyu wakati: “Conde para mwiza muzakafike ku nyumba kwane. Nimuluwaninge yayi.”

Pa zuŵa lithu laumaliro la holide tikaluta ku nyanja na ŵabali kweniso ŵadumbu ŵa mu mpingo. Tikapemba moto na kocha vyakurya vinyake vya mu maji vyakukozgana na nkhonyo. Nyengo zose nkhaŵanga ŵakukondwa na ivyo nkhawonanga.

Ntheura, para nkhukumbuka za holide iyi nkhuti, yikaŵa holide yambura kuluwika. Njambura kuluwika cifukwa ca vinthu vyakukondweska pera yayi, kweni comene cifukwa cakuti nkhamanya kuti nkhacitanga vinthu vyakukondweska Yehova ivyo vikawovwira kuti walumbike. Nkhutemwa kuteŵetera Ciuta. Kweni para munthu ukuteŵetera lumoza na ŵabwezi ŵako na ŵamumbumba yakwako ukukondwa comene. Nkhati nafika ku nyumba nkhawonga Ciuta kuti wanipa ŵabwezi ŵanandi awoso ŵakutemwa vinthu vyauzimu, kweniso ivyo nkhawona nizamuviluwa yayi.

[Kulongosora Cithuzithuzi pa peji 25]

An Post, Ireland