Kasi Baibolo Likupambana Wuli na Mabuku Ghanyake?

“Malemba ghose ngakupelekeka na Ciuta mwa mzimu ndipo ngacandulo . . . , mwakuti munthu wa Ciuta waŵenge wakukwana fikepo, wakunozgekera nkhanira mulimo uliwose uwemi.”—2 TIMOTE 3:16, 17.

NI ŴANTHU wose yayi awo ŵakuzomerezga mazgu ghapacanya agha. Kweni kasi imwe mukuti wuli? Kasi ni fundo nji pa fundo izo zili pasi apa iyo imwe mukukolerana nayo pa umo mukuwonera Baibolo? Kasi Baibolo mukuliwona kuti . . .

• Ni buku ilo lili kulembeka waka makora?

• Ndimoza mwa mabuku ghakupatulika?

• Ni buku la ntharika ilo lili na nkhani zinandi zakusambizga nkharo ziwemi?

• Ni Mazgu gha Ciuta?

Fumbo linyake lingaŵa lakuti, Kasi pangaŵa suzgo lililose pa ivyo mukugomezga? Wonani ivyo Baibolo likuyowoya, likuti: “Pakuti vinthu vyose ivyo vikalembeka kale, vikalembekera kutisambizga, kuti kwizira mu cizizipizgo cithu na mu cisangulusko cakufuma mu Malemba, tiŵe na cigomezgo.” (Ŵaroma 15:4) Fundo iyi yikulongora kuti Baibolo liliko na cilato cakuti litisambizge, kutikhozga na kutipa cigomezgo.

Baibolo liŵenge kuti ni buku waka panji limoza mwa mabuku ghakupatulika, kweniso uthenga wake uŵenge kuti ukupambana na ivyo imwe mukumanya kuti ni vyakwenelera, kasi mphanyi mukuzomera kuti limulongozgani? Baibolo liŵenge kuti ndakuzura na vidokoni, kasi mphanyi mukupembuzgika nalo panji kuŵa na cilindizga pa ivyo likuyowoya?

Kweni ŵanthu ŵanandi awo ŵasambira Baibolo ŵakukhorwa kuti ni Mazgu gha Ciuta. Cifukwa wuli? Kasi nchivici cikupangiska Baibolo kuŵa lakupambana na mabuku ghanyake? Tikumupemphani kuti muŵazge fundo zinkhondi zakukhwaskana na Baibolo izo zalongosoreka mu nkhani zakulondezgapo.