Lili na Uthenga wa “Umoyo Wamuyirayira”

“Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.”—YOHANE 17:3.

UMANYI ungaponoska umoyo. Zuŵa linyake ku Nigeria apo Nouhou mwana wa myezi 10 wakalwara, amama ŵake awo ŵakagwiranga nchito ya vyaumoyo mu cikaya ŵakamanya cakucita. Ŵakanozgera mwana uyu munkhwala wakuwezgeramo maji mu thupi. Ŵakasazga shuga, mcere na maji ghawemi. Lipoti la wupu wakuwona vya umoyo wa ŵana likati: “Cifukwa cakuti mama uyu wakacitapo kanthu mwaluŵiro, kweniso pakuti wakamanyangako vyacipatala, mwana wake wakacira luŵiro. (UNICEF)

Unenesko wa mu Baibolo nawo ungaponoska umoyo. Mozesi wakati: “Ntha ndi cinthu cawaka kwa imwe, kweni mbumoyo winu, na ceneici timwandanyenge mazuŵa ghinu mu caru.” (Duteronome 32:47) Kasi Baibolo lingatovwira nadi kuti tikhale na umoyo utaliko? Kasi Baibolo mbumoyo withu munthowa wuli?

Nkhani zinkhondi izo zajumpha zalongora kuti Baibolo lili na maucimi agho ghakufiskika, likuneneska pa nkhani ya mdauko, sayansi, ndakukolerana, ndiposo lili na ulongozgi wakovwira. Fundo izi zikulongora kuti Baibolo ndapadera. Ntheura, usange Baibolo lingatovwira kusanga umoyo wamuyirayira, kasi nchamahara yayi kusanda makora ivyo likuyowoya?

Tikumuciskani kuti musambire umo Baibolo lingamovwilirani kuti muŵe na mtende wa mu maghanoghano sono kweniso kuti muzakaŵe ŵakukondwa kunthazi. Ŵakaboni ŵa Yehova mbakukondwa kumulongorani umo mungasangira unenesko uwu.

[Bokosi/Cithuzithuzi pa peji 9]

Baibolo ndapadera cifukwa ndilo lekha likuzgora mafumbo ghakuzirwa agha:

• Cifukwa wuli tili na umoyo?

• Cifukwa wuli pa caru pali masuzgo ghanandi nthena?

• Kasi ŵakutemweka ŵithu awo ŵali kufwa tizamuŵawonaso?

Mungasanga mazgoro ghakufuma mu Baibolo pa mafumbo agha mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.