Cifukwa Wuli Ciuta Wazomerezga Masuzgo?

NANGAULI ŵanthu ŵanandi ŵakulomba, kweni ŵakukayika kuti Ciuta waliko nadi. Cifukwa wuli? Panji cingaŵa cifukwa cakuti mu caru muli masuzgo ghanandi. Kasi muli kujifumbapo cifukwa ico Ciuta wazomerezgera kuti paŵe masuzgo?

Kasi Ciuta wakalenga ŵanthu ŵambura urunji ndiposo kuti ŵasuzgikenge? Viŵenge nthena mphanyi tikumucindika yayi. Wonani ciyelezgero ici: Tiyelezgere kuti mukudaŵira galimoto yiphya ndipo mwasanga kuti pa malo ghanyake njakunangika, kasi mungaghanaghana kuti ndimo ŵakayipangira? Yayi. Mungamanya kuti uyo wakapanga wakayipanga “makora” kweni kuti waka cinthu cinyake panji munthu munyake ndiyo wayinanga.

Mwakuyana waka, para tikuwona kukolerana kwa cilengiwa ndipo pamasinda tikuwona kuti vinthu vinyake ni vyakunangika, kasi tingati ndimo vikalengekera? Baibolo likusambizga kuti ŵanthu ŵakwambilira Ciuta wakaŵalenga ŵakufikapo kweni pamasinda ŵakamba kujinanga ŵekha. (Duteronome 32:4, 5) Makani ghawemi ngakuti Ciuta wali kulayizga kuti wazamunozgaso ivyo vili kunangika. Mwaciyelezgero, ŵanthu ŵakupulikira ŵazamuŵaso ŵarunji. Kweni cifukwa wuli pajumpha nyengo yitali nthena?

Cifukwa wuli Pajumpha nyengo Yitali?

Nkhani yagona pa uyo ngwakwenelera kuwusa ŵanthu. Yehova wakalenga ŵanthu kuti ŵajiwusenge ŵekha yayi. Iyo ndiyo wakeneranga kuŵawusa. Baibolo likuti: “Kuti nkhwa munthu uyo wakwenda cara kurunjika mendero ghake.” (Yeremiya 10:23) Kweni nchacitima kuti ŵanthu ŵakwamba aŵa ŵakasankha  kugalukira muwuso wa Ciuta. Cifukwa ca kuleka kupulikira ŵakazgoka ŵakwananga. (1 Yohane 3:4) Ntheura, ŵakaŵaso ŵakufikapo yayi, ŵakajinjizga mu suzgo pamoza na ŵana ŵawo.

Kwa vilimika vinandi Yehova wazomerezga ŵanthu kuti ŵajiwuse ŵekha, ndipo nyengo yose iyi yalongora kuti ŵanthu ŵangajiwusa makora ŵekha yayi. Vyalongora kuti maboma gha ŵanthu ghose ghakwambiska masuzgo. Palije nanga ndimoza ilo lili kumazga nkhondo, ucigeŵenga, vinthu vyambura urunji, panji matenda.

Kasi Ciuta wazamunozga Wuli Vinthu?

Baibolo likuti Ciuta wali pafupi kukhazikiska caru ciphya caurunji. (2 Petrosi 3:13) Ŵekha awo ŵakutemwa Ciuta na ŵanyawo ndiwo ŵazamuzomerezgeka kukhala mu caru ici.—Duteronome 30:15, 16, 19, 20.

Baibolo likuyowoyaso kuti pa “zuŵa la ceruzgo” ilo lili pafupi, Ciuta wazamumazga masuzgo ghose na kuparanya wose awo ŵakwambiska masuzgo agha. (2 Petrosi 3:7) Pamasinda, Themba lakusoleka na Ciuta Yesu Khristu, ndilo lizamulongozga ŵanthu ŵakupulikira. (Daniel 7:13, 14) Kasi muwuso wa Yesu uzamufiska vici? Baibolo likuti: “Ŵakuzika ndiwo tiŵaharenge caru, tiŵakondwenge na kusakata comene.”—Salmo 37:11.

Yesu pakuŵa Themba lakucanya wazamuwuskapo masuzgo ghose, nga mbulwari, ucekuru, na nyifwa, ivyo vikamba cifukwa cakuti ŵanthu ŵakagalukira Yehova, “cisimi ca umoyo.” (Salmo 36:9) Yesu wazamucizga wose awo ŵazomera muwuso wake wacitemwa. Mu muwuso wake, malayizgo agha gha mu Baibolo ghazamufiskika:

◼ “Nanga njumoza wa ŵenecaru tiwanene,  ‘Ndarwara;’ awo ŵakukhala mwenemuno tiŵagowokereke ubendezi wawo.”—Yesaya 33:24.

◼ “[Ciuta] wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.”—Uvumbuzi 21:4.

Kasi nchakupembuzga yayi kumanya kuti sonosono apa, Ciuta wazamufiska layizgo lake lakuti wazamuwuskapo masuzgo ghose? Nakuti tikwenera kugomezga kuti Ciuta wakupulika malurombo ghithu nangauli wazomerezga kuti paŵe masuzgo kwa kanyengo.

Ciuta waliko. Ndipo wangamupulika malurombo ghinu, nakutiso wangamanya umo mukujipulikira mu mtima. Ndipo ngwakunweka kuzakamuwonani kuti mukusangwa pa nyengo iyo muzamukayikaso yayi nesi kupulika vyakuŵinya.