Sambirani Kufuma mu Mazgu gha Ciuta

Kasi Tikukhwaskika Wuli na Vilengiwa Vyauzimu?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi ŵangelo mbanjani?

Ŵangelo ni vilengiwa vyauzimu ivyo vikukhala kucanya. Ni vilengiwa vyapacanya comene kuluska ŵanthu. Ciuta waunenesko, uyo nayo ni mzimu, wakalenga ŵangelo pambere wandalenge caru capasi. (Job 38:4, 7; Mateyu 18:10) Yehova wali na ŵangelo ŵakugomezgeka mamiliyoni ghanandi.—Ŵazgani Salmo 103:20, 21; Daniel 7:9, 10.

2. Kasi ŵangelo ŵakovwira ŵanthu?

Ŵangelo ŵakawovwira Loti uyo wakaŵa murunji. Loti wakakhalanga mu msumba uwo Ciuta wakaŵa pafupi kuparanya cifukwa ca viheni ivyo ŵanthu ŵakacitanga. Ŵangelo ŵaŵiri ŵakacenjezga Loti na mbumba yake kuti ŵacimbire. Ŵanji ŵakawonanga nga wakuyowoyapo waka, ntheura ŵakasulako. Kweni Loti na ŵana ŵake ŵasungwana ŵakapona cifukwa ca kupulikira cenjezgo ilo Ciuta wakaŵapa kwizira mu ŵangelo.—Ŵazgani Genesis 19:1, 13-17, 26.

Baibolo likulongora kuti ŵangelo ŵakovwira ŵanthu mazuŵa ghano. Ŵakudangilira mulimo wa kupharazga makani ghawemi gha Ufumu wa Ciuta uwo ŵanthu ŵakugomezgeka ŵakucita. (Mateyu 24:14) Makani ghawemi agha ghaliso na uthenga wakucenjezga. Nga umo vikaŵira mu nyengo ya Loti, cenjezgo ili ndanadi. Ndakupelekeka na Ciuta kwizira mu ŵangelo.—Ŵazgani Uvumbuzi 1:1; 14:6, 7.

Ciuta wangatuma ŵangelo kuti ŵatikhozge para tasangana na viyezgo. Wakatuma mungelo kuti wakhozge Yesu.—Ŵazgani Luka 22:41-43.

Sonosono apa Ciuta wazamugwiliskira nchito ŵangelo munthowa yinyake. Ŵazamuparanya ŵanthu ŵaheni awo ŵakwambiska masuzgo. Para ivi vyacitika, ŵanthu wazamufwatuka ku masuzgo.—Ŵazgani 2 Ŵatesalonika 1:6-8.

  3. Kasi tikukhwaskika wuli na viŵanda?

Nga umo ŵanthu ŵanandi ŵakutondekera kupulikira Ciuta, kucanya nako ŵangelo ŵanji ŵakagalukira Ciuta. (2 Petrosi 2:4) Ŵangelo ŵakugaluka aŵa ŵakucemeka viŵanda. Mulara wawo ni Satana Dyabulosi. Satana na viŵanda vyake ŵakupuluska ŵanthu.—Ŵazgani Uvumbuzi 12:9.

Satana wakutimbanizga ŵanthu na kuŵapatuska kwa Ciuta kwizira mu malonda ghaupusikizgi, maboma, na visopa vyautesi. Ntheura, Satana ndiyo wakupangiska vinthu vyambura urunji, vivulupi, na masuzgo agho ghakutambuzga ŵanthu.—Ŵazgani 1 Yohane 5:19.

4. Kasi viŵanda vikupuluska wuli ŵanthu?

Satana wakupusika ŵanthu ŵanandi na cisambizgo cakuti ŵakufwa ŵakuzgoka mizimu ndipo ŵangayowoyeskana na ŵanthu. Kweni Baibolo likuti palije ico ŵakufwa ŵangacita. (Mupharazgi 9:5) Kanandi viŵanda vikuyezgelera mazgu gha munthu uyo wali kufwa na cilato cakuti vipusike ŵanthu. (Yesaya 8:19) Viŵanda vikupusika ŵanthu munthowa zakupambanapambana nga nkhuyowoyeskana na mizimu, kuloska, kuwukwa, kweniso kugomezga kuti umo nyenyezi, dazi panji mwezi vikwendera vili na ng’anamuro linyake pa umoyo wa ŵanthu. Mazgu gha Ciuta wakuticenjezga kuti tigege vinthu vyose ivi. Ntheura, tikwenera kutaya cilicose cakukhwaskana na kugomezga viŵanda panji kucita mayere.—Ŵazgani Duteronome 18:10, 11; Milimo 19:19.

Palije cifukwa cakopera viŵanda usange tikutemwa Yehova. Para tikusambira Mazgu gha Ciuta na kucita mwakuyana na ivyo ghakuyowoya, ndikuti tikwimikana na Satana na kusendelera kwa Ciuta. Yehova ngwankhongono comene kuluska viŵanda. Ŵangelo ŵake ŵakugomezgeka ŵangatikhozga apo tikukhumbikwira wovwiri.—Ŵazgani Salmo 34:7; Yakobe 4:7, 8.

Kuti mumanye vinandi wonani cipaturo 10 ca buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.