Para Ciuta Wagowoka, Kasi Wakukumbukaso?
Sendelerani kwa Ciuta
Para Ciuta Wagowoka, Kasi Wakukumbukaso?
ZGORO ndakuti yayi. Pakuyowoya za ŵanthu awo ŵagowokereka zakwananga zawo Yehova wakuti: “Nditigowokere kwananga kwawo, ndipo ndikumbukengeso uheni wawo cara.” (Yeremiya 31:34) Ntheura, Yehova wakutisimikizgira kuti para wagowokera ŵakwananga awo ŵapera, wakukumbukaso yayi zakwananga zawo. Kasi fundo iyi yikung’anamura kuti Mlengi wa cilengiwa cose wangakumbukaso yayi kwananga uko wagowoka? Buku la Ezekiel likulongosora makora umo Yehova wakucitira pa nkhani iyi.—Ŵazgani Ezekiel 18:19-22.
Yehova wakatuma nchimi Ezekiyeli kuti yiphalire Ŵayuda na ŵanthu ŵa mu Yerusalemu awo ŵakaŵa ŵambura kugomezgeka kuti waŵaparanyenge. Mtundu wose ukaleka kusopa Yehova ndipo caru cose cikazura na nkhaza. Yehova wakapharazga kuti Ŵababuloni ndiwo ŵazamuparanya Yerusalemu. Nangauli Yehova wakayowoya kuti waŵaparanyenge kweni wakayowoyaso mazgu ghakupa cigomezgo. Ndipo munthu waliyose wakaŵa na mwaŵi wakusankha, cifukwa waliyose wakeneranga kweruzgika mwakuyana na vyakucita vyake.—Vesi 19, 20.
Wuli usange munthu waleka viheni nakwamba kucita uwemi? Yehova wakati: “Kweni usange muheni wakuzgoka kuwerako ku uheni wake wose uwo wakacita na kusunga malango ghane ghose, ndipo wakucita ico nchakunyoloka na cakurunjika, waghume nadi; kuti wafwe cara.” (Vesi 21) Yehova wakaŵa wakunozgeka ‘kugowokera’ wakwananga uyo waleka viheni, na kulongora kuti wapera nadi.—Salmo 86:5.
Kweni wuli pakuyowoya za kwananga uko wali kucita? Yehova wakuti: “Majuvyo ghake ghose agho wakaghacita kuti ghakumbukikenge kwa iye cara; cifukwa ca urunji uwo wakaucita waghume.” (Vesi 22) Wonani kuti zakwananga za uyo wapera zikatenge ‘zikumbukikengeso kwa iye cara.’ Cifukwa wuli fundo iyi njakuzirwa?
Mu Baibolo, mazgu Ghacihebere agho ghakung’anamulika kuti “kukumbuka,” ghangang’anamura vinandi padera pa kukumbuka waka vyakumasinda. Mwakukolerana na mazgu agha, buku linyake likuti: “Kanandi mazgu agha ghakung’anamura kucitapo kanthu.” Ntheura, kukumbuka kungang’anamura kucitapo kanthu. Ipo mazgu ghakuti “wazamukumbukaso yayi” ghakung’anamura kuti Yehova wazamulanga yayi munthu uyo zakwananga zake zagowokereka. a
Ntheura, mazgu gha pa Ezekiel 18:21, 22 ghakutipa cithuzithuzi ciwemi ca umo Yehova wakucitira para wagowoka. Para Yehova watigowokera, wazamukumbukaso yayi zakwananga zithu. M’malo mwake, zakwananga za awo ŵapera wakuzitaya kunyuma kwake. (Yesaya 38:17) Ntheura, vili nga nipara Yehova wakusisita zakwananga izi.—Milimo 3:19.
Pakuti ndise ŵambura urunji tikukhumbikwira lusungu lwa Yehova. Nakuti nyengo zinandi tikumunangira. (Ŵaroma 3:23) Kweni Yehova wakukhumba kuti timanye kuti para tapera zanadi, iyo ngwakunozgeka kutigowokera. Ndipo para wagowokera wakukumbukaso yayi. Fundo iyi yikung’anamura kuti Yehova wazamutipa cilango cifukwa ca zakwananga izo watigowokera kale yayi. Mazgu agha ngakupembuzga comene. Kasi lusungu lwa Ciuta lukumukhuŵirizgani yayi kuti musendelere comene kwa iyo?
Vipaturo Ivyo Mungaŵazga mu Julayi:
[Mazgu ghamusi]
a Mwakuyana waka, ‘kukumbuka zakwananga,’ kungang’anamura kucitapo kanthu ‘kwimikana na ŵakwananga.’—Yeremiya 14:10.
