Sendelerani kwa Uyo Wakupulika Malurombo

ŴANANDI awo ŵakuti ŵakugomezga kuti kuli Ciuta ŵakutondeka kulongosora vyakukhwaskana na cipulikano cawo. Ŵakutondekaso kulongosora cifukwa ico kanandi visopa vikucitira vinthu viheni panji kulongosora cifukwa ico Ciuta wazomerezgera masuzgo. Ico iwo ŵakucita, nkhulomba kwa Ciuta uyo ŵakuleka kumumanya makora.

Ndipouli, imwe mungasendelera kwa Ciuta kuluska umo ŵanji aŵa ŵakucitira. Mungakhozga cipulikano cinu na kumumanya makora Ciuta, kumutemwa kweniso kumucindika. Cipulikano canadi cikujintha pa ukaboni. (Ŵahebere 11:1) Para mwasambira unenesko wakukhwaskana na Ciuta, mumumanyenge, ndipo muyowoyenge nayo nga ni mubwezi winu. Wonani viyelezgero vya ŵanji awo ŵakatemwanga kulomba nangauli ŵakakayikiranga kuti kuli Ciuta.

◼ Patricia, uyo wazunulika mu nkhani yakwamba wakati: “Zuŵa linyake nkhaŵa na ŵanyane pafupifupi khumi ndipo ŵakamba kudumbiskana vyakukhwaskana na cisopa. Nkhaŵaphalira kuti ku nyumba nkhacimbira nkhani yakuyana waka apo adada ŵakadumbiskananga na Ŵakaboni ŵa Yehova awo ŵakiza ku nyumba kwithu. Adada ŵakagomezganga yayi kuti kuli Ciuta. Yumoza mwa ŵabwezi ŵane wakati: ‘Panji Ŵakaboni ŵa Yehova ŵakuneneska.’

Mubwezi wane munyake wakati: ‘Cingaŵa ciwemi kuti tilute ku maungano ghawo kuti tikapanikizge.’ Ndipo ivi ndivyo tikacita nadi. Nangauli tikakayikiranga, taŵanji tikalutilira kuwungana cifukwa cakuti Ŵakaboni ŵakatitemwanga.

‘Kweni ivyo nkhapulika zuŵa linyake pa Sabata, vikasintha maghanoghano ghane. Uyo wakayowoyanga nkhani wakalongosora cifukwa ico taŵanthu tikusuzgikira. Nkhaŵa kuti nindapulikepo kuti munthu wakalengeka wakufikapo kweniso kuti kwananga na nyifwa vikamba na munthu yumoza na kwambukira ŵanthu wose. Wakalongosoraso cifukwa ico nyifwa ya Yesu yikaŵira yakwenelera kuti ŵanthu ŵasangeso ico munthu wakwamba wakataya.’ a (Ŵaroma 5:12, 18, 19) Pamasinda nkhamba kupulikiska makora. Mu mtima wane nkhati, ‘Ciuta waliko nadi uyo wakutipwelelera.’ Ntheura nkhamba kulomba kwa Ciuta wanadi. Ndipo aka kakaŵa kakwamba mu umoyo wane.”

◼ Allan uyoso wazunulika mu nkhani yakwamba wakati: “Zuŵa linyake Ŵakaboni ŵa Yehova wakiza kunyumba kwithu. Muwoli wane wakaŵanjizga mu nyumba cifukwa wakanweka na ivyo ŵakayowoya  pa nkhani yakuti ŵanthu ŵazamukhala kwamuyirayira pa caru capasi. Nkhamwazgika comene. Ntheura, nkhaleka ŵalendo pa balaza, nakucemera muwoli wane mu khicini na kumuphalira kuti, ‘ucindere ine nkhuwukhumba ca. Ni vyakuti munthu wangagomezga ivi!’

Muwoli wane wakati: “‘Usange ivyo ŵakuyowoya ni vyautesi, ipo lutani pera mukaŵasuske.’

“Kweni pakaŵavya cakuti ningaŵasuska. Ndipouli, Ŵakaboni ŵakaŵa ŵalusungu comene ndipo ŵakanilekera buku lakuti kasi vyamoyo vilikucita kulengeka panji kusinthika? Buku ili likaŵa na fundo zakupulikikwa makora, ndiposo zambura kususkika, ntheura nkhakhumbanga kumanya vinandi vyakukhwaskana na Ciuta. Nkhamba kusambira Baibolo na Ŵakaboni ŵa Yehova, ndipo nyengo yicoko waka nkhasanga kuti ivyo likuyowoya vikupambana comene na ivyo nkhaghanaghananga pa nkhani ya cisopa. Nati namumanya Yehova, nkhamba kulomba kwa iyo mwakudunjika. Nkhaŵa na tunkharo twambura kwenelera, ntheura nkhalomba kuti wanovwire ndipo nkhugomezga kuti wali kuzgora malurombo ghane.”

◼ Andrew uyo wakukhala ku England wakati: “Nangauli nkhanwekanga comene na sayansi, kweni fundo yakuti ŵanthu ŵali kuŵako ŵekha nkhayigomezgeranga waka cifukwa cakuti ŵanthu ŵakatenge  njaunenesko. Nkhasuskanga kuti kuli Ciuta cifukwa ca viheni ivyo vikucitika.

Ndipouli, nyengo zinyake nkhaghanaghananga kuti, usange Ciuta waliko nadi, ipo ni mumanye makora. Cifukwa wuli ucigeŵenga na nkhondo vyazara nthena?’ Para vinthu vyanisuzga nkhalombanga wovwiri kweni nkhamumanyanga yayi uyo nkhayowoyanga nayo.

Pamasinda munthu munyake wakapa muwoli wane kathirakiti ka Ŵakaboni ŵa Yehova. Kathirakiti aka kakaŵa na mutu wakuti: Kasi Caru Ici Cizamupona? Fumbo ili ndilo nkhajifumbanga kanandi. Cifukwa ca thirakiti ili nkhajifumba kuti, ‘kasi Baibolo lingaŵa na mazgoro ghakukhorweska.’ Pamasinda apo nkhaŵa pa holide munthu munyake wakanipa buku la mutu wakuti Baibulo—Kodi Ndilo Mawu a Mulungu Kapena a Munthu? b Nkhati namanya kuti Baibolo likukolerana na ivyo sayansi yanadi yikusambizga nkhawona kuti cikaŵa cakuzirwa kuti nimanye vinandi vyakukhwaskana na Baibolo. Ntheura, apo Ŵakaboni ŵa Yehova ŵakanipempha kuti tisambirenge Baibolo nkhazomera. Nkhati napulikiska khumbo la Yehova, nkhamanya kuti waliko nadi, ndipo ningayowoya nayo mwakufwatuka mu lurombo.”

◼ Jan wa ku London, uyo wakasopanga chalichi la Katolika kwambira pa wanici wakati: “Nkhaghanaghana vyakuleka waka kusopa cifukwa ca upusikizgi uwo uli mu visopa kweniso masuzgo agho ghandana. Nkhalekaso masambiro ghapacanya ku koleji ndipo nkhamba kwimba gitala kuti nisangenge ndalama. Pa nyengo iyi ndipo nkhasangana na Pat. Wakakulira mu mbumba iyo yikasopanga Chalichi la Katolika ndipo nayo wakaleka kusopa nga ndine.

Tikakhalanga mu cinyumba ico ŵeneco ŵakacileka. Tikakhalangaso na ŵanyithu ŵanandi awo nawo ŵakaleka sukulu na kwamba kunweka na visopa vya kumafumiro gha dazi. Usiku tikadumbiskananga nyengo yitali cifukwa ico tili kulengekera. Nangauli ine na Pat tikagomezganga yayi vyakuti kuli Ciuta, kweni tikawonanga kuti pakwenera kuŵa nkhongono yinyake iyo yikupangiska kuti umoyo uŵeko.

Mwana withu wakababika apo tikasamira ku mpoto kwa England kukapenja nchito. Zuŵa linyake mwana wakalwara ndipo nkhacicizgika kulomba kwa Ciuta uyo nkhamugomezganga yayi. Nyengo yikati yajumphapo ine na Pat tikapatukana, ntheura, nkhatora mwana na kufumapo nayo. Nkhalutilira kulomba kuti panyake pakaŵa yunji uyo wakategherezganga. Kwambura kumanya, ndivyo Pat nayo wakacitanga.

“Kanyengo kakati kajumphapo zuŵa lenelira, Ŵakaboni ŵa Yehova ŵaŵiri ŵakiza pa nyumba ya Pat ndipo ŵakamupa ulongozgi wakovwira wakufuma mu Baibolo. Pat wakanimanyiska na kunifumba usange ningazomera kuti ine na iyo tisambirenge Baibolo na Ŵakaboni ŵa Yehova. Pakatora nyengo yitali yayi tikamanya kuti tikeneranga kulembeska nthengwa yithu ku boma kuti tikondweske Ciuta. Pakughanaghanira umo ubwezi withu ukaŵira, tikawonanga kuti cikaŵa cakusuzga nkhanira.

Tikanweka kuti timanye vinandi vyakukhwaskana na umo maucimi gha mu Baibolo ghakufiskikira, cifukwa ico masuzgo ghaliri ghanandi, kweniso kumanya Ufumu wa Ciuta? Mwapacokopacoko tikamanya kuti Ciuta wakutipwelelera ndipo tikakhumbanga kucita nga umo iyo wakuyowoyera. Ntheura tikatorana mwadango. Vinjeru vya mu Mazgu gha Ciuta vyatovwira kuti tilere makora ŵana ŵithu ŵatatu. Tili na cigomezgo cose kuti Yehova wakapulika malurombo ghithu.”

Sandani Ukaboni Pamwekha

Nga umo viliri na ŵanthu mamiliyoni ghanandi, ŵanthu awo ŵazunulika mu nkhani iyi nawo ŵakapusikika yayi na cisopa cautesi. Ndipo ŵakamanya cifukwa ico Ciuta wazomerezgera masuzgo kuŵapo. Mungawona kuti unenesko wa mu Baibolo ndiwo ukawovwira ŵanthu aŵa kuti ŵakhorwe kuti Yehova wakupulika nadi malurombo.

Kasi mungatemwa kusanda mwekha ukaboni wakuti Ciuta waliko? Ŵakaboni ŵa Yehova ŵaŵenge ŵakukondwa kumovwirani kuti mumanye unenesko wakukhwaskana na Yehova ndiposo umo mungacitira kuti musendelere kwa ‘Wakupulika malurombo.”—Salmo 65:2.

[Mazgu ghamusi]

[Mazgu Ghakukhozgera pa peji 10]

“Nkhati napulikiska khumbo la Yehova, nkhamanya kuti waliko nadi, ndipo ningayowoya nayo mwakufwatuka mu lurombo”

[Cithuzithuzi pa peji 9]

Cipulikano canadi cikujintha pa ukaboni na kuŵa na khumbo lakumanya unenesko wa Ciuta