Sambirani Kufuma mu Mazgu gha Ciuta

Kasi Yesu Wakimikika Pawuli Kuŵa Themba?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi Yesu wakalayizgika Ufumu ngu?

Ciuta wakalayizga kuti munthu wakufuma mwa Davide wazamukhala pa cizumbe cake muyirayira. Yesu ndiyo wakaŵa mphapu yakulayizgika iyi, ndipo pasono wakuwusa kucanya nga ni Themba mu Ufumu wa Ciuta.—Ŵazgani Salmo 89:4; Luka 1:32, 33.

Apo Davide wakaŵa muwukirano, Ciuta wakamusankha kuŵa themba pa Ŵaisrayeli, awo ŵakaŵa ŵanthu ŵake. Davide wakati wafwa, Yehova wakasankha Solomoni kukhala pa “citengo” cake. (1 Midauko 28:4, 5; 29:23) Solomoni nayo wakati wafwa, Yerusalemu wakawusikapo na mathemba ghakupambanapambana, kweni ghanandi ghakaŵa ghambura kugomezgeka. Paumaliro, Yehova wakazomerezga Ŵababuloni kuti ŵaparanye Yerusalemu pamoza na mathemba ghake. Ivi vikacitika mu 607 B.C.E. Kufuma pa nyengo iyi, palije themba lakufuma mu mzere wa Davide ilo likawusapo mu Yerusalemu wanadi.—Ŵazgani Ezekiel 21:27.

2. Kasi Ufumu wa Ciuta ukaŵa wambura mwimiliri pa caru capasi kwa utali wuli?

Nyengo yicoko waka Yerusalemu wati waparanyika, Yehova wakaphalira nchimi Daniyeli kuti wasorenge themba ilo lizamuwusa kufuma kucanya. Kasi wakeneranga kwamba pawuli kuwusa?—Ŵazgani Daniel 7:13, 14.

Daniyeli wakapatawura loto ilo Ciuta wakalangura kuti cikhuni cikuru cidumulike. Loto ili likayana waka na umo Ciuta wakalangulira kuti Ufumu wa Yerusalemu udumulike na kuparanyika. Kweni wakati misisi yake yilekeke. Ndipo para pajumpha “nyengo zinkhondi na ziŵiri,” lizamuphukaso. Baibolo likulongora kuti “nyengo” zitatu na hafu zikwimira mazuŵa 1,260, ntheura “nyengo zinkhondi na ziŵiri” ni mazuŵa 2,520. (Uvumbuzi 12:6, 14) Mu maucimi gha mu Baibolo kanandi mazuŵa ghakwimira vilimika. (Maŵazgo 14:34) Ntheura, Ufumu wa Ciuta ukaŵa wambura mwimiliri pa caru capasi kwa vilimika 2,520.—Ŵazgani Daniel 4:10-17.

  3. Kasi mphawuli apo Yesu wakimikika kuŵa Themba?

Ciuta wakimika Yesu kuŵa Themba kucanya mu cilimika ca 1914. Pakajumpha vilimika 2,520 ndendende kufuma apo Yerusalemu wakaparanyikira. Yesu wakati waŵikika kuŵa Themba, cakwamba wakacimbizga Satana na viŵanda vyake kucanya. (Uvumbuzi 12:7-10) Ivyo vikacitika vikaŵa vyambura kuwoneka ku ŵanthu, kweni vikazakamanyikwa pamasinda pakuti ŵanthu ŵamba kusuzgika. (Uvumbuzi 12:12) Ivyo vikucitika kufuma mu 1914 vikulongora kuti Yesu wakimikika kuŵa Themba cilimika cenecici.—Ŵazgani Mateyu 24:14; Luka 21:10, 11, 31.

4. Kasi Ufumu wa Yesu ukumukhwaskani wuli imwe?

Para maucimi ghakukhwaskana na muwuso wa Yesu ghakufiskika, mbukaboni wakuti mungagomezga Mazgu gha Ciuta. Sonosono apa, Yesu pakuŵa Themba wazamuwuskapo masuzgo ghose gha ŵanthu.—Ŵazgani Salmo 72:8, 12, 13; Daniel 2:44.

Kuti mumanye vinandi, wonani peji 215-218 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Chati pa peji 16, 17]

(Mu magazini yakusindikizga ndimo vikuwoneka makora)

Okutobala Okutobala

607 B.C.E. 1914 C.E.

← Vilimika 2,520 →

1000 B.C.E. 1 B.C.E. 1 C.E. 1000 C.E. 2000 C.E.

← Vilimika 606.25 →← Vilimika 1,913.75 →

Ufumu wa Pendeserani na kalikuleta: Ciuta wakimika

Yerusalemu 606.25 Yesu kuŵa Themba ndipo

ukuparanyika + 1,913.75 wali na nkhongono pa mitundu

= 2,520