Sendelerani kwa Ciuta

Yehova Wakutinkha Vinthu Vyambura Urunji

“MUNTHU yumoza wakuwusa pacanya pa munyake kujipweteka iye mwene.” (Mupharazgi 8:9) Mazgu agha agho ghakalembeka vilimika 3,000 ivyo vyajumpha ghakulongosora makora ivyo vikucitika mu caru ici. Ŵanthu ŵakutemwa kugwiliskira nchito uheni nkhongono zawo. Vilije kanthu kuti mbanjani ndipo ŵakukhala nkhu. Ŵanthu aŵa comene ŵakuyuzga ŵanthu awo ŵalije wovwiri panji ŵakavu. Kasi Yehova wakujipulika wuli na vinthu vyambura urunji ivi? Zgoro tikulisanga pa Ezekiel 22:6, 7, 31.—Ŵazgani.

Mu Dango ilo Yehova wakapeleka ku Ŵaisrayeli, wakayowoya mwakupulikikwa makora kuti awo ŵali na mazaza ŵakeneranga cara kugwiliskira nchito uheni mazaza ghawo. Wakatumbikanga mtundu wa Israyeli pekha usange ŵalongozgi ŵakaghanaghaniranga na kucitira lusungu ŵanthu ŵakuyuyulika na ŵakavu. (Duteronome 27:19; 28:15, 45) Ndipouli, mu nyengo ya Ezekiyeli, ŵakaronga ŵa mu Yerusalemu na Yuda ŵakacitiranga nkhaza comene ŵanthu. Kasi cikacitikanga nchivici?

Ŵakaronga ŵakagwiliskiranga nchito nkhongono zawo “pa kuthiska ndopa.” (Vesi 6) Pa vesi ili lizgu lakuti “nkhongono” likwimira mazaza. Mu Baibolo linyake vesi ili lili kung’anamulika kuti: “Ŵakaronga ŵa Israyeli . . . ŵakagwiliskiranga nchito nkhongono zawo pa kuthiska ndopa.” Kasi urunji ungaŵapo wuli usange ŵanthu awo ŵakuwoneka kuti ŵakwenera kusunga dango ndiwo ŵakutondeka ndipo ŵakukoma ŵanthu ŵambura mulandu?

Pakuyowoya mazgu agha, nchakuwonekerathu kuti Ezekiyeli wakacomboranga ŵalongozgi pera yayi, kweniso awo ŵakakolerananga nawo pakuleka kupulikira Dango la Yehova. Ezekiyeli wakati: “Wiske na nyina wakuyuyulika.” (Vesi 7) Cifukwa ca kuleka kucindika ŵapapi ŵawo ŵanthu ŵakaswa dango ilo likakakiliranga pamoza mtundu wa Israyeli.—Exodus 20:12.

Ŵanthu ŵaheni ŵakacitiranga nkhaza ŵakavu. Para Ŵaisrayeli ŵaleka kupulikira ukaŵanga ukaboni wakuti ŵakaŵikangako mahara yayi ku Dango ilo Ciuta wakaŵapa cifukwa ca citemwa. Mwaciyelezgero, Dango la Ciuta likaphaliranga Ŵaisrayeli kuti ŵakhalenge makora na ŵalendo. (Exodus 22:21; 23:9; Leviticus 19:33, 34) Kweni ŵanthu ŵakasuzganga ŵalendo.—Vesi 7.

Kweni ŵanthu ŵakacitirangaso nkhaza awo ŵakaŵavya wakuŵavikilira panji kuti “mulanda mburawiske na cokoro.” (Vesi 7) Yehova wali maso comene na awo mupapi panji munyawo wa mu nthengwa wafwa. Yehova wakulayizga kuti wazamweruzga awo ŵakuyuzga ŵana ŵalanda na vyokoro.—Exodus 22:22-24.

Ŵaisrayeli ŵa mu nyengo ya Ezekiyeli ŵakaswa Dango la Ciuta munthowa zinandi ndipo ŵakayuyura cilato ca Dango ili ico nchitemwa. Kasi Yehova wakacita wuli? Iyo wakati: ‘Ndipungulirenge ukali wane pa iwo.’ (Vesi 31) Nga umo Yehova wakayowoyera, mu 607 B.C.E wakazomerezga Ŵababuloni kuparanya Yerusalemu ndipo ŵanthu wakatolekera kuwuzga.

Ivyo Ezekiyeli wakayowoya vikutisambizga vinthu viŵiri vyakukhwaskana na Yehova pa umo wakuwonera vinthu vyambura urunji. Cakwamba, wakuvitinkha. Caciŵiri, wakulengera lusungu ŵanthu awo ŵakucitirika vyambura urunji kwambura cifukwa. Ciuta wandasinthe. (Malaki 3:6) Wakulayizga kuti sonosono apa wawuskengepo vinthu vyambura urunji vyose pamoza na ŵanthu awo ŵakuvicita. (Zintharika 2:21, 22) Ipo mphanyi mwalutilira kumanya vinandi vyakukhwaskana na Ciuta uyo wakutemwa urunji kweniso umo mungaŵira nayo paubwezi.—Salmo 37:28.

Vipaturo ivyo mungaŵazga mu Ogasiti:

◼ Ezekiel 21-38

[Mazgu Ghakukhozgera pa peji 27]

Yehova wakayowoya mwakupulikikwa makora kuti awo ŵali na mazaza ŵakeneranga cara kugwiliskira nchito uheni mazaza ghawo