NKHABABIKIRA mu llocos Norte, Philippines, pa Disembala 10, 1968. Mu nyumba ya kwithu tilimo ŵana 10 ndipo ine ndine wa nambara 7. Nga mbanthu ŵanandi ŵa ku Philippines, nase tikakulira mu Katolika. Nkhamalizga masambiro gha ku sekondare mu 1986, ndipo nkhakhumbanga kuzakaŵa nesi. Ndipouli, cilato cane cikafiskika yayi cifukwa nkhalwara comene. Nakuti nkhaghanaghananga kuti nifwenge. Mahara ghakanimalira cifukwa ca ulwari, ntheura nkhaŵeyelera Yehova kuti para ningacira mbwenu nizamumuteŵetera umoyo wose.

Nkhacira pati pajumpha nyengo yitali, ndipo nkhakumbuka ivyo nkhalayizga Ciuta. Ntheura, mu Juni 1991, nkhanjira sukulu ya Baibolo ya Pentekoste. Ghanji mwa malango gha pa sukulu iyi, ghakaŵa ghakuti waliyose wakwenera kupokera “cawanangwa ca mzimu utuŵa.” Nkhakhumbanga kuŵa na nkhongono za kucizga mwamunthondwe. Ku sukulu iyi tikasambizgika kuti munthu kuti waŵe na cawanangwa ici wakwenera kuziŵizga kurya na kulomba comene. Nyengo yinyake pakuyezgayezga kuti nilongore kuti nili na “cawanangwa” ici, nkhaluta pafupi na mwanakazi munyake uyo wakalombanga mwakukwezga na kukategherezga. Apo wakaŵa pafupi kumalizga, mwaluŵiro nkhacimbilira pa malo agho nkhaŵa. Pamasinda nkhamuphalira vinthu vyakuyana ndendende na ivyo wakalombanga, ndipo wakagomezga kuti nkhaŵa na “cawanangwa” ca mzimu utuŵa.

Apo nkhalutiliranga kusambira, nkhaŵa na mafumbo ghanandi. Mwaciyelezgero, pa Mateyu 6:9 pakuyowoya za “Ŵadada” na “zina” lawo. Nkhajifumbanga mafumbo nga ni “Kasi Ŵadada awo Yesu wakanenanga apa mbanjani?” ndipo ni “Zina la njani ilo likwenera kutuŵiskika?” Mazgoro gha ŵasambizgi ŵane ghakaŵa ghakupulikikwa makora yayi, kweniso ghambura kukhorweska. Ŵakayowoya zakuti kuli ŵaciuta ŵatatu, ndipo ŵakati ici nchakusuzga kucipulikiska. Nkhatimbanizgika comene. Nangauli vikaŵa nthena, kweni nkhalutilira kusambira kuti nizakaŵe muliska.

Ku sukulu ya Baibolo, ŵakatisambizga kuti Ŵakaboni ŵa Yehova ŵakuthandazga cisopa cautesi kweniso cakofya comene. Ŵakatiso Ŵakaboni ŵa Yehova ŵakumugomezga yayi Yesu. Nkhamba kucitinkha comene cisopa ici.

Mu cilimika caciŵiri pa sukulu iyi nkhaluta kunyumba kukawona ŵapapi pa nyengo ya holide. Mukuru wane munyake zina lake Carmen wakapulika kuti nili kunyumba ndipo wakiza kuzakaniwona. Iyo wakaŵa kuti wabapatizika kale kuŵa Kaboni wa Yehova ndipo wakaŵa mupharazgi wanyengozose. Apo wakakhumba kunipharazgira mazgu gha Ciuta, nkhazgora mwaukali kuti: “Nkhumumanya kale Ciuta uyo nkhusopa!” Nkhati namuzgora mwakukwezga, nkhamututuzgira kutali ndipo nkhamupaso mpata wakuyowoya nane yayi.

Nkhati nawelera ku sukulu, Carmen wakanitumizgira burosha la mutu wakuti, Kodi Muyenera Kukhulupirira Utatu? * Nkhalikonya mwaluŵiro na kulitaya pa moto. Nkhaŵa kuti nicali wakukwiya.

Nkhalutilira masambiro ghane ku sukulu yakusambizga Baibolo. Nakuti nkhakopakoso ŵanji awo nawo ŵakamba kulondezga visambizgo vinthu. Nkhakondwa comene cifukwa cakuti amama na mukuru wane ŵakanjira chalichi ilo nkhasopanga.

Mu Malici, 1994, nkhamalizga masambiro ghane pa sukulu yakusambizga Baibolo ya Pentekoste. Nga umo nanguyowoyera kukwambilira kwa nkhani iyi, pa nyengo iyi muliska mulara wakaŵa kuti wiza pa sukulu yithu. Tose ise tikamalizga masambiro tikakhumbanga kucezga nayo cifukwa tikagomezganga kuti wakaŵa na cawanangwa cakucizga mwamunthondwe. Ntheura, tikamba kudukaduka na kuluta kunthazi uko wakaŵa. Tikakuŵanga mawoko uku viding’indi vikukung’unthika. Waliyose uyo muliska uyu wamukora wakawanga pasi na “kuzemphuka cifukwa ca nkhongono ya mzimu.” * Pamasinda wakakora ine ndipo nane nkhawa pasi na kuzemphuka. Nkhati nasisipuka, nkhaŵa na wofi, kweni nkhawona kuti sono nili na nkhongono za kucizga mwamunthondwe. Ntheura, nkhakondwa comene.

Nyengo yicoko waka nati napokera nkhongono izi nkhacizga mwana munyake uyo wakalwara maleriya ghakuru. Nkhati nalomba, nyengo yeneyiyo mwana wakamba kufoma ndipo maleriya ghakamara. Paumaliro, nkhamba kughanaghana kuti ningafiska ivyo nkhalayizga Ciuta. Kweni mu mtima nkhajipulikanga kuti nkhusoŵerwa cinthu cinyake. Nkhagomezganga kuti kuli Ciuta yumoza pera, kweni nkhamumanyanga makora yayi. Ndipo nkhakayikiranga visambizgo vinandi vya chalichi.

Ivi vikati vyacitika nkhamba kuŵatinkha comene Ŵakaboni ŵa Yehova. Ndipo palipose apo nasanga mabuku ghawo nkhawochanga waka. Pamasinda cinthu cinyake cakuzizwiska cikacitika. Nkhazizwa kuwona kuti amama ŵakakhumbangaso yayi chalichi lithu la Pentekoste cifukwa Carmen wakasambiranga nawo Baibolo. Nkhamukwiyira comene mukuru wane uyu.

Mu nyumba ya kwa mama nkhasangamo magazini ya Galamukani! ndipo mwa nyengo zose, apa napo nkheneranga kuwocha. Kweni cifukwa cakuti nkhanweka kumanya ivyo ŵakaŵazganga, nkhajura mapeji ghanandi na cilato cakuti niyiwone waka. Nkhawona nkhani yinyake yakuyowoya za munthu munyake uyo wakademeleranga comene pa ivyo wakasambiranga ku chalichi. Kweni wakati wamba kuŵazga mabuku gha Ŵakaboni ŵa Yehova pamoza na Baibolo, wakakhorwa kuti cisambizgo cakuti kuli ŵaciuta ŵatatu mwa yumoza nchakufuma mu malemba yayi. Wakamanyaso kuti Baibolo likusambizgapo yayi vyakuti Ciuta wakulanga ŵanthu mu moto, nesi kuti munthu wali na mzimu uwo ukuleka kufwa. Nkhakhwaskika comene mu mtima. Ivi ni visambizgo ivyo nkhakhumbanga kuvipulikiska. Kufuma nyengo iyi, nkhamba kupenjerezga nthowa ya umo ningamanyira unenesko wa mu Baibolo.

Nkhaŵazgaso nkhani ya munthu munyake mu Galamukani! Nkhani iyi yikalongosoranga za munthu uyo wakaŵa muloŵevu ndiposo wakamwanga munkhwala wakuzweteska wongo. Kweni wakasintha cifukwa ca kusambira Baibolo. Ntheura nkhamba kuŵazga Baibolo na mabuku ghanandi gha Ŵakaboni. Nkhasanga burosha lakuti Dzina la Mulungu Limene Lidzakhala Kosatha. * Nkhati naliŵazga, nkhamanya kuti zina la Ciuta ni Yehova. Nkhakondwa comene kumanya unenesko wakukhwaskana na Ciuta.​—Duteronome 4:39; Yeremiya 10:10.

Nkhalutilira kuŵazga mabuku agha mwacisisi ndipo nkhamanya vinandi vyakukhwaskana na unenesko wa mu Baibolo. Mwaciyelezgero, ku sukulu ya Pentekoste nkhasambizgika kuti Yesu ni Ciuta, kweni sono nili kusambira kufuma mu Baibolo kuti ni “Mwana wa Ciuta wamoyo.”​—Mateyu 16:15, 16.

Apo nkhasanganaso na Carmen, wakazizwa comene nkhati namupempha burosha la mutu wakuti Dzina la Mulungu Limene Lidzakhala Kosatha, na mabuku ghanyake. Nkhamalira vyaka vinandi ku sukulu yakusambizga Baibolo yira, kweni nkhasambizgika unenesko yayi, nkhabulumutizgika waka. Sono mtima wane ngwakuzura na cimwemwe cifukwa ca unenesko uwo nili kusambira mu Baibolo. Ntheura, nkhawona kuti mazgu agho Yesu wakayowoya ngaunenesko. Mazgu agha ghakuti: “Mumanyenge unenesko, ndipo unenesko umufwaturaninge.” (Yohane 8:32) Unenesko uwu ukamba kusintha umoyo wane.

Pakwamba nkhaghanaghananga kuti kwa kanyengo ningasopa Yehova mwakubisilizga uku nkhulutizga kucita vya uliska. Nyengo yicoko waka nkhawona kuti nkhasambizgangaso visambizgo vinandi yayi vya Chalichi. Ndipouli, nkhaŵa na wofi. Nkhajifumbanga kuti kasi wovwiri niwusangenge nkhu para naleka uliska? Cikuŵa cikhuŵazgo cikuru comene ku Chalichi para yumoza mwa ŵaliska wazgoka Kaboni wa Yehova. Ntheura, nkhalutilira kusambizga nga muliska, kweni nkhageganga visambizgo vyautesi vya chalichi.

Pa nyengo yinyake apo tikasanganaso na mukuru wane Carmen, wakanipempha kuti nilute ku maungano gha Ŵakaboni ŵa Yehova. Pakuti kanandi nkhalutanga ku chalichi likuru la mu msumba wa Laoag, mwacibisibisi nkhapenjerezga Nyumba ya Ufumu ya Ŵakaboni ŵa Yehova. Ŵakanilongozgera kwa Alma Preciosa, Villarin uyo ŵakamucemangaso “Precious.” Munthu uyu wakaŵa mupharazgi wanyengozose. Nangauli nkhaŵa kuti nicali kuŵatinkha Ŵakaboni ŵa Yehova, kweni nkhazomera kuti wasambirenge nane Baibolo.

Mukuru wane wakazikira nane comene pakunipharazgira unenesko wa mu Baibolo. Mzimu wa kuzika wanthena uwu nkhawuwonaso na Precious. Wakanovwira comene kuti nipulikiske unenesko wa mu Baibolo, nangauli nkhakwiyanga, kumususka comene na kudemelera ku vinthu ivyo nkhasambizgika. Nkhacontheka comene cifukwa ca umo Precious na Ŵakaboni ŵanji ŵakacitiranga nane. Ŵakaŵa ŵaubwezi, ŵakujiyuyura kweniso ŵakuzika. Ivi vikanovwira kuti niŵe na khumbo lakwamba kusopa Yehova.

Mu Julayi 1995, nkhamanya kuti nkheneranga kusankhapo cimoza usange nkhukhumba kukondweska Ciuta. Nkheneranga kuleka uliska. Cifukwa wuli? Lemba la Uvumbuzi 18:4 likuyowoya za cisopa cautesi kuti: “Fumanimo mwa iyo, mwaŵanthu ŵane, usange mukukhumba cara kutorako zakwananga zake, ndiposo usange mukukhumba cara kupokako vilengo vyake.” Wuli pa nkhani ya wovwiri wa ndalama? Lemba la Ŵahebere 13:5 likanisambizga kuti usange tikucita khumbo la Ciuta, iyo wakulayizga kuti: “Nikulekenge cara napacoko nesi kukutaya mu nthowa yiliyose.”

Nangauli ŵadada na mudumbu wane ŵakamba kunisuska comene, kweni apo kukakhala sabata ziŵiri kuti nkhabapatizike kuŵa Kaboni wa Yehova, nkhacita cikanga ndipo nkhaluta kunyumba na kuwocha vinthu vyose ivyo nkhagwiliskiranga nchito apo nkhaŵa muliska. Nkhati nacita ivi nkhawona kuti nkhongono zose izo nkhaŵa nazo zikamara. Kale para nagona, nkhajipulikanga kuti cinthu cinyake cikunididimizgira pasi. Ivi navyoso vikaleka. Vizgezge ivyo nkhaviwonanga pa windo la cipinda cane navyo vikazgeŵa. Baibolo lanisambizga kuti mazuŵa ghano, nkhongono zakucizga mwa munthondwe izo ŵakuti ni vyawanangwa vya mzimu, ni zakufuma kwa Ciuta yayi kweni ku mizimu yiheni. Nili wakukondwa comene kuti sono nili kufwatuka ku nkhongono za mizimu yiheni, nga umo Paulosi wakawovwilira msungwana wanchito kufwatuka ku mzimu wa “ciŵanda cakuwukwa.”​—Milimo 16:16-18.

Nkhakondwa comene kuti nkhabapatizikira lumoza na amama mu Seputembala 1996. Nkhati nabapatizika, nkhalembeska kuti niŵe mupharazgi wanyengozose wa Ŵakaboni ŵa Yehova ndipo nili wakukondwa kuti nateŵetera vyaka vinandi.

Sono nili kutengwa ndipo zina la mfumu wane ni Silver. Tose tikufwilirapo kusambizga mwana withu msungwana unenesko wa mu Baibolo. Ŵanji mu mbumba yithu nawo ŵali kwamba kuteŵetera Yehova. Nangauli nkhudandawura kuti kwa nyengo yitali nkhamumanyanga yayi Ciuta, kweni sono nili wakukondwa kuti nkhumumanya Ciuta uyo nkhusopa.