Sambirani Kufuma mu Mazgu gha Ciuta

Kasi Ŵanthu Ŵangakhala Kwamuyirayira?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Cifukwa wuli umoyo withu ukuwoneka kuŵa ufupi?

Ŵafulu ŵanji ŵakukhala na umoyo vilimika 150, ndipo makuni ghanyake vilimika 3,000. Kweni umoyo wa munthu ngufupi comene. Ndipouli, umoyo withu ungaŵa wacandulo comene kuluska wa fulu panji khuni. Yehova Ciuta wali kulenga ŵanthu munthowa yakuti ŵakondwenge na sumu, maseŵera, ŵasambirenge vinthu, kutembeya, ndiposo kucezga na ŵanji. Mu mitima yithu, Ciuta wali kuŵikamo khumbo lakuti tikhalenge kwamuyirayira.—Ŵazgani Mupharazgi 3:11.

2. Kasi tingakhala nadi kwamuyirayira?

Yehova ngwamuyirayira. Wakufwa yayi. Ndiyo mweneco wa umoyo, ntheura wangapeleka umoyo wamuyirayira ku ŵanji. (Salmo 36:9; Habakuk 1:12) Nakuti wali kulayizga umoyo wamuyirayira ku ŵanthu awo ŵakumupulikira. Kweniso ucekuru uzamuŵakoso yayi.—Ŵazgani Job 33:24, 25; Yesaya 25:8; 33:24.

Yesu wakacita minthondwe yinandi iyo yikutovwira kuti tigomezge ivyo Ciuta walayizga pa nkhani ya umoyo wamuyirayira. Yesu wakacizga matenda ghanandi kweniso kuwuska ŵakufwa.—Ŵazgani Luka 7:11-15, 18, 19, 22.

 3. Kasi mphawuli apo tizamuŵa nadi na umoyo wamuyirayira?

Ciuta wakukhumba kuti tizakakhale na umoyo wamuyirayira mu paradiso pa caru capasi, kuti mu caru cakuzura na nkhaza na vivulupi yayi. Ndipo wakukhumba kuti tiŵe ŵakuvikilirika. (Salmo 37:9, 29; Yesaya 65:21, 22) Para caru cazakaŵa Paradiso, ŵanthu mamiliyoni ghanandi awo ŵali kufwa ŵazamuŵaso ŵamoyo. Ndipo para ŵazakasankha kusopa Ciuta na kumupulikira, ŵazamukhala kwamuyirayira.—Ŵazgani Luka 23:42, 43; Yohane 5:28, 29.

4. Kasi tingacita wuli kuti tizakaŵe na umoyo wamuyirayira?

Ni Ciuta pera uyo wangatipa umoyo wamuyirayira. Ntheura, tingacita makora kuti timumanye na kuŵa nayo paubwezi. Baibolo likuyaniska kusambira vya Ciuta na kurya cakurya. (Mateyu 4:4) Kurya cakurya nkhwakukondweska, kweni munthu wakukhumbikwira kufwilirapo kuti wacisange na kuciphika. Mwakuyana waka, kuti munthu warye cakurya cauzimu wakukhumbikwira kufwilirapo. Kweni kasi cilipo cinthu cinyake ico nchakuzirwa comene kuluska kuŵa paubwezi na Ciuta na kupokera umoyo wamuyirayira?—Ŵazgani Luka 13:23, 24; Yohane 6:27; 17:3.

Kuti mumanye vinandi wonani cipaturo 3 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Cithuzithuzi pa peji 16]

[Cithuzithuzi pa peji 16]

[Cithuzithuzi pa peji 17]

[Cithuzithuzi pa peji 17]

Kuti munthu wamanye Ciuta wakukhumbikwira kufwilirapo