Ŵaŵazgi Ŵithu Ŵakufumba Kuti . . .

Kasi munthu wakuŵa wakukondwa pekha para wanjira mu nthengwa?

▪ Kasi Baibolo likuti munthu wakwenera kutora panji kutengwa kuti waŵe wakukondwa? Pakwamba mungawona nga Baibolo likukhozgera fundo iyi. Cifukwa wuli?

Mwakuyana na nkhani ya mu Genesis, Ciuta wakawona kuti “nkhuwemi cara” kuti Adamu wakhale yekha. Ntheura Ciuta wakamupangira Eva nga ni “movwiri wakumwenelera.” (Genesis 2:18) Kufuma pa nkhani iyi tingawona nga kuti munthu wakuŵa wakukwana pekha para watora panji kutengwa. Mwakusazgirapo, nkhani zinandi mu Baibolo zikulongora nga kuti nthengwa ndiyo yikupangiska kuti munthu watumbikike na kuŵa wacimwemwe. Nkhani ya Rute njimoza mwa nkhani izi.

Kweni kasi cilato ca nkhani izi nchakuti zitisambizge kuti munthu wakuŵa wakukondwa pekha para wanjira mu nthengwa na kubaba ŵana? Ndimo viliri yayi. Munthu uyo wakaŵa wakukondwa kweniso wakukhorwa pa ŵanthu wose ni Yesu Khristu. Kweni wakatora yayi mpaka apo wakafwira. Yesu uyo wakaŵa wavinjeru comene wakalongora makora comene umo Yehova, “Ciuta wakukondwa” waliri. (1 Timote 1:11; Yohane 14:9) Yesu wakavumbura ivyo vikukhumbikwa kuti munthu waŵe wakukondwa. (Mateyu 5:1-12) Pa vinthu ivyo wakayowoya wakazunurapo yayi vya nthengwa.

Kasi tingati Baibolo likujisuska lekha pa nkhani iyi? Yayi! Tikwenera kughanaghanira cilato ca Yehova pa nkhani ya nthengwa. Nangauli Ciuta wakambiska nthengwa kuti ŵanthu ŵakondwenge, kuŵa paubwezi, na kupembuzgana, kweni yawovwiraso pakufiska vigaŵa vinyake vya khumbo lake. Mwaciyelezgero, Ciuta wakakhumbanga kuti Adamu na Eva ‘ŵababane ŵandane ŵazuzge caru capasi na kucithereska.’ (Genesis 1:28) Adamu panji Eva payekha wakatenge wafiskenge khumbo la Ciuta yayi. M’malo mwake, waliyose wakakhumbikwiranga munyake, ndipo waliyose wakavwiranga munyake munthowa yapadera.

Mwakuyana waka, Yehova wakaŵa na vilato vyapadera pa nkhani ya nthengwa kweniso mbumba apo wakacitanga vinthu na mtundu wa Israyeli. Wakakhumbanga kuti mtundu wake uŵe na ŵanthu ŵanandi mwakuti ŵalwani ŵaleke kuŵathereska. Kweniso wakanozga vyakuti mu mzere wa Yuda muzakafume Mesiya uyo wazamuponoska mtundu wa ŵanthu ku kwananga na nyifwa. (Genesis 49:10) Ntheura, ŵanakazi ŵakugomezgeka mu Israyeli ŵakawonanga kuti ni mwaŵi wapadera kutengwa na kubaba ŵana. Ndipo ŵakawonanga kuti nchakukhozga soni kweniso cakucitiska citima para ŵatondeka kucita nthena.

Wuli pakuyowoya za mazuŵa ghano? Kasi mazgu gha Yehova ghakuti “muzuzge caru,” ghakung’anamura kuti Ŵakhristu mazuŵa ghano ŵakwenera kuŵika mtima comene pakutora na kubaba ŵana? Cara. (Mateyu 19:10-12) Nakuti mazuŵa ghano Yehova wakukhumbaso kuvikilira mzere wakubabikira Mesiya yayi, nesi kuvikilira mtundu wakubabikiramo. Ipo Ŵakhristu ŵakwenera kuyiwona wuli nkhani yakutora panji kuleka kutora?

Pose paŵiri, kunjira mu nthengwa panji yayi, nchawanangwa cakufuma kwa Ciuta. Nga umo mukumanyira, cawanangwa ico cingaŵa cakwenelera kwa yunji kwa munyake cingaŵa cambura kwenelera. Nthengwa nchinthu cakupatulika ico cikovwira kuti mu mbumba muŵe citemwa, ubwezi, kweniso kuti mbumba yiŵe yakukhora. Ndipouli, Baibolo likutiso awo ŵakunjira mu nthengwa mu caru cambura kufikapo ici, ŵasanganenge na masuzgo, panji kuti ŵaŵenge na “suzgo mu thupi lawo.” Kweniso Yehova wakuwona kuti kuleka kunjira mu nthengwa nchinthu cakukhozga soni panji cakucitiska citima yayi. M’malo mwake, Baibolo likuti kuleka kunjira mu nthengwa kuli na mauwemi ghanandi pakuyaniska na awo ŵali mu nthengwa.—1 Ŵakorinte 7:28, 32-35.

Ntheura, Baibolo likulongora kuti kunjira mu nthengwa panji yayi, vyose ni viwemi waka. Yehova uyo wakambiska nthengwa wakukhumba kuti ŵateŵeti ŵake wose ŵaŵenge ŵakukondwa, kwali mbakutora panji yayi.