Vahan wakababikira ku Armenia mu Epulero, 1983. Mu 1996, iyo na ŵanyake ŵamumbumba yakwake ŵakamba kusambira Baibolo na Ŵakaboni ŵa Yehova. Ndipo wakabapatizika apo wakaŵa na vyaka 16. Cifukwa ca ivyo wakasambira mu Baibolo, Vahan wakazirwiskanga comene ivyo Yesu wakasambizga. Mwaciyelezgero, wakawona kuti ulongozgi uwo Yesu wakaphalira ŵasambiri ŵake wakuti ŵakwenera yayi kutora vilwero, ngwakuzirwa comene. (Mateyu 26:52) Ntheura nyengo yicoko waka wati wabapatizika, wakakhumbikwiranga kusankha mwamahara pa nkhani yakusuzga comene.

Dango la ku Armenia likuti munyamata waliyose wa vyaka 18 wakwenera kunjira usilikari, wakhumbe waleke. Uyo wakana wangajalirika mu jele kwa vyaka vitatu. Nangauli Vahan wakakhumbanga kuteŵetera ŵanthu ŵakwake, kweni wakakhumba yayi kunanga njuŵi yake yakusambizgika Baibolo. Kasi wakacita wuli?

Mu 2001, apo wakaŵa wakwenelera kunjira usilikari, Vahan wakamba kulemba makalata ku ŵalara ŵa boma. Mu makalata agha wakalembamo kuti nchito iyi yingananga njuŵi yake kweniso yikususkana na vigomezgo vyake vyacisopa. Kweniso wakayowoya kuti ngwakunozgeka kugwira nchito yiliyose mu boma kupaturako usilikari.

Caka cimoza cikajumphapo wacali kupempha ŵalara ŵa boma kuti ŵaghanaghanire pempho lake lakukhwaskana na njuŵi yake pa nkhani ya usilikari. Kweni mu Seputembala 2002, Vahan wakakakika. Pamasinda ŵakamupa mulandu wakukana kunjira usilikari. Ntheura, ŵakamujalira mu jele kwa myezi 18. Mulara wakwimira boma pa milandu wakakhorwa yayi na cilango ici. Pati pajumpha waka mwezi umoza kufuma apo ŵakamujalilira mu jele, mwimiliri wa boma uyu wakacita apilu ku khoti kuti ŵamupe cilango cikuruko. Iyo wakati, fundo yakuti Vahan wakakana kunjira usilikari cifukwa ca njuŵi yake pa nkhani ya cisopa “njambura kupulikikwa kweniso njakofya comene.” Ntheura, khoti la apilu likapeleka nadi ceruzgo mwakukolerana na pempho ilo mwimiliri wa boma uyu wakakhumbanga. Ntheura Vahan ŵakamusazgirakoso vyaka viŵiri na hafu.

Vahan wakacita apilu ku khoti likuru la Armenia pa ivyo khoti la apilu likadumura. Mu Janyuwale, 2003, Khoti Likuru likakolerana na ivyo khoti la apilu likadumura. Ntheura, mwaluŵiro Vahan ŵakamujalira kuti wambe kuseŵeza jele pamoza na vigeŵenga, ŵanthu awo ŵakaguliskanga munkhwala wambura kuzomerezgeka, na ŵanthu awo ŵakaŵa na milandu ya kukolelera.

Kufuma mu 2001, Armenia nchimoza mwa vyaru ivyo vili mu wupu wakucemeka kuti Council of Europe. Ntheura, ŵanthu wa ku Armenia ŵali na wanangwa wakucita apilu ku European Court of Human Rights (ECHR) para ŵayezga nthowa zose ndipo ŵatondeka kusanga urunji. Ivi ndivyo Vahan wakasankha kucita. Wakapempha kuti mwakuyana na Dango la nambara 9 la European Convention on Human Rights, wanangwa wake pa nkhani ya kukana kunjira usilikari cifukwa ca njuŵi yake uli kupokeka ntheura ukwenera kuvikilirika. Palije munthu uyo wakadandawurapo nthena uyo vikamwenderapo makora.

Pa Okutobala 27, 2009, Khoti la ECHR, likapeleka ceruzgo cake. Khoti ili likati Dango la nambara 9 la European Convention likuvikilira yayi wanangwa wa ŵanthu awo ŵakukana kunjira usilikari cifukwa ca njuŵi.

Apo ivi vikacitikanga, Vahan wakaŵa kuti wafumiskika kale mu jele, watora ndipo wali na mwana msepuka. Vahan wakakhuŵara na ivyo khoti ili likadumura. Ntheura, wakeneranga kusankhapo, kuyileka waka nkhani iyi, panji kucita apilu ku Grand Chamber ilo ni khoti likuru comene mu Europe. Vahan wakasankha kucita apilu. Pakuti khoti ili likuwona milandu bweka yayi, Vahan wakakondwa kupulika kuti lazomera kuwuwona mulandu wake.

Pa 7 Julayi, 2011, khoti ili likadumura mulandu uwu ku Strasbourg, France. Kuti mulandu uwu umare khoti likacita kuvota. Ŵeruzgi 16 ŵakati khoti la Armenia likananga kukaka Vahan Bayatyan apo wakakana kunjira usilikari cifukwa ca njuŵi, kweni mweruzgi yumoza pera wa ku Armenia, ndiyo wakasuskana nayo fundo iyi.

Cifukwa wuli ivyo khoti ili likadumura ni vyakuzirwa? Cifukwa aka kakaŵa kakwamba kuti khoti la ECHR lidumure kuti munthu wali na wanangwa wa kukana kunjira usilikari usange njuŵi yake yikumuzomerezga yayi mwakuyana na Dango la nambara 9. Ntheura khoti likuwona kuti nkhuswa wanangwa wa munthu mu caru ca demokilase usange ŵangamukaka cifukwa ca kukana kunjira usilikari cifukwa ca njuŵi.

Pakuyowoya za Ŵakaboni ŵa Yehova awo ŵakukana kunjira usilikari cifukwa ca njuŵi, Khoti ili likati: “Palije cifukwa cakuti khoti likayikire kuti Vahan Bayatyan wakakana kunjira usilikari cifukwa ca cigomezgo cake ico nchankhongono comene, ndipo cikukolerana yayi na nchito ya usilikari.”

Kwa vilimika 10 kumasinda uku, Ŵakaboni ŵa Yehova 450 ŵakakakikapo cifukwa ca kukana kunjira usilikari ku Armenia. Apo khoti likadumuranga ivi, Ŵakaboni ŵacinyamata 58 mu caru ici ŵakaŵa kuti ŵajalirika mu jele cifukwa ca kukana kunjira usilikari. Ŵanthu ŵanyake ŵankhondi ŵakakakika pamanyuma pakuti khoti ladumura kale nkhani ya Vahan Bayatyan wa ku Armenia. * Apo munyamata munyake uyo ŵakamupa mulandu cifukwa ca kukana kunjira usilikari cifukwa ca njuŵi wakapempha khoti kuti lijare mulandu wake, wakwimira boma pa milandu wakakana. Mwimiliri wa boma uyu wakalemba kuti: “Ivyo khoti la ku Europe likadumura pa mulandu wa Vahan Bayatyan, pa 7 Julayi 2011, vikuyana yayi na mulandu uwu.”

Cifukwa wuli wakwimira boma pa milandu wakacita nthena? Apo Vahan Bayatyan wakeruzgikanga, boma likaŵavya nchito yinyake yakuti limupe. Kufuma pa nyengo iyi, boma la Armenia lili kukhazikiska dango lakuti uyo wakana usilikari wangagwira nchito yinyake mu boma. Ndipouli, ŵanandi awo njuŵi zawo zikuŵakanira ŵakugwira yayi nchito izi cifukwa ŵasilikari ndiwo ŵakulaŵilira mulimo uwu.

Vahan Bayatyan ngwakukondwa comene cifukwa ca umo khoti likuru ili, lili kudumulira makora mulandu wake. Umo khoti likuru ili lili kudumulira mulandu uwu, cikung’anamura kuti caru ca Armenia cikwenera kuleka kuyuzga panji kukaka ŵanthu awo cifukwa ca vigomezgo vyawo vya cisopa ŵakukana kunjira usilikari.

Ni mulimo wa Ŵakaboni ŵa Yehova yayi kusintha malango gha kendeskero kavinthu mu caru. Ndipouli, nga umo wakacitira Vahan Bayatyan, iwo ŵakuvikilira wanangwa wawo mwakuyana na malango agho boma lili kukhazikiska mu caru ico ŵakukhala. Cifukwa wuli? Mwakuti ŵalutilire kukhala mwa mtende na kupulikira ivyo Mulongozgi wawo Yesu Khristu wakalangura.