Para ŵanthu ŵanyake ŵakumana na masuzgo ŵakughazerezga ndipo ŵakukhumba yayi kughanaghanirapo umo ŵangaghamazgira. Ŵakujipusika mwa kucita vinthu ivyo vingaŵapangiska kuti ŵaluweko masuzgo ghawo kwa kanyengo. Mwaciyelezgero, ŵanji ŵakumwa moŵa na cilato cakuti ŵaluweko masuzgo. Ndipo para ŵaloŵera ŵakuwona nga ŵasanga nthowa yakumazgira masuzgo. Kweni para nyengo yajumphapo, awo ŵakugomezga moŵa ŵakujipweteka ŵekha. Kasi ndimo vingaŵiraso na cipulikano?

Ŵanyake ŵakughanaghana kuti cipulikano nkhugomezgeramo bweka vinthu. Ŵakuti awo ŵali na cipulikano ŵakukhumba yayi kughanaghanirapo comene panji kuzomerezga ukaboni uwo ulipo kuti ŵasinthe vigomezgo vyawo. Ŵanthu awo ŵakughanaghana nthena, ŵakulongora kuti awo ŵali na cipulikano cankhongono ŵakuzelezgera dala unenesko.

Baibolo likuyowoya vinandi pa nkhani ya cipulikano. Kweni palije apo likuticiska kuti tigomezgerengemo bweka vinthu, nesi kuleka kughanaghanirapo comene pa ivyo tikugomezga. M’malo mwake, Baibolo likuti ŵanthu awo ŵakupulikana bweka vyose, mbazeleza. (Zintharika 14:15, 18) Ntheura, ungaŵa uzeleza nadi kugomezga waka fundo yiliyose kwambura kuyimanya makora. Kucita nthena kungayana waka na kupulikira munyithu uyo watiphalira kuti tidumure msewu wa magalimoto ghanandi uku tajara kumaso.

Baibolo likuticiskapo yayi kuti tigomezgenge waka cilicose, m’malo mwake likuticiska kuti tilutilire kuŵa maso mwauzimu kuti tileke kupusikika. (Mateyu 16:6) ‘Nkhongono yithu ya kughanaghana’ ndiyo yikutovwira kuti ticite nthena. (Ŵaroma 12:1) Baibolo likutisambizga kuti tisandenge makora nkhani yose na kusanga ukaboni waunenesko. Tiyeni tiwone ivyo Paulosi wakalemba pa nkhani iyi.

Apo Paulosi wakalemberanga Ŵakhristu wa ku Romu, wakakhumbanga yayi kuti ŵagomezge Ciuta cifukwa cakuti iyo waŵaphalira kucita nthena. M’malo mwake wakaŵaciska kuti ŵapenje ukaboni wakuti Ciuta waliko nadi. Iyo wakati: “Pakuti makhaliro ghake [Ciuta] ghambura kuwoneka ghakuwoneka makora comene kwamba pa kulenga caru kuya munthazi, cifukwa ghakumanyikwa kwizira mu vinthu vyakulengeka, ndiko kuti, nkhongono yake yamuyirayira na Uciuta wake, ntheura [awo ŵakukana muwuso wa Ciuta] ŵalije pakugwenthera.” (Ŵaroma 1:20) Paulosi wakayowoyaso fundo yakuyana waka apo wakalemberanga kalata Ŵahebere. Wakati: “Enya, nyumba yiliyose yikuzengeka na munthu, kweni uyo wakazenga vinthu vyose ni Ciuta.” (Ŵahebere 3:4) Mu kalata iyo wakalembera Ŵakhristu ŵa ku Tesalonika, Paulosi wakaŵaciska kuti ŵasandenge makora ivyo ŵakugomezga. Wakakhumbanga kuti ‘ŵasandenge vinthu vyose.’​—1 Ŵatesalonika 5:21.

Kugomezga visambizgo vya cisopa ivyo vilije ukaboni, kungayana waka na kugomezga cinthu ico cikuwoneka nga cingatovwira ico paumaliro cingatipuluska ndipo tingasangana na masuzgo. Pakuyowoya za ŵanthu ŵa visopa ŵa mu nyengo yake, Paulosi wakati: “Nkhuŵacitira ukaboni kuti ŵali na mwamphu pakuteŵetera Ciuta; kweni mwakuyana na kumanya makora cara.” (Ŵaroma 10:2) Ipo nchakuzirwa comene kupulikira ulongozgi wa Paulosi uwo wakalembera Ŵakhristu ŵa ku Roma. Wakalemba kuti: “Muzgoreke mwa kusintha maghanoghano ghinu, mwakuti mupime kwa mwaŵene ico nchiwemi na cakuzomerezgeka na khumbo lakufikapo la Ciuta.” (Ŵaroma 12:2) Usange tamumanya makora Ciuta, cipulikano cithu ciŵenge cinthu cakupusikizgirako waka yayi, kweni ciŵenge nga ‘nchiskango cikuru’ ico cingativikilira ku maghanoghano ghaheni na vinthu ivyo vingatipweteka mwauzimu.​—Ŵaefeso 6:16.