APO ROMAN wakaŵa wacali mucoko, mubwezi wake wakafwa galimoto yati yamuganda. Iyo wakati: “Nyifwa ya mubwezi wane yikanikhwaska comene. Nangauli pajumpha vyaka vinandi kufuma apo ngozi iyi yikacitikira, kweni nkhujifumba kuti kasi nchivici cikucitika para tafwa?”

Mwakawiro, munthu wakukhumba yayi kufwa, nanga wangacekura wuli. Ŵanandi ŵakopa ico cikucitika para munthu wafwa.

Ŵanandi ŵakugomezga kuti para munthu wafwa cinthu cinyake mu thupi lake cikulutilira kuŵa camoyo. Ŵakuti ŵanthu ŵawemi ŵakuluta kucanya kukapokera njombe, apo ŵaheni ŵakupika cilango camuyirayira pa viheni ivyo ŵakacita. Kweni ŵanyake ŵakughanaghana kuti para munthu wafwa wakuŵakoso yayi ndipo wakuluwikirathu.

Zgoro lakwamba likulongora kuti munthu wakufwa nadi yayi. Laciŵiri likulongora kuti umoyo ulije candulo. Awo ŵali na ghanoghano laciŵiri ili ŵakwendera waka fundo yakuti: “Tiyeni tirye na kumwa, cifukwa macero tifwenge.”​—1 Ŵakorinte 15:32.

Baibolo likusambizgapo yayi vyakuti para munthu wafwa cinthu cinyake mu thupi lake cikulutilira kuŵa camoyo. Ciuta wakaphalira Themba Solomoni kulemba kuti: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara.” (Mupharazgi 9:5.) Para munthu ‘wakumanya kanthu cara’ wangamanya yayi ivyo vikucitika. Wakupulika yayi panji kucita kalikose. Ntheura, ŵanthu ŵakufwa ŵangawovwira ŵamoyo panji kuŵapweteka yayi.

Mwakupambana na ivyo ŵanthu ŵakugomezga, ni khumbo la Ciuta yayi kuti taŵanthu tifwenge. Iyo wakalenga munthu wakwamba, Adamu kuti wakhalenge na umoyo kwamuyirayira pa caru capasi. Nyengo yakwamba iyo Ciuta wakazunura vya nyifwa, ni apo wakaphaliranga Adamu za cilango ico wazamupika para watondeka kupulikira. Ciuta wakakanizga Adamu kurya cipambi ca khuni linyake ndipo wakamucenjezga kuti para warya, ‘wafwenge nadi.’ (Genesis 2:17) Adamu na Eva ŵapulikirenge, mphanyi iwo pamoza na ŵana ŵawo ŵakugomezgeka ŵakakhala pa caru capasi kwamuyirayira.

Adamu ŵakasankha kuleka kupulikira cenjezgo la Ciuta. Ntheura wati watondeka kupulikira, wakananga ndipo wakafwa. (Ŵaroma 6:23) Palije cinthu mu thupi la Adamu ico cikalutilira kuŵa camoyo wati wafwa. M’malo mwake wati wafwa, Adamu kukaŵavya. Ciuta wakaphalira Adamu kuti: “Tiuryenge kurya thukuta pa cisko cako usuke uwelere ku fuvu, cifukwa ukatoleka mwenemumo; ndiwe fuvu, ndipo ku fuvu tiuwelereko.” (Genesis 3:19) Pakuti tose tili kufuma mwa Adamu, ntheura tili kuhara kwananga na nyifwa kufuma kwa iyo.​—Ŵaroma 5:12.

Nangauli Adamu wakasankha mwambura mahara, kweni Ciuta wazamufiska khumbo lake lakuti caru cizure na ŵanthu ŵakufikapo. (Genesis 1:28; Yesaya 55:11) Sonosono apa, Ciuta wazamuwuska ŵanthu ŵanandi awo ŵali kufwa. Pakuyowoya za ivyo vizamucitika pa nyengo iyo, mpositole Paulosi wakati: “Kuzamuŵa ciwuka ca ŵarunji na ŵambura urunji wuwo.”​—Milimo 24:15

Roman uyo wazunulika mu nkhani iyi, wakamba kusambira Baibolo ndipo wakamanya ivyo likusambizga pa nkhani ya nyifwa kweniso Yehova Ciuta. Ivyo wakasambira vikamovwira comene. Ŵazgani nkhani yake pa peji 11 mu magazini iyi.