Pambere wandababike mu Betelehemu, Yesu wakaŵa munthu wauzimu kucanya. Wakaŵa wakwamba kulengeka ndipo ndiyo pera uyo Ciuta wakamulenga mwakudunjika. Lekani wakucemeka kuti Mwana wapadera yekha wa Ciuta. Kanandi kucanya wakayowoyanga m’malo mwa Ciuta. Ndico cifukwa cake wakucemeka kuti Mazgu. Wakaŵaso movwiri wa Ciuta, ndipo nayo wakawovwira pakulenga vinthu vinyake vyose. (Yohane 1:2, 3, 14) Kwa vyaka vinandi, Yesu wakakhalanga na Ciuta kucanya pambere ŵanthu ŵandalengeke.—Ŵazgani Mika 5:2; Yohane 17:5.

Yehova wakagwiliskira nchito mzimu utuŵa, kusamuska umoyo wa Yesu kucanya na kuwuŵika mu nthumbo ya Mariya. Ntheura, Yesu wakaŵavya dada wa pa caru capasi. Ŵangelo ŵakapharazga za kubabika kwake ku ŵaliska awo ŵakalindanga viŵeto vyawo ku thengere usiku. (Luka 2:8-12) Ntheura, Yesu wakababika pa nyengo yakuzizima yayi, kweni ca m’ma Okutobala apo kukaŵa kucali kuthukira. Nyengo yikati yajumphapo, Mariya na Yosefe, ŵakasamira ku Nazarete uko Yesu ŵakakulira. Yosefe wakamupwelelera Yesu nga ni dada wakumulera.—Ŵazgani Mateyu 1:18-23.

Apo Yesu wakaŵa na vyaka 30, wakabapatizika, ndipo Ciuta wakapharazga pakweru kuti Yesu ni Mwana wake. Pamasinda, Yesu wakamba kucita mulimo uwo Ciuta wakamutuma.—Ŵazgani Mateyu 3:16, 17.

Ciuta wakatuma Yesu kuti wazakasambizge ŵanthu unenesko. Yesu wakasambizganga vya Ufumu wa Ciuta. Ufumu uwu ni boma lakucanya ilo lizamwiziska mtende pa caru capasi. Wakawovwiraso kuti ŵanthu ŵaŵe na cigomezgo ca umoyo wamuyirayira. (Yohane 4:14; 18:36, 37) Yesu wakasambizgaso ŵanthu vinthu vinandi pa umo ŵangaŵira na cimwemwe canadi. (Mateyu 5:3; 6:19-21) Wakaŵanga cakuwonerapo pa ivyo wakasambizganga. Mwaciyelezgero, wakalongora umo munthu wangacitira khumbo la Ciuta nanga mpha nyengo yakusuzga. Apo ŵanthu ŵakamucitiranga nkhaza, wakawezgeranga yayi.—Ŵazgani 1 Petrosi 2:21-24.

Yesu wakasambizgaso ŵalondezgi ŵake kuti ŵaŵenge na citemwa cakujipata. Nangauli kucanya wakaŵa pa malo ghapacanya na Awiske, kweni mwakujiyuyura wakiza pa caru na kuzakakhala na ŵanthu. Palije munthu uyo wangaŵa cakuwonerapo ciwemi pa nkhani ya citemwa kuluska Yesu.—Ŵazgani Yohane 15:12, 13; Ŵafilipi 2:5-8.

Cifukwa cinyake ico Ciuta wakatumira Yesu cikaŵa cakuti wazakafwire zakwananga zithu. (Yohane 3:16) Tose tili ŵakwananga, ico cikung’anamuraso kuti tili ŵambura kufikapo. Ndico cifukwa tikulwara na kufwa. Kweni munthu wakwamba Adamu, wakaŵa wakufikapo. Pakuti wakaŵavya kwananga, wakatenge wafwenge yayi nesi kulwara. Kweni cifukwa ca kuleka kupulikira Ciuta, wakaŵaso wakufikapo yayi. Ntheura tili kuhara kwananga kufuma kwa iyo pamoza na malipiro ghake agho ni nyifwa.—Ŵazgani Ŵaroma 5:12; 6:23.

Pakuti Yesu wakaŵa munthu wakufikapo, wakafwira zakwananga zake yayi, kweni zithu. Nyifwa ya Yesu yikupeleka mwaŵi wakuti tizakasange umoyo wamuyirayira kweniso kuti Ciuta wazakatitumbike.—Ŵazgani 1 Petrosi 3:18.