Nga umo Baibolo likuyowoyera, “cipulikano” nchigomezgo cakujintha pa ukaboni wanadi. Munthu uyo wali na cipulikano wakugomezga kuti Ciuta wazamufiska malayizgo ghake.

Mozesi wakaŵika cigomezgo cake cose pa malayizgo gha Ciuta. (Genesis 22:15-18) Nangauli wakaŵa na mwaŵi wakukhala umoyo wapacanya mu Eguputo, kweni wakawuleka, ndipo “wakasankha kuyuzgika pamoza na ŵanthu ŵa Ciuta, m’malo mwa vyakukondweska vya nyengo yicoko waka vya kwananga.” (Ŵahebere 11:25) Kasi wakasankha mwambura mahara mwakuti pamasinda wakadandawura? Yayi, cifukwa Baibolo likuti Mozesi “wakalutilira kuŵa wakukhora nga wakuwona Uyo ngwambura kuwoneka.” (Ŵahebere 11:27) Mozesi wakadandawurapo yayi cifukwa ca ivyo wakasankha pakuŵa na cigomezgo mu malayizgo gha Ciuta.

Mozesi wakakhumbanga kovwira ŵanji kuti ŵaŵe na cipulikano cakukhora mwa Ciuta. Mwaciyelezgero, ghanaghanirani ivyo vikacitika apo Ŵaisrayeli ŵakafyenyerezgeka pakati pa ŵasilikari ŵa Faro na Nyanja Yiswesi. Cifukwa ca kutenthema na soka ilo ŵakaghanaghananga kuti likaŵa pafupi kuŵawira, Ŵaisrayeli ŵakalilira kwa Yehova na Mozesi. Kasi Mozesi wakacita wuli?

Mutepanji Mozesi wakamanya yayi kuti Ciuta wakaŵa pafupi kugaŵa Nyanja Yiswesi kujura nthowa yakuti Ŵaisrayeli ŵacimbilire. Kweni Mozesi wakaŵa na cigomezgo kuti Ciuta wacitengepo kanthu kuti waponoske ŵanthu ŵake. Ndipo wakakhumbanga kuti Ŵaisrayeli ŵanyake nawo ŵaŵe na cigomezgo ici. Baibolo likuti: “Ndipo Mozesi wakati kwa iwo, ‘Mungopanga, milirani ndipera, muwone ciponosko ca Yehova ico wacilongore kwa imwe muhanya uno.’” (Exodus 14:13) Kasi Mozesi wakaŵawovwira nadi Ŵaisrayeli ŵanyake kuti ŵaŵe na cipulikano cakukhora? Enya, cifukwa pakuyowoya za Ŵaisrayeli kweniso Mozesi Baibolo likuti: “Na cipulikano, ŵakambuka Nyanja Yiswesi nga mpha caru cakomira.” (Ŵahebere 11:29) Cipulikano ca Mozesi cikawovwira iyo pera yayi, kweni wose awo ŵakasambirako kanthu kwa iyo.

Nase tingacita nga ni Mozesi para tikucita vinthu mwakukolerana na ivyo Ciuta walayizga. Mwaciyelezgero, Ciuta walayizga kuti watipenge vyakukhumbikwa pa umoyo para tikudangizga kumusopa. (Mateyu 6:33) Mbunenesko kuti nyengo zinyake vingatisuzga kuleka kutemwa vinthu vyakuthupi pakuti ŵanandi ndivyo ŵakutemwa mazuŵa ghano. Kweni para tikufwilirapo kuti tiŵe na umoyo wambura kukhumba vinandi mwakuti tisope Ciuta, tingaŵa na cigomezgo cose kuti Yehova watipenge vyakukhumbikwa pa umoyo. Yehova wakutisimikizgira kuti: “Nikulekenge cara napacoko nesi kukutaya mu nthowa yiliyose.”—Ŵahebere 13:5.

Nase tikuyezgayezga kovwira ŵanji kuti ŵaŵe na cipulikano cakukhora. Mwaciyelezgero, ŵapapi ŵavinjeru ŵakumanya kuti ŵali na mulimo ukuru wakovwira ŵana ŵawo kuti ŵaŵe na cipulikano cakukhora. Kufuma pa wanici, ŵana ŵakwenera kusambizgika kuti kuli Ciuta uyo wakutipa fundo izo zingatovwira kupambaniska pakati pa nchiwemi na ciheni. Ŵapapi ŵakweneraso kuwoneseska kuti ŵana ŵawo ŵakugomezga kuti vinthu viŵayenderenge makora usange ŵakulondezga malango gha Ciuta. (Yesaya 48:17, 18) Para ŵapapi ŵawovwira ŵana ŵawo kugomezga kuti Ciuta “waliko ndipo wakuŵa mupi wa njombe ku awo ŵakumupenja na mtima wose,” ndikuti ŵaŵapa cawanangwa capadera comene.—Ŵahebere 11:6.