Nkhababikira ku Santo Domingo, Dominican Republic ndipo ndine waumaliro pa ŵana ŵanayi. Ŵapapi ŵane ŵakaŵa ŵakusambira ndipo ŵakakhumbanga kuti tikure na umoyo uwemi kweniso ticezgenge na ŵanthu ŵankharo yiwemi na ŵakugomezgeka. Vilimika vinayi pambere nindababike, ŵapapi ŵane ŵakakumana na ŵamishonale ŵa Chalichi la Mormon. Ŵati ŵawona umo ŵawukirano aŵa ŵakavwaliranga makora, ŵapapi ŵane ŵakacontheka comene, ntheura ŵakaghanaghana kuti mbumba yithu yiŵe pa gulu la mbumba zakwamba kunjira Chalichi la Mormon pa cirwa ici.

Apo nkhakulanga nkhakondwanga comene na ivyo vikacitikanga ku chalichi ndipo nkhacindikanga comene umo Ŵamormon ŵakaŵikirangapo mtima pa umoyo wa mbumba kweniso nkharo ziwemi. Nkhanothanga kuti nili mu Chalichi la Mormon ndipo nkhakhumbanga kuŵa mishonale.

Apo nkhaŵa na vyaka 18, ŵapapi ŵane ŵakasamira ku America na cilato cakuti nkhalutizge masambiro ghane ku yunivesite. Zuŵa linyake anung’una ŵa amama na afumu ŵawo awo Mbakaboni ŵa Yehova, ŵakiza ku Florida kuzakatiwona. Wakaticemera ku ungano wa Ŵakaboni ŵa Yehova. Nkhacontheka comene kuwona kuti waliyose pa malo agho nkhakhala wakajuranga Baibolo lake na kulemba fundo. Ntheura, nane nkhapempha cakulembera na pepara na kwamba kucita nga ndiwo.

Ungano ukati wamara, amama ŵacoko na adada ŵakaniphalira kuti, pakuti nkhakhumbanga kuŵa mishonale, ŵakaŵa ŵakunozgeka kunovwira kuti nimanyeko vinthu vinyake mu Baibolo. Nkhawona kuti ici nchiwemi cifukwa pa nyengo iyi nkhamanyanga vinandi vya mu buku la Mormon kuluska Baibolo.

Nyengo zose apo tikadumbiskananga pa foni, amama ŵacoko na adada, ŵakaniciskanga kuti niyaniskenge vigomezgo vyane na ivyo Baibolo  likusambizga. Ŵakakhumbanga kuti nibowozge nekha unenesko.

Pakaŵa visambizgo vinandi vya Chalichi la Mormon ivyo nkhagomezganga, kweni nkhamanyanga makora yayi umo visambizgo ivyo vikakolerananga na Baibolo. Amama ŵacoko ŵakanitumizgira magazini ya Galamukani! ya Novembala 8, 1995, yakupharazgika na Ŵakaboni ŵa Yehova. Nkhani zinyake mu magazini iyi zikayowoyanga vya vigomezgo vya Ŵamormon. Nkhazizwa kuwona kuti visambizgo vinandi vya chalichi ili nkhavimanyanga yayi. Ici cikaniciska kuti nipenjerezge pa Webusayiti ya Ŵamormon kuti niwone usange ivyo vikayowoyeka mu Galamukani! vikaŵa nadi vyaunenesko. Nkhasanga nadi kuti mbunenesko ndipo ukaboni wakusazgikira nkhawusanga apo nkhaluta ku malo ghakusungirako vinthu vyakale ghakucemeka, Mormon museums ku Utah.

Pakwamba nkhaghanaghananga kuti Buku la Mormon na Baibolo vikayananga waka. Kweni apo nkhamba kuŵazga Baibolo na cilato cakuti nilipulikiske, nkhasanga kuti visambizgo vya chalichi la Mormon vikapambananga na fundo za mu Baibolo. Mwaciyelezgero Baibolo pa Ezekiel 18:4 likuti mzimu ukufwa. Kweni buku la Mormon pa Alma 42:9 likuti: “Mzimu ungafwa yayi.”

Nkhapulikiskangaso yayi visambizgo vya Ŵamormon pa nkhani yakusankhana mtundu. Mwaciyelezgero, Ŵamormon ŵakusambizga kuti munda wa Edeni ukaŵa ku Jackson County, Missouri, U.S.A. Kweniso ŵalongozgi ŵacisopa ŵakasambizganga kuti “Zuŵa linyake Ciuta wazamuwusa caru cose capasi kwizira mu boma la America.”

Nkhajifumbanga kuti ipo nchivici ico cizamucitikira caru ico nkhababikira kweniso vyaru vinyake? Zuŵa linyake namise munthu munyake wa Cimormon uyo wakasambiranga vya umishonale wati waniyimbira foni nkhamufumba nkhani iyi. Mwakudunjika nkhamufumba usange wakaŵa wakunozgeka kurwa nkhondo na ŵanthu ŵacisopa cake usange caru cake na cinyake vingaŵa pankhondo. Nkhazizwa kupulika kuti wakaŵa wakunozgeka. Nkhasanda makora visambizgo vya Cimormon kweniso nkhafumba ŵalongozgi Ŵacimormon. Ŵalongozgi aŵa ŵakaniphalira kuti mazgoro ghakaŵa ghakuti ningaghapulikiska yayi pa nyengo yimoza, kweni nighapulikiskenge apo ungweru ukuŵaliraŵalira.

Nkhati nakhuŵara na umo wakanizgolera nkhamba kujifumba cifukwa ico nkhakhumbiranga kuŵa mishonale wa chalichi la Mormon. Cifukwa cikuru ico nkhakhumbiranga kuŵa mishonale nchakuti novwire ŵanthu. Cifukwa cinyakeso nchakuti nkhakhumbanga kuti ŵanthu ŵanicindikenge. Kweni nkhamanyanga vinandi yayi vyakukhwaskana na Ciuta. Nangauli nkhaŵazganga Baibolo kanandi waka, kweni likaŵa lakuzirwa viŵi yayi kwa ine. Nkhamanyanga yayi khumbo la Ciuta kulazga ku caru capasi na ŵanthu.

Cifukwa ca kusambira Baibolo na Ŵakaboni ŵa Yehova, namanya vinandi. Mwaciyelezgero, namanya zina la Ciuta, ico cikucitika para munthu wafwa, na mulimo wa Yesu pakufiska khumbo la Ciuta. Pamasinda nkhamba kulizgoŵera Baibolo ndipo nkhakondwanga kuphalirako ŵanji ivyo nkhasambiranga. Nangauli nkhamanyanga kuti Ciuta waliko, kweni sono nkhuyowoya nayo mu lurombo ndipo nkhumuwona kuti ni Mubwezi wane wa pa mtima. Nkhabapatizika pa Julayi 12, 2004 kuŵa Kaboni wa Yehova, ndipo pati pajumpha myezi yinkhondi na umoza nkhamba uteŵeti wanyengozose.

Nateŵetera pa likuru la Ŵakaboni ŵa Yehova ku Brooklyn, New York kwa vilimika vinkhondi sono. Nawovwirapo pa mulimo wakung’anamura Mabaibolo na mabuku ghakulongosora Baibolo agho ghakovwira ŵanthu ŵanandi pa caru cose, ndipo nkhulutilira kovwira ŵanji kuti ŵamanye vyakukhwaskana na Ciuta.