Kasi Ciuta wakukhumba kuti ticiteci kuti timukondweske? Kasi wakukhumba kuti tilondezgenge waka malango ghanandinandi? Yayi. Mwakuyana na ivyo Mwana wa Ciuta Yesu Khristu wakayowoya, ivyo Ciuta wakukhumba tingaviyowoya waka mu lizgu limoza.—Ŵazgani Mariko 12:28-31.

Cakwamba, tiyeni tiwone umo vinthu vikaŵira apo Yesu wakayowoyanga mazgu agha. Wakasambizganga pa tempele pa Nisani 11, kwati kwakhala mazuŵa ghacoko waka kuti wakomeke. Ŵalwani ŵake ŵakamufumbanga mafumbo na cilato cakuti ŵamusange vifukwa. Kweni nyengo zose wakaŵazgoranga mwakuti ŵakasoŵanga cakuyowoya. Pamasinda munthu munyake wakafumba Yesu kuti: “Kasi dango lakwamba pa ghose ni ndi?”—Vesi 28.

Ili likaŵa fumbo lakusuzga comene. Ŵayuda ŵanji ŵakamba kudumbiskana kuti ŵamanye dango ilo ndikuru na lakuzirwa pa malango ghakujumpha 600 agho ghakaŵa mu Dango la Mozesi. Ŵanji ŵakaghanaghananga kuti malango ghose ngakuzirwa mwakuyana waka, ndipo ŵakatenge nkhwananga kughanaghana kuti ghanji ngakuzirwa kuluska ghanyake. Kasi Yesu wakazgora wuli?

Pakuzgora, Yesu wakazunura dango limoza yayi kweni ghaŵiri. Pakwamba wakati: “Utemwenge Yehova Ciuta wako na mtima wako wose na umoyo wako wose na maghanoghano ghako ghose na nkhongono zako zose.” (Vesi 30; Duteronome 6:5) Mazgu ghakuti “mtima,” “maghanoghano,” “umoyo,” na “nkhongono” ng’anamuro lake likupambana viŵi yayi. * Fundo njakuti: Tikwenera kutemwa Yehova na wunthu withu wose, na vyose ivyo tili navyo. Buku linyake lakulongosora Baibolo likati: “Ciuta tikwenera kumutemwa comene nkhanira.” Usange mukutemwa Ciuta, zuŵa lililose mufwilirengepo kucita vinthu ivyo vikumukondweska.—1 Yohane 5:3.

Kaciŵiri, Yesu wakati: “Utemwenge mzengezgani wako umo ukujitemwera wamwene.” (Vesi 31; Leviticus 19:18) Pali kukolera comene pakati pa kutemwa Ciuta na kutemwa mzengezgani. Para munthu wakumutemwa Ciuta mbwenu watemwengeso mzengezgani wake. (1 Yohane 4:20, 21) Usange tikutemwa ŵazengezgani ŵithu nga umo tikujitemwera tekha, mbwenu tiŵacitirenge nga umo ise tingakhumbira kuti nawo wacitirenge kwa ise. (Mateyu 7:12) Para tikucita nthena, tilongorenge kuti tikutemwa Ciuta uyo wakalenga ise na ŵazengezgani ŵithu mu cikozgo cake.—Genesis 1:26.

Kasi dango lakuti titemwenge Ciuta na mzengezgani withu ndakuzirwa wuli? Yesu wakati: “Palije dango linyake likuru kuluska agha.” (Vesi 31) Pa nkhani yakuyanako waka, Yesu wakati malango ghanyake ghose ghakujintha pa malango ghaŵiri agha.—Mateyu 22:40.

Kukondweska Ciuta kukukhumba vinandi yayi. Ivyo wakukhumba tingaviyowoya mu lizgu limoza ilo nchitemwa. Vizamusinthapo yayi, nyengo zose Ciuta wakukhumba kuti ŵateŵeti ŵake ŵamutemwenge. Citemwa ni nkhani yakuyowoya waka pa mulomo yayi, kweni vyakucita ndivyo vikulongora. (1 Yohane 3:18) Mphanyi mwasambira umo mungacitira kuti mulongore kuti mukutemwa Yehova, Ciuta uyo “nchitemwa.”—1 Yohane 4:8.