KASI Yesu wakaŵa nadi na umoyo wacandulo? Yesu wakakulira ku malo ghapacanya yayi, nakuti wakaŵavya vinthu vinandi. Yesu wakaŵavya nanga ni “malo ghakugonekapo mutu wake.” (Luka 9:57, 58) Kweniso ŵanthu ŵakamutinkhanga, kumusesa, ndipo paumaliro ŵakamukoma.

Panji mungajifumba kuti, ‘Kasi umoyo wanthena uwu ungaŵa wuli wacandulo?’ Kweni pali vinandi vyakukhwaskana na umoyo wa Yesu ivyo tikwenera kughanaghanira. Tiyeni tisande vigaŵa vinayi vya umoyo wake.

“Cakurya cane nchakuti nicite khumbo la uyo wakanituma na kufiska mulimo wake.”—Yohane 4:34.

Kwizira mu mazgu na vyakucita, Yesu wakalongora kuti wakukhumba kucita khumbo la Ŵadada ŵake ŵakucanya Yehova. * Yesu wakakondwanga comene pakucita khumbo la Ciuta. Wakayaniska kucita khumbo la Ciuta na cakurya nga umo tawonera mu lemba pacanya apa. Wonani umo vinthu vikaŵira apo wakayaniska cakurya na kucita khumbo la Ciuta.

Apo Yesu wakayowoya mazgu agha, nyengo yikaŵa pafupi kukwana 12 koloko. (Yohane 4:6) Wakaŵa kuti wenda kujumpha mu mapiri gha ku Samariya mulenji wose, ntheura njara yikwenera kuti yikamukora. Nakuti ŵasambiri wake ŵakamuciskanga kuti: “Rabi, lyaninge.” (Yohane 4:31) Ivyo Yesu wakazgora vikulongora kuti wakaŵanga wakukhorwa kweniso wakakhozgekanga para wakucita mulimo wa Ciuta. Kasi ivi vikulongora yayi kuti umoyo wa Yesu ukaŵa wacandulo?

“Nkhutemwa Ŵadada.”—Yohane 14:31.

Yesu wakaŵa paubwezi wapadera comene na Ŵadada ŵake ŵakucanya. Ntheura wakaciskika kuti wamanyiske ŵanji zina lawo, mikhaliro, na khumbo lawo. Kwizira mu mazgu ghake, vyakucita kweniso umo wakawoneranga vinthu, Yesu wakalongora makora comene mikhaliro ya Ŵadada ŵake. Ntheura para tikuŵazga vya Yesu vikuŵa nga kuti tikuŵazga vyakukhwaskana na Ŵawiske. Lekani apo Filipu wakafumba Yesu kuti, “Tilongorani Ŵawiskemwe, Yesu wakazgora kuti: “Uyo wawona ine wawona na Ŵadada wuwo.”—Yohane 14:8, 9.

Yesu wakaŵatemwanga comene Ŵadada ŵake mwakuti wakapulikira mpaka nyifwa. (Ŵafilipi 2:7, 8; 1 Yohane 5:3) Citemwa ico Yesu wakaŵa naco pa Ciuta cikawovwira kuti umoyo wake uŵe wacandulo.

“Palije munthu wali na citemwa cikuru kuluska ici, cakuti yunji wapeleke umoyo wake cifukwa ca ŵabwezi ŵake.”—Yohane 15:13.

Pakuŵa ŵanthu ŵambura kufikapo, tikaŵavya cigomezgo cilicose ca munthazi. Baibolo likuti: “Kwizira mwa munthu yumoza [Adamu] kwananga kukanjira mu caru ndipo nyifwa kwizira mu kwananga, ntheura nyifwa yikathandazgikira ku ŵanthu wose cifukwa wose ŵakananga.” (Ŵaroma 5:12) Tingagwentha yayi nyifwa iyo yili kwiza cifukwa ca kwananga.—Ŵaroma 6:23.

Mwamwaŵi Yehova wakapeleka nthowa yakumazgira masuzgo agho ŵanthu ŵakukumana nagho. Wakazomerezga kuti Mwana wake wakufikapo [Yesu] wasuzgike na kufwa mwakuti wawombore ŵanthu ku kwananga na nyifwa. Cifukwa cakuti wakatemwanga Ciuta kweniso ŵanthu, Yesu wakazomera kupeleka umoyo wake ŵakufikapo. (Ŵaroma 5:6-8) Citemwa cakujipata ici cikamovwira kuti waŵe na umoyo wacandulo. *

“Uyu ni Mwana wane, wakutemweka, mweneuyo nkhukondwa nayo.”—Mateyu 3:17.

Yehova wakayowoya mazgu agha kufuma kucanya apo Yesu wakabapatizikanga. Ntheura, Yehova wakalongora kuti wakamutemwanga comene Mwana wake Yesu. Lekani Yesu wakayowoya kuti: “Ŵadada ŵakunitemwa.” (Yohane 10:17) Pakuti wakamanyanga kuti Ŵawiske ŵakumutemwa kweniso ŵakukondwa, Yesu wakaŵa na cikanga pakuzizipizga nthambuzgo. Wakalutilira kucita mwamahara nanga mphanyengo iyo wakaŵa pafupi kukomeka. (Yohane 10:18) Yesu wakwenera kuti wakawonanga kuti umoyo wake ngwacandulo comene pakumanya kuti Ŵawiske ŵakamutemwanga.

Umoyo wa Yesu ukaŵa nadi wacandulo comene. Tingasambirako vinandi kwa iyo pa umo tingacitira kuti tiŵe na umoyo wacandulo. Mu nkhani yakulondezgapo tiwonenge ulongozgi wakupulikikwa makora uwo Yesu wakaphalira ŵasambiri ŵake pa umo ŵangakhalira makora.