Mwanakazi munyake uyo cikamuŵira cakusuzga kugomezga kuti Yehova wangamupwelelera wakati: “Maghanoghano ghakuti ndine wawakawaka ndico nchinthu cikuru ico cikunitondeska kuti niŵe paubwezi na Ciuta, ntheura nkhuyezgayezga kuti nimarane nagho.” Kasi namwe ndimo mukughanaghanira? Usange ni nthena, panji mungajifumba kuti, ‘Kasi Yehova wakupwelelera ŵateŵeti ŵake waliyose payekha?’ Enya. Ukaboni wa fundo iyi tikuwusanga mu ivyo Yesu wakayowoya.—Ŵazgani Yohane 6:44.

Kasi Yesu uyo wakumumanya makora Yehova kweniso khumbo lake wakayowoyaci? (Luka 10:22) Iyo wakati: “Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.” Ici cikulongora kuti vingacitika yayi kuti tiŵe ŵalondezgi ŵa Yesu na ŵateŵeti ŵa Yehova, kwambura kuti Yehova iyomwene watiguza. (2 Ŵatesalonika 2:13) Para tingamanya ivyo Yesu wakang’anamuranga, tiwonenge ukaboni wankhongono wakuti Ciuta wakutipwelelera.

Kasi mazgu ghakuti Yehova watiguza ghakung’anamuraci? Lizgu la Cigiriki ilo lang’anamurika kuti “kuguza” likugwiraso nchito pa kuguza mkwawu wa somba. (Yohane 21:6, 11) Kasi Yehova wakuticicizga kuti timuteŵetere? Yayi. Yehova wali kutipa wanangwa wa kusankha, ntheura wakuticicizga yayi. (Duteronome 30:19, 20) Yehova wakusanda mitima ya ŵanthu ŵanandi mu caru ici kuti wawone awo ŵakumupenja. (1 Midauko 28:9) Para waŵasanga ŵanthu ŵanthena, wakuŵawovwira mwacitemwa. Wakuŵawovwira wuli?

Yehova wakuguza munthu uyo wali na “maghanoghano ghakwenelera.” (Milimo 13:48) Ndipo wakucita nthena munthowa ziŵiri. Wakutiguza kwizira mu uthenga wa mu Baibolo wa makani ghawemi agho ghakufika waliyose payekha kweniso kwizira mu mzimu wake utuŵa. Usange Yehova wawona kuti munthu wazomera unenesko wa mu Baibolo, wakugwiliskira nchito mzimu wake kuti wamovwire kupulikiska na kulondezga ivyo Baibolo likusambizga. (1 Ŵakorinte 2:11, 12) Kwambura wovwiri wa Ciuta, vingacitika yayi kuŵa ŵalondezgi ŵa Yesu panji kusopa Yehova mwakugomezgeka.

Ipo kasi mazgu gha Yesu gha pa Yohane 6:44 ghakutisambizgaci za Yehova? Yehova wakuguza ŵanthu cifukwa cakuti wawonamo viwemi ndipo wakuŵapwelelera waliyose payekha. Mwaciyelezgero, mwanakazi uyo wazunulika kukwambilira kwa nkhani iyi wakakhozgeka cifukwa ca kupulikiska unenesko uwu. Iyo wakati: “Nchinthu capadera comene kuŵa muteŵeti wa Yehova. Ndipo usange Yehova wasankha kuti niŵe muteŵeti wake, ipo nkhwenera kuti ndine wakuzirwa kwa iyo.” Imwe ke? Apo mwamanya kuti Yehova wakupwelelera muteŵeti wake waliyose payekha, kasi namwe mukukhuŵilizgika yayi kusendelera kwa iyo?