Kasi Yehova wakutipwelelera nadi, panji vikumukhwaska yayi vya masuzgo gha ŵanthu pano pa caru capasi? Ivyo Baibolo likuyowoya pa nkhani iyi ni vyakupembuzga. Ciuta wakutipwelelera nadi ndipo wakukhumba kuti tikondwenge na umoyo. Zuŵa lililose wakukhumba kuti ŵanthu wose ŵasangenge candulo na uwemi wake. Wonani mazgu agho Paulosi wakayowoya.—Ŵazgani Milimo 14:16, 17.

Pakuyowoya ku ŵanthu ŵambura kusopa Ciuta ŵa mu msumba wa Lisitira, Paulosi wakati: “Mu miwiro iyo yajumpha, [Ciuta] wakalekelera mitundu yose kwenda mu nthowa zawo, nangauli kuti wakajisida wambura ukaboni cara, mu fundo yakuti wakacita uwemi, kumupani vula kufuma kucanya na nyengo za vipambi, kuzuzga mitima yinu mwakuzara na vyakurya ndiposo kukondwa.” Kasi fundo ya mazgu agha yikaŵa yakuti wuli?

Cikaŵa cakusuzga yayi kuti ŵanthu ŵa ku Lisitira ŵapulikiske mazgu gha Paulosi. Cifukwa mu msumba uwu ŵanthu ŵakaŵa ŵalimi, dongo likaŵa lavundira ndipo vula yikawanga makora. Kweni nga umo Paulosi wakaŵakumbuskira, Ciuta ndiyo ni Mupi wa vula na nyengo za vipambi. Ntheura, fundo yikaŵa yakuti nyengo zose para ŵavuna vinandi ndipo ŵakukondwa na cakurya cakunowa, cikaŵa cifukwa ca uwemi wa Ciuta.

Mazgu agho Paulosi wakayowoya ku ŵanthu ŵa ku Lisitira ghakutisambizga vinthu vinandi vyakuzirwa vyakukhwaskana na Yehova Ciuta.

Yehova wakutipa wanangwa wa kusankha. Wonani kuti Yehova wakazomerezga ŵanthu ŵa mitundu yose “kwenda mu nthowa zawo.” Buku linyake likayowoya kuti mazgu agha ghangang’anamura “kucita vinthu umo ŵakhumbira” panji “kucita ivyo ŵeneko ŵakuwona kuti ni viwemi.” Yehova wakucicizga munthu yayi kuti wamusopenge. Iyo wali kutipa wanangwa wakuti tisankhe tekha ivyo tikukhumba kucita na umoyo withu.—Duteronome 30:19.

Yehova wakukhumba kuti timumanye. Paulosi wakati: “[Ciuta] wakajisida wambura ukaboni cara.” Buku ilo lazunulika pacanya apa likuti mazgu agha ghangang’anamura kuti “Waŵalongora makora ŵanthu umo iyo waliri.” Cilengiwa ca Ciuta cikuvumbura makora comene “makhaliro ghake ghambura kuwoneka” nga ni uwemi wake, vinjeru vyake, nkhongono na citemwa cake. (Ŵaroma 1:20) Yehova wavumbura vinandi vyakukhwaskana na iyo mu Baibolo. (2 Timote 3:16, 17) Asi fundo iyi yikulongora kuti iyo wakukhumba kuti timumanye?

Yehova wakukhumba kuti tikondwenge. Paulosi wakati Ciuta wakuzuzga ‘mitima yithu mwakuzara na vyakurya ndiposo kukondwa.’ Nanga ni munthu wakwananga uyo wakumumanya yayi Ciuta wangarya cakurya umo wakhumbira na kukondwa na umoyo. Ndipouli, Ciuta wakukhumba kuti tiŵe na cimwemwe kwamuyirayira. Ivi vingacitika pekha para tikusambira unenesko wakukhwaskana na iyo na kulondezga ivyo tasambira.—Salmo 144:15; Mateyu 5:3.

Tose tikusanga candulo na uwemi wa Yehova zuŵa lililose. Mphanyi mwasambira vinandi vyakukhwaskana na umo mungalongolera kuwonga kwa Ciuta uyo wakuzuzga mitima yinu “mwakuzara na vyakurya ndiposo kukondwa.”