Nkhakulira mu tawuni yicoko ya Warialda mu caru ca New South Wales. Mu tawuni iyi ŵanthu ŵakutemwa kulima kweniso kuŵeta viŵeto vyakupambanapambana. Tawuni iyi njakutowa kweniso vivulupi ni viŵi yayi.

Pakuti ine ndine nkhaŵa mulara pa ŵana 10 ŵa mu nyumba yithu, apo nkhaŵa na vilimika 13 nkhaleka sukulu na kwamba kugwira nchito kuti novwirenge mbumba yakwithu. Nkhagwiranga nchito ku mafamu, cifukwa masambiro ghane ghakaŵa ghacoko. Apo nkhaŵa na vilimika 15, ŵakanipa mulimo wa kuŵeta mahaci.

Likaŵa thumbiko lapadera kugwira nchito mu mafamu. Nkhakondwanga nawo mulimo uwu kweniso malo. Usiku nkhawothanga moto na kulaŵiska mwezi na nyenyezi kucanya uku nkhupulika kasungu kawemi kufuma mu makuni. Nkhukumbuka kuti panyengo iyi nkhaghanaghananga kuti pakwenera kuti pali yunji uyo wakalenga vinthu vyakuzizwiska ivi. Ndipouli, ku malo agha nkhasambirakoso nkharo ziheni. Kanandi ŵanthu ŵakatukananga kweniso kukhweŵa ndipo cikaŵa cipusu kuti nane nambe kucitako vinthu ivi. Ntheura, pakajumpha nyengo yitali yayi, nkhamba kukhweŵa na kutuka.

Apo nkhaŵa na vilimika 18, nkhasamukira ku Sydney. Nkhakhumbanga kunjira usilikari kweni ŵakanikanira cifukwa nkhaluta patali yayi na masambiro. Nkhasanga nchito yinyake ndipo nkhakhalako kwa caka cimoza. Pa nyengo iyi ndipo nkhakumana na Ŵakaboni ŵa Yehova kakwamba. Ŵakanicemera ku maungano ghawo ndipo nakalinga nkhawona kuti visambizgo vyawo ni vyaunenesko.

Ndipouli, pakajumpha nyengo yitali yayi nkhaweleraso ku mafamu. Paumaliro nkhaluta mu msumba wa Goondiwindi  ku Queensland. Nkhasanga nchito, na kutora mwanakazi, kweni cacitima nchakuti nkhambaso kumwa moŵa.

Mu mbumba yithu tikaŵa na ŵana ŵaŵiri ŵanyamata. Ŵakati ŵababika, nkhamba kughanaghanirapo comene uko umoyo wane ukalazganga. Nkhakumbukira ivyo nkhapulika pa ungano wa Ŵakaboni ŵa Yehova ku Sydney, ndipo nkhawona kuti nkhwenera kucitapo kanthu.

Nkhasanga magazini yakale ya Gongwe la Mulinda, umo mukaŵa adiresi ya ofesi ya munthavi ya Ŵakaboni ŵa Yehova ku Australia. Ntheura nkhalemba kalata na kupempha wovwiri. Ŵakanizgora apo Kaboni munyake wakiza pa nyumba yane ndipo pamasinda wakamba kusambira nane Baibolo.

Apo nkhasambiranga Baibolo, nkhawona kuti pakaŵa vinandi ivyo nkhakhumbikwiranga kusintha. Lemba ilo likanicontha comene ni 2 Ŵakorinte 7:1. Lemba ili likuticiska kuti tikwenera kujitozga “ku ukazuzi wose wa thupi.”

Nkhaghanaghananga kuti panji nilekenge kukhweŵa na uloŵevu. Kweni cikaŵa cipusu yayi kuti nileke vinthu ivi cifukwa nkhavicita kwa nyengo yitali. Ndipouli nkhakhumbisiska kuti nikondweskenge Ciuta. Ico cikanovwira comene ni ulongozgi wa pa Ŵaroma 12:2. Apo pakuti: “Lekani kulinganizgika na mgonezi uno, kweni muzgoreke mwa kusintha maghanoghano ghinu.” Kuti nileke nkharo zane ziheni, nkhamanya kuti nkheneranga kusintha maghanoghano ghane na kwamba kuwona vinthu umo Ciuta wakuviwonera. Ciuta wakanovwira kuti nileke kukhweŵa na kumwa comene moŵa.

Kweni kutuka ndiko kukanisuzga comene kuti nileke. Nkhawumanyanga makora ulongozgi uwo uli pa Ŵaefeso 4:29, uwo ukuti: “Kayowoyero kakuvunda kangafumanga cara mu mulomo winu.” Nangauli vikaŵa nthena, kweni nkhaleka luŵiro yayi kutuka. Ico cikanovwiraso nkhughanaghanirapo lemba la Yesaya 40:26. Pakuyowoya za nyenyezi za kucanya lemba ili likuti: “Tumphuskirani kucanya maso ghinu, muwone: kasi uyo wakavilenga vyose ivi ndi njani? Uyo wakufumya ciwuru ca ivyo na kuvipenda, kuvicema vyose na mazina mu ukuru wa nkhongono zake, ndipo cifukwa Iye ngwakukhora mu nkhongono kulije cimoza cakuzgeŵa.” Nkhawona kuti usange Ciuta wali na nkhongono za kulenga vinthu vyose ivi, ipo wanganovwira kusintha nkharo yane kuti nimukondweske. Nkhati nafwilirapo kulomba, pacoko na pacoko nkhamba kujikora pakuyowoya.

Pakuti nkhaŵa muliska wa viŵeto nkhaŵavya mpata wakucezga na ŵanthu, cifukwa mu mafamu mukaŵanga ŵanthu ŵacoko. Ndipouli, sukulu iyo Ŵakaboni ŵa Yehova ŵakucita pa maungano ghawo, yanovwira umo ningayowoyera. Sukulu iyi yanovwiraso kuti niphalirengeko ŵanji makani ghawemi gha Ufumu wa Ciuta.—Mateyu 6:9, 10; 24:14.

Naŵa mulara mu mpingo kwa vilimika vinandi. Nkhuwona kuti ni mwaŵi ukuru comene kucita vyose ivyo ningafiska kuti novwire Ŵakhristu ŵanyane. Kweni thumbiko likuru comene ndakuti ine, muwoli wane pamoza na ŵana ŵithu tikukolerana pakuteŵetera Yehova.

Nkhuwonga Yehova cifukwa ca kunipokelera kuti wanisambizge nangauli nindasambire comene. (Yesaya 54:13) Nkhuwona kuti fundo ya pa Zintharika 10:22 njaunenesko. Lemba ili likuti: “Thumbiko la Yehova likusambazga, ndipo kuti wakusazgako citima cara.” Ine na mbumba yane tikulindilira kuti tisambire vinandi vyakukhwaskana na Yehova na kumuteŵetera kwamuyirayira.