Ulongozgi wa mu Baibolo ngwakovwira comene kuti mbumba ziŵe zakukondwa, cifukwa ngwakufuma kwa Yehova Ciuta uyo wakambiska nthengwa. Baibolo likutisambizga kuti tikwenera kuŵa na nkharo izo zingawovwira kuti mbumba ziŵe zakukondwa kweniso likuticenjezga za vinthu ivyo vingananga mbumba. Likutovwiraso kuti tiyowoyeskanenge makora mu mbumba, ico cikovwira kuti mbumba yithu yiŵe yakukondwa.—Ŵazgani Ŵakolose 3:8-10, 12-14.

Mfumu na muwoli ŵakwenera kucindikana. Usange waliyose wakucita mulimo wake mu mbumba, mbwenu ŵaŵenge ŵakukondwa.—Ŵazgani Ŵakolose 3:18, 19.

Para ŵakutorana ŵakutemwana, nthengwa yawo yingakhala kwa nyengo yitali. Ciuta wakutisambizga umo tingacitira kuti titemwanenge. Iyo na Mwana wake Yesu Khristu, ŵakalongora citemwa cakujipata ndipo nase tingasambirako kwa iwo.—Ŵazgani 1 Yohane 4:7, 8, 19.

Usange mfumu na muwoli ŵakucindika nthengwa iyo Ciuta wakambiska, mbwenu nthengwa yawo yikhorenge. Ciuta wakambiska nthengwa mwakuti para ŵanthu ŵatorana ŵangalekananga yayi. Nthengwa zingakhora cifukwa Ciuta wali kulenga mwanalume na mwanakazi kuti ŵawovwiranenge. Nakuti wakaŵalenga mu cikozgo cake ntheura nawo ŵangatemwana.—Ŵazgani Genesis 1:27; 2:18, 24.