Kasi wuli kukwenyelerapo comene mpaka kulira?— * Mutepanji tose vili kuticitikirapo. Nyengo zinyake tingalira cifukwa ca citima. Munthu munyake wangatiyowoyera vinthu viheni ivyo ni vyautesi. Tingakwenyelera, asi nthe?— Ndimo viliriso na Ciuta. Nayo wakukwenyelera para ŵanji ŵakumuyowoyera mautesi. Tiye tiwone umo vingacitikira kweniso ivyo tingacita kuti timukondweske Ciuta.

Baibolo likuti ŵanthu ŵanji awo ŵakatenge ŵakumutemwa Ciuta, ‘ŵakamukwenyelezganga.’ Enya, ‘ŵakamutopokeska moyo’ Ciuta. Mbunenesko kuti palije munthu uyo wangamupweteka Ciuta. Iyo ngwa nkhongonozose. Tiye tiwone cifukwa ico Yehova wakukwenyelelera para tatondeka kucita ivyo wakutiphalira kuti ticite.

Ŵanthu ŵaŵiri awo Yehova wakadankha kulenga, ŵakamukwenyerezga comene. Ŵanthu aŵa wakaŵaŵika mu Paradiso pa caru capasi mu “munda wa Edeni.” Kasi ukuŵamanya ŵanthu aŵa?— Waneneska, Adamu ndipo pamasinda Eva. Tiye tiwone ivyo ŵakacita ivyo vikamukwenyelezga Yehova.

Yehova wati waŵaŵika mu munda wa Edeni, wakaŵaphalira kuti ŵawupwelelerenge. Wakaŵaphaliraso kuti ŵababe ŵana na kukhala kwamuyirayira. Kweni apo Adamu na Eva ŵakaŵa kuti ŵandababe ŵana, pakacitika cinthu cinyake ciheni comene. Kasi ukumanya ico cikacitika?— Mungelo munyake wakapusika Eva ndipo pamasinda Adamu nayo wakagalukira Yehova. Tiye tiwone umo ivi vikacitikira.

Mungelo wakacitiska njoka kuŵa nga yikuyowoya. Eva wakakopeka na ivyo wakapulika apo njoka yikati waŵenge nga “ni Ciuta.” Ntheura wakacita ivyo  njoka yikamuphalira. Kasi ukumanya ivyo Eva wakacita?—

Eva wakarya vya mu khuni ilo Ciuta wakaphalira Adamu kuti ŵaleke kurya. Pambere Eva wandalengeke, Ciuta wakaphalira Adamu kuti: “Vya makuni ghose gha mu munda uryenge kwawanangwa; kweni vya khuni la kumanyiska uwemi na uheni ungaryanga, cifukwa mu zuŵa leneilo tiuryerengepo, tiufwenge nadi.”

Eva wakalimanyanga makora dango ili. Ndipouli, wakalutilira kulidodoliska khuni ili na kwamba kuliwona kuti ndakwenelera “kurya, na kuti ndiwemi mu maso . . . wakatorapo vipambi vyake, wakarya.” Pamasinda wakatora cipambi na kupako Adamu, ndipo nayo “wakarya.” Kasi ukughanaghana kuti Adamu wakacitiraci nthena?— Cikaŵa cifukwa cakuti Adamu wakamba kutemwa comene Eva kuluska Yehova. Wakasankha kukondweska Eva m’malo mwa Ciuta. Kweni kupulikira Yehova nkhwakuzirwa comene kuluska munthu waliyose.

Kasi wayikumbuka njoka yira yikayowoya na Eva? Nga umo munthu wangacitira kuti cidoli ciŵe nga cikuyowoya, ndimoso munthu munyake wakacitira kuti njoka yiŵe nga yikuyowoya. Kasi ghakaŵa mazgu gha njani agho ghakafumanga mu njoka?— Ghakaŵa mazgu gha “njoka ya papo kale, iyo yikucemeka Dyabulosi na Satana.”

Kasi ukumanya ivyo ungacita kuti ukondweske Yehova?— Ungakondweska Yehova para nyengo zose ukuyezgayezga kumupulikira. Satana wakuyowoya kuti wangapangiska waliyose kuti wacitenge ivyo iyo wakukhumba. Ntheura Yehova wakuticiska kuti: “Mwana wane, khala wavinjeru na kukondwereska mtima wane, mwakuti ndimuzgore uyu wandicenya.” Satana ndiyo wakucenya Yehova. Iyo wakuti wangapatuska waliyose kuti waleke kuteŵetera Yehova. Ipo kuti ukondweske Ciuta ukwenera kumupulikira na kumuteŵetera. Kasi ufwilirengepo kucita nthena?—