Kasi Yehova wakuŵikako mahara ku ivyo awo ŵakumusopa ŵakuyezgayezga kucita kuti ŵamukondweske? Ŵanji ŵangati yayi, cifukwa Ciuta walije nase nchito. Kweni uwu mbutesi, ndipo ukupangiska kuti ŵanthu ŵamuwonenge mwakubudika Ciuta. Baibolo likumulongosora makora comene. Likutisimikizgira kuti Yehova wakuwonga ivyo awo ŵakumusopa mwakugomezgeka ŵakucita. Wonani mazgu agho Paulosi wakalemba pa Ŵahebere 11:6.

Kasi nchivici ico cikukhumbikwa kuti tikondweske Yehova? Paulosi wakati: “Kwambura cipulikano nchambura macitiko kumukondweska [Ciuta].” Wonani kuti wakayowoyapo yayi kuti nchakusuzga kukondweska Ciuta kwambura cipulikano. Kweni wakati nchambura macitiko kumukondweska. Mwakudumura tingati, cipulikano ndico nchakuzirwa comene kuti timukondweske Ciuta.

Kasi tikwenera kuŵa na cipulikano wuli kuti tikondweske Yehova? Pali vinthu viŵiri ivyo vikukhumbikwa. Cakwamba, tikwenera “kugomezga kuti waliko.” Kasi tingamukondweska wuli Ciuta para tikukayikira kuti waliko? Nakuti kumanya waka kuti waliko nkhwakukwana yayi, cifukwa viŵanda navyo vikugomezga kuti Yehova waliko. (Yakobe 2:19) Para tikugomezga kuti Ciuta waliko, ticitenge mwakuyana na cigomezgo cithu. Panji kuti ticitenge vinthu ivyo vikumukondweska.—Yakobe 2:20, 26.

Caciŵiri, tikwenera “kugomezga kuti” Ciuta ni “mupi wa njombe.” Munthu uyo wali na cipulikano wakuwona kuti wakuphyoka pawaka yayi para wakucita vinthu vyakuti wakondweske Ciuta. (1 Ŵakorinte 15:58) Kasi tingamukondweska wuli Ciuta usange tikukayikira kuti wazamutipa njombe? (Yakobe 1:17; 1 Petrosi 5:7) Munthu uyo wakuti Ciuta ni mkaka, wakutipwelelera yayi, nesi kuŵikako mahara ku ivyo tikucita, ndikuti wakumumanya yayi Ciuta.

Kasi Yehova wakutumbika anjani? Paulosi wakati: “Awo ŵakumupenja na mtima wose.” Buku linyake lakulongosora Baibolo likuti mazgu gha Cigiriki ghakuti “kumupenja na mtima wose,” ghakung’anamura “kwenda ulendo na kukamupenja” yayi. Kweni ghakung’anamura “kumusopa.” Buku linyakeso likuti mazgu agha, ghangang’anamuraso kufwilirapo. Yehova wakutumbika awo ŵakumusopa na mtima wose, kulongora kuti ŵakumutemwa.—Mateyu 22:37.

Kasi Yehova wakuŵatumbika wuli awo ŵakumusopa mwakugomezgeka? Waŵalayizga kuti wazamuŵapa njombe yapadera comene iyo yikulongora kuti ngwakupa kweniso ngwacitemwa. Njombe iyi ni umoyo wamuyirayira pa caru capasi ca Paradiso. (Uvumbuzi 21:3, 4) Nanga ni sono nthena, Yehova wakuŵatumbika awo ŵakumupenja na mtima wose. Mzimu utuŵa na vinjeru ivyo vikusangika mu Mazgu ghake, vikuŵawovwira kuti ŵaŵe ŵakukondwa.—Salmo 144:15; Mateyu 5:3.

Yehova wakuwonga mulimo wa ŵanthu awo ŵakumusopa mwakujipeleka. Kasi fundo iyi yingamuciskani yayi kuti muŵe nayo paubwezi? Usange ni nthena, ipo sambirani vinandi kuti mumanye umo mungacitira kuti muŵe na cipulikano cakukhora mwakuti Yehova wazakamutumbikani.