Mu Disembala, ŵanthu ŵanandi ŵakuwona vithuzithuzi vyakulongora Yesu kuti ni bonda. Ŵakumulongora kuti wali mu cakulyeramo ng’ombe. Kweni kasi Yesu nyengo zose tikwenera kumuwona kuti ni bonda?— * Tiye tidumbiskane vinthu vyakuzirwa ivyo tikwenera kukumbuka vyakukhwaskana na Yesu. Tingamanya vinandi pa ivyo vikacitikira ŵaliska awo ŵakaŵa ku thengere usiku kufupi na Betelehemu.

Mwamabuci mungelo wakaŵawonekera. Ndipo wakaŵaphalira kuti: “Kwababika kwa imwe muhanya uno Mponoski, uyo ni Khristu Fumu.” Wakaŵaphaliraso kuti ŵamusanga Yesu “wavungilizgika mu salu ndipo wakugona mu cakulyeramo viŵeto.” Nyengo yeneyiyo, ŵangelo ŵanandi ŵakawoneka ndipo ŵakamba “kulumba Ciuta.”

Kasi iwe ungajipulika wuli para ungapulika ŵangelo ŵakulumba Ciuta?—Ŵaliska ŵakakondwa. Ndipo ŵakati: “Tiyeni sono nthena tilute mpaka ku Betelehemu na kuwona cinthu ici ico cacitika.” Ndipo ŵakati ŵafika ku Betelehemu ŵakasanga “Mariya kweniso Yosefe, ndiposo bonda wagona mu cakulyeramo viŵeto.”

Nyengo yicoko waka ŵanthu ŵanyakeso ŵakamba kwiza ku Betelehemu uko kukaŵa Mariya na Yosefe. Ŵaliska ŵakati ŵaŵaphalira ico cikacitika, wose ŵakakondwa. Kasi nawe wakondwa kuti wamanya vinthu ivi?— Tose ise tikutemwa Ciuta tikukondwa. Sono tiye tiwone cifukwa ico ŵanthu ŵakukondwera comene na kubabika kwa Yesu. Kweni pambere tindadumbiskane ivi, tiye tiwone dankha ivyo vikacitika apo Mariya wakaŵa kuti wandatengwe.

Zuŵa linyake mungelo wakucemeka Gabriyeli wakiza kwa Mariya. Wakamulayizga kuti waŵenge na mwana uyo “wazamuŵa mukuru ndipo wazamucemeka Mwana wa Wapacanya Nkhanira.” Mungelo wakatiso Mwana uyu “Wazamuwusa nga ni themba . . . ndipo ufumu wake uzamumara cara.”

Mariya wakafumba mungelo kuti wamanye umo ivi vizamucitikira, cifukwa wakaŵa kuti wandagonanepo na  mwanalume. Gabriyeli wakamuphalira kuti: “Nkhongono ya Wapacanya Nkhanira yikubenekelerenge, . . . ndipo uyo wababikenge wazamucemeka mutuŵa, Mwana wa Ciuta.” Ukaŵa munthondwe ukuru comene kutora umoyo wa Mwana wa Ciuta kucanya na kuwuŵika mu nthumbo ya Mariya.

Kasi uli kuviwonapo vithuzithuzi ivyo vikulongora “ŵakumanya vya nyenyezi” ŵatatu pamoza na ŵaliska ŵakuwona bonda?— Vithuzithuzi vyanthena ivi vikusangika comene pa nyengo ya Khisimasi. Kweni vithuzithuzi ivi ni vyaunenesko yayi. Nakuti “ŵakumanya vya nyenyezi” aŵa ŵakagomezganga mizimu, cinthu ico Ciuta wakutinkha. Tiye tiwone ico cikacitika ŵakumanya vya nyenyezi ŵakati ŵafika ku Betelehemu. Baibolo likuti: “Ŵakati ŵanjira mu nyumba ŵakawona mwana pamoza na Mariya nyina.” Ntheura, pa nyengo iyi Yesu wakaŵaso bonda uyo wakaŵa mu cakulyeramo viŵeto yayi. Kweni wakaŵa kuti wakurako ndipo wakakhalanga mu nyumba pamoza na awiske na anyina a Mariya.

Kasi ŵakumanya vya nyenyezi ŵakamusanga wuli Yesu?— Ŵakalongozgeka na “nyenyezi.” Kweni pakwamba nyenyezi iyi yikaŵalongozgera ku Betelehemu yayi, kweni kwa Themba Herode ku Yerusalemu. Baibolo likuti Herode wakakhumbanga kukoma Yesu. Sono ghanaghanira fundo iyi. Kasi ukughanaghana kuti ni njani uyo wakatuma nyenyezi iyi kuti yilongozgere ŵakumanya vya nyenyezi aŵa kwa Herode?— Wakaŵa Yehova Ciuta waunenesko yayi, kweni mulwani wake, Satana Dyabulosi.

Mazuŵa ghano, Satana wakuyezgayezga kubulumutizga ŵanthu kuti ŵawonenge Yesu nga nkhabonda kambura nkhongono. Kweni mungelo Gabriyeli wakaphalira Mariya kuti: “[Yesu] wazamuwusa nga ni themba . . . , ndipo ufumu wake uzamumara cara.” Pasono Yesu ni Themba kucanya, ndipo sonosono apa waparanyenge ŵalwani wose ŵa Ciuta. Ivi ndivyo tikwenera kumanya vyakukhwaskana na Yesu ndipo tikwenera kuphalirako ŵanji.