Baibolo likuti aloyi ni vinthu vyakununkhira ivyo ŵakafayiranga mu malaya panji pa bedi. (Salmo 45:8; Zintharika 7:17; Sumu ya Solomon 4:14) Aloyi uyo wakuzunulika mu Baibolo wakwenera kuti wakafumanga ku makuni ghanyake ghakununkhira ghakucemeka Agarwood. Para makuni agha ghamba kuvunda, ghakafumiskanga mafira ghakununkhira. Khuni ili ŵakalisiranga ndipo wufu wake ŵakaguliskanga. Wufu uwu ndiwo ukacemekanga kuti “aloyi.”

Baibolo likuyaniska mahema gha Israyeli na “makuni gha maluŵa ghakupandika na Yehova.” (Maŵazgo 24:5, 6) Khuni ili likukura mpaka mamita 30 ndipo likuthaza. Pasono khuni ili likusangika yayi ku Israyeli. Kweni buku linyake lakulongosora vya Baibolo likuti, ‘nangauli pasono khuni ili na ghanyake kulije ku malo agha, kweni palije cifukwa ca kususkira kuti ghakapandikanga mu Mlonga wa Yorodani.’

Dango la Ciuta likati vyose ivyo ŵapelekenge kuŵa sembe pa tempile vikeneranga kuŵa viwemi comene. Ciuta wakapokeleranga sembe zambura kalema pera. (Exodus 23:19; Leviticus 22:21-24) Munthu munyake wakati, ŵasembe ŵakawoneseskanga kuti ciŵeto ico cipelekekenge kuŵa sembe ‘cilije kalema kalikose’ kufuma ku “mutu mpaka ku malundi.”

Nkhwantha yinyake zina lake E. P. Sanders yikati, ŵanthu ŵakazomerezgekanga kuguliska pa tempile” viyuni na vinyama vyekha ivyo musofi waviwona kuti vilije kalema.” Para vyaŵa nthena, uyo wakaguliskanga wakeneranga kupeleka lisiti, lakulongora kuti ico waguliska cilije kalema.”

Mu 2011, ŵanthu ŵakufukura vinthu vyapasi wakasanga lisiti la nthena ili apo pakaŵa tempile. Lisiti ili likaŵa nga ni ndalama yanjawala ndipo likulongora kuti nda mu vyaka vyapakati pa 100 B.C.E. na 70 C.E. Pa lisiti ili pali kulembeka mazgu Ghaciaramu, agho ghakung’anamura kuti, “Nchakwenelera kupeleka kwa Ciuta.” Ŵanthu ŵakughanaghana kuti awo ŵakagwiranga nchito pa tempile ŵakabatikanga lisiti ili pa vinthu panji pa vinyama ivyo ŵanthu ŵakakhumbanga kupeleka sembe.