NKHANI YA PA CHIKOPI | NAMWE MUNGALIPULIKISKA BAIBOLO
Wovwiri Uwo Ulipo Kuti Mupulikiske Baibolo
Tiyelezgere kuti mwaluta ku charu chachilendo. Vyose ivyo mukuwona ni vyachilendo pera, ŵanthu, vyakuchita, vyakurya, na ndalama. Nyengo zinyake mungamba na kukwenyelera wuwo.
Ndimo vingaŵira para nkhakwamba kuŵazga Baibolo. Para mukuŵazga, mukupulika vinthu vyakale ivyo ni vyachilendo kwa imwe. Mukupulika vya ŵanthu ŵakuchemeka Ŵafilisiti, vyakuchita vya ŵanthu nga ‘nkhupalura vyakuvwara pakati,’ panji mukupulika vya chakurya chakuchemeka mana, kweniso ndalama yakuchemeka dirakima. (Ekisodo 16:31; Joshuwa 13:2; 2 Samuyeli 3:31; Luka 15:9) Vyose ivi vingaŵa vyakutimbanizga. Nga umo mungachitira para mwaluta ku charu chachilendo, kasi mungakondwa yayi usange munthu munyake wangamulongosolerani?
WOVWIRI UWO UKAŴAKO KALE
Baibolo likati lamba waka kulembeka m’ma 1500 B.C.E., Chiuta wakaŵawovwira ŵanthu kuti ŵalipulikiske. Mozesi wakaŵa mulongozgi wakwamba wa Israyeli, ndipo “wakamba kulongosora” ivyo vikalembeka.—Dotoronome 1:5.
Pakati pajumpha vyaka pafupifupi 1,000, pakaŵaso ŵasambizgi awo ŵakasambizganga ŵanthu Malemba. Mu 455 B.C.E., Ŵayuda ŵanandi, ŵalara na ŵana, ŵakawungana pa luŵaza mu msumba wa Yerusalemu. Pa ungano uwu, ŵasambizgi ŵara ‘ŵakaŵazga mwakukwezga mu buku lakupatulika.’ Kweni ŵakaŵazga waka yayi. “Ŵakawovwira ŵanthu kupulikiska ivyo vikaŵazgikanga.”—Nehemiya 8:1-8.
Pakati pajumpha vyaka 500, Yesu Khristu nayo wakachita ntchito iyi yakusambizga ŵanthu. Nakuti ŵanthu ŵakamumanyanga kuti ni msambizgi. (Yohane 13:13) Wakasambizganga pa mzinda, kweniso munthu waliyose payekha. Ulendo unyake wakayowoya na mzinda ukuru pa Upharazgi wa pa Phiri, ndipo “mizinda yikazizikika na kasambizgiro kake.” (Mateyu 5:1, 2; 7:28) Mu 33 C.E., Yesu wakayowoya na ŵasambiri ŵake ŵaŵiri apo ŵakalutanga ku muzi unyake kufupi na Yerusalemu. ‘Wakaŵalongosolera makora Malemba.’—Luka 24:13-15, 27, 32.
Ŵasambiri ŵa Yesu nawo ŵakasambizganga ŵanthu Mazgu gha Chiuta. Ulendo unyake, munthu wakufuma ku Etiyopiya wakaŵazganga nkhani yinyake mu Malemba. Msambiri Filipu wakafika pafupi, wakafumba kuti: “Kasi mukupulikiska ivyo mukuŵazga?” Muetiyopiya yura wakazgora kuti: “Ningapulikiska wuli kwambura kuti munthu wanilongozge?” Filipu wakamulongosolera munthu yura ng’anamuro la mazgu agho wakaŵazganga.—Milimo 8:27-35.
WOVWIRI UWO ULIPO MAZUŴA GHANO
Mazuŵa ghano, Ŵakaboni ŵa Yehova ŵakusambizga ŵanthu Baibolo mu vyaru 239. Ivyo ŵakuchita vikuyana waka na ivyo ŵakachitanga awo ŵakasambizganga ŵanthu Baibolo nyengo yakale. (Mateyu 28:19, 20) Sabata yiliyose, Ŵakaboni ŵakovwira ŵanthu ŵakujumpha 9 biliyoni kuti ŵapulikiske Baibolo. Ŵanandi awo ŵakuŵasambizga mbakuti ŵandasambirepo Chikhristu. Munthu wakulipira chilichose yayi kuti ŵamusambizge kweniso wangasambilira pa nyumba yake panji malo ghanyake agho mwenecho wasankha. Ŵanyake ŵakusambilira pa foni, pa kompyuta panji vinthu vinyake.
Kumanani na Ŵakaboni ŵa Yehova kuti ŵamuphalirani umo namwe mungasangira wovwiri uwu. Para mwamba kusambira, muwonenge kuti Baibolo ndakusuzga yayi kulipulikiska. Kweni ‘ndachandulo pa kusambizga, kuchenya, kunyoloska vinthu, na kulanga mu urunji,’ mwakuti ‘muŵe ŵakukwana, ŵakunozgeka kuchita mulimo uliwose uwemi.’—2 Timote 3:16, 17.
Panji Mungatemwa Kuŵerengaso Nkhani Izi
MANYANI VYA ISE
Chifukwa Wuli Mukwenera Kusambira Baibolo?
Baibolo likuzgora mafumbo ghakuzirwa gha ŵanthu ŵanandi pa charu chose. Kasi mukukhumba kuti mafumbo ghinu ghazgoreke?
MANYANI VYA ISE
Kasi Ŵakaboni ŵa Yehova Ŵakuchita Wuli Pakusambizga Ŵanthu Baibolo?
Ŵakaboni ŵa Yehova ŵakusambizga ŵanthu Baibolo kwaulere. Wonani umo ŵakuchitira.
GONGWE LA MULINDA
Tikusambira Baibolo na Waliyose
Wonani mazgoro gha mafumbo 8 agho ŵanthu ŵakutemwa kufumba pa nkhani ya kusambira Baibolo.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.
