Yohane wakawona mboniwoni ya ŵanalume ŵanayi awo ŵakakwera pa mahachi. Para munthu wakuŵazga mboniwoni iyi mu Baibolo wakuŵa nga wakuwona nadi mahachi agha. Pakwamba Yohane wakawona hachi lituŵa, ilo pakaŵa themba liphya ilo likapika mphumphu ya uchindami. Kufuma apo, pakiza hachi liswesi, ndipo uyo wakakhalapo wakazomerezgeka kuwuskapo mtende pa charu chapasi. Kachitatu pakiza hachi lifipa ndipo uyo wakakhalapo wakaŵa na sikelo mu woko lake. Ndipo uthenga ukapharazgika kuti kuŵenge njara. Hachi laumaliro likaŵa lituwulufu, ndipo uyo wakakhalapo wakaŵa na zina lakuti Nyifwa. Ndipo Dindi likamulondezganga pafupi. Ntheura wakapika mazaza kuti wakome ŵanthu ŵanandi.—Chivumbuzi 6:1-8.

Crystal wakati: “Apo nkhaŵazga kakwamba nkhani iyi nkhatenthema chomene. Nkhawona nga kuti Zuŵa la Cheruzgo lafika kale. Pakuti nkhaŵa wakunozgeka yayi, nkhamanyanga kuti ningapona yayi.”

Ed wakati: “Pakwamba nkhakondwa chomene na mboniwoni iyi nangauli nkhayipulikiskanga yayi. Kweni nati namanya ng’anamuro lake nkhawona kuti vikupulikikwa nadi.”

Kasi namwe mboniwoni iyi yikumuchitiskani wofi nga umo vikaŵira na Crystal panji yikumukondweskani nga umo vikaŵira na Ed? Mboniwoni iyi njimoza mwa mboniwoni zakukondweska izo zili buku la Chivumbuzi. Manyani kuti mungakondwa chomene para mungamanya ng’anamuro la mboniwoni iyi. Kasi mungachita wuli? Chiuta wakuti mungaŵa ŵakukondwa para mungaŵazga, kusambira na kulondezga ivyo vikuyowoyeka mu buku ili.—Chivumbuzi 1:1-3.

Nangauli ŵanthu ŵanyake ŵakutenthema na mboniwoni iyi, kweni chilato chake ntchakuti yitenthemeskenge ŵanthu yayi. Ŵanthu ŵanandi ŵawona kuti mboniwoni iyi yikukhozga chipulikano chawo na kulutilira kulindilira ivyo Chiuta walayizga. Namwe yingamukhozganiso. Ntheura ŵazgani nkhani yakulondezgapo.