KASI NDIMWE ŴAKUKONDWA? Usange ni nthena ntchivichi chikumupangiskani kuŵa wakukondwa? Ni banja linu, ntchito iyo mukugwira, panji chipulikano chinu? Panji mukulindilira vinthu vinyake ivyo mukuwona kuti vingamovwirani kuŵa wakukondwa nga nkhumalizga masambiro, kusanga ntchito yiwemi, panji kugura galimoto yiphya.

Ŵanthu ŵanandi ŵakukondwa para ŵafiska vilato vinyake panji para ŵasanga ivyo ŵakakhumbanga. Kweni kasi kukondwa uku kukuŵa kwa utali wuli? Kanandi kukutora mtunda yayi, ndipo paumaliro wamunthu ukudandawura waka.

Ŵanyake ŵakuti munthu wakukondwa para wali na umoyo uwemi, wakukhorwa na ivyo wali navyo, chimwemwe chake chikufuma pasi pa mtima, ndipo wakukhumba kuti chilutilire.

Kuti tiŵe ŵakukondwa tikukhumbikwira kuŵa na kalikose yayi, m’malo mwake tikwenera kukhorwa na ivyo tili navyo. Para munthu wakuyowoya kuti, ‘Nizamuŵa wakukondwa chomene para nasanga chakuti, panji para nachita vyakuti’ mbwe wazamuŵapo wakukondwa yayi.

Chimwemwe tingachiyelezgera na umoyo uwemi. Kasi tikuchita wuli kuti tilutilire kuŵa na umoyo uwemi? Tikurya chakurya chakwenelera, kuchita maseŵera ghakukhozga thupi, na kulutilira kuchita vinyake ivyo ni vyakwenelera. Mwakuyana waka, kuti munthu waŵe wakukondwa ni para wakulondezga fundo za makhaliro ghawemi.

Kasi ni fundo panji mikhaliro wuli iyo yingawovwira munthu kuŵa wakukondwa? Vinthu vyakulondezgapo ivi vingawovwira munthu kuŵa wakukondwa:

• KUKHORWA KWENISO KUŴA NA MTIMA WAKUPELEKA

• UMOYO UWEMI NA KUZIZIPIZGA MASUZGO

• CHITEMWA

• KUGOWOKA

• KUŴA NA CHILATO PA UMOYO

• CHIGOMEZGO

Baibolo ilo ni buku lapadera chomene likuti: “Mbakukondwa awo mbambura kafukwa mu mendero ghawo.” (Salimo 119:1) Tiyeni tiwone ivyo munthu wangachita kuti waŵe wakukondwa.