Ŵanthu Ŵali Kuleka Kuchindikana mu Mbumba
CHIFUKWA WULI NTCHAKUZIRWA KUCHINDIKANA MU MBUMBA?
Mbumba ghakuŵa malo ghawemi kweniso ghachivikiliro para mfumu, muwoli na ŵana ŵakuchindikana.
-
Buku la The Seven Principles for Making Marriage Work likuti para ŵakutorana ŵakuchindikana zanadi, ŵakulongorana chitemwa “pa vinthu vikuruvikuru pera yayi, kweni nanga mpha tunthu tuchokotuchoko zuŵa na zuŵa.”
-
Kusanda uko kwachitika, kukulongora kuti ŵana awo ŵasambizgika kuchindika ŵanji, ŵakujikayikira yayi, ŵakuŵa paubwezi uwemi na ŵapapi ŵawo, ndipo ŵakusuzgika viŵi yayi maghanoghano.
IVYO IMWE MUNGACHITA
Lemberani lumoza vinthu ivyo mukukhumba kuchita pa mbumba yinu. Chakwamba, woneseskani kuti waliyose mu mbumba yinu wakupulikiska makora ng’anamuro la “kuchindikana.” Chachiŵiri, lembani nkharo iyo waliyose wakwenera kulongora kwa munyake wa mu mbumba na nkharo iyo waliyose wakwenera kuyigega. Chachitatu, dumbiskanani nga mbumba, vyose ivyo mwalemba na chilato chakuti waliyose mu mbumba wamanye ivyo wakwenera kuchita kuti walongorenge ntchindi.
Muŵe pakwamba ndimwe. Kasi mukuŵanena ŵa mu mbumba yinu para ŵabudiska vinthu vinyake, kuŵanyoza para ŵayowoya maghanoghano ghawo, kuŵagega panji kuŵadumulizga para ŵakuyowoya namwe?
Ivyo vingamovwirani: Longorani ntchindi kwa munyinu wa mu nthengwa kweniso ŵana ŵinu nanga vingaŵa kuti imwe mukuwona kuti ŵakukhumbikwira ntchindi yayi.
Chindikani munthu nanga mungaŵa kuti mukukolerana nayo yayi. Para mukulongosora umo mukujipulikira, gegani kuyowoya mazgu ghamsinjiro nga ghakuti “ndimo ukuchitira nyengo zose” panji “iwe ungasintha yayi.” Mazgu ghanthena ghangakhuŵazga munyake mu mbumba kweniso ghangambiska kugazgana ndipo vinthu vingamara makora yayi.
IVYO TIKUCHITA
Ŵakaboni ŵa Yehova ŵakovwira ŵanthu kuti ŵalongoranenge ntchindi mu mbumba, ndipo kanandi ndivyo vikuŵa mu mitu ya nkhani, mu mabuku, maburosha, na mavidiyo agho tikufumiska, ndipo ŵanthu ŵangavisanga mwaulere.
KU AWO ŴALI PA NTHENGWA: Nkhani zakupambanapambana izo zili pa intaneti, pasi pa mutu wakuti Vyakovwira Mabanja zingawovwira ŵafumu na ŵawoli kuti . . .
-
ŵategherezganenge
-
ŵaleke kudundukirana panji kuti kuleka kuyowoyeskana
-
ŵaleke kugazgana
(Penjani mutu wakuti “Vyakovwira Mabanja” pa jw.org)
KU ŴAPAPI: Nkhani zakupambanapambana izo zili pa intaneti, pasi pa mutu wakuti Vyakovwira Mabanja zingawovwira ŵapapi umo ŵangasambizgira ŵana ŵawo kuti . . .
-
ŵapulikirenge
-
ŵawovwirengepo pa ntchito za pa nyumba
-
ŵayowoyenge mwantchindi kweniso ŵawongenge
(Penjani mutu wakuti “Kulera Ŵana” kweniso “Kulera Ŵachinyamata” pa jw.org)
Wonaniso zakumapeto, “Mafunso Amene Makolo Amadzifunsa,” mu buku la Mayankho a Zimene Achinyamata Amafunsa, Buku Loyamba. (Penjani mutu wakuti “Mafunso Amene Makolo Amadzifunsa” pa jw.org)
KU ŴACHINYAMATA: Chigaŵa cha Ŵachinyamata icho chili pa jw.org chili na nkhani, mavidiyo, na vyakulembapo ivyo vingawovwira ŵachinyamata kuti . . .
-
ŵakhalenge makora na ŵapapi kweniso ŵana ŵakwawo
-
ŵayowoyenge mwantchindi na ŵapapi ŵawo pa nkhani ya malango agho ŵaŵika
-
ŵapapi ŵaŵagomezgenge
(Penjani mutu wakuti “Ŵachinyamata” pa jw.org)
Webusayiti ya jw.org njaulere. Mukulipira ndalama yayi, mukukhumbikwira kulembeska yayi, panji kuŵa membara, kweniso mukupempheka yayi kuti mulembepo vinthu vyakukhwaskana na imwe.
