Ŵanthu Ŵali Kuleka Kujichindika
CHIFUKWA WULI NTCHAKUZIRWA KUJICHINDIKA?
Ŵanthu awo ŵakujichindika ŵangalimbana na masuzgo agho ŵakusangana nagho mwachikanga. Iwo ŵakuthera luŵiro yayi.
-
Kusanda kwalongora kuti ŵanthu awo ŵakujiwona kuti mbambura kuzirwa, ŵakuchedwa yayi kwamba kwenjerwa, kulwara matenda ghakusuzgika maghanoghano, kweniso ŵakuŵa na suzgo lakutondeka kurya. Ndipo ŵangamba kumwa chomene moŵa kweniso kugwiliskira ntchito munkhwala wakutimbanizga wongo.
-
Ŵanthu awo ŵakujichindika ŵakujiyaniska na ŵanji yayi. Ivi vikuŵawovwira kuti ŵakoleranenge na ŵanthu awo ŵali nawo pafupi, kweniso kuŵa paubwezi wakukhora na ŵanji. Apo awo ŵakujichindika viŵi yayi ŵangamba waka kususka ŵanyawo pa chilichose ndipo ivi vingatimbanizga ubwezi wawo na ŵanji.
-
Nanga ŵangasangana na masuzgo, ŵanthu awo ŵakujichindika ŵakuŵa ŵakukhora. Ŵakuwelera nyuma yayi m’paka ŵafiske vilato vyawo. Apo awo ŵakujichindika viŵi yayi, ŵakwamba kuwona tunthu tuchokotuchoko uto ŵakutondeka kuchita makora kuŵa nkhani yikuru. Ivi vingapangiska kuti chiŵe chipusu kugongowa.
IVYO IMWE MUNGACHITA
Musankhenge ŵabwezi awo ŵangamukhozgani. Muchezgenge na ŵanthu ŵantchindi, awo ŵakumughanaghanirani nadi, kweniso awo ŵangamukhozgani.
Movwirenge ŵanji. Para mukuchitira ŵanji lusungu, kusazgapo awo ŵangamuwezgerani yayi pa viwemi ivyo mwaŵachitira, muzamusanga chimwemwe chanadi icho chikwiza chifukwa cha kupeleka. Muzamuŵa na chimwemwe nanga vingaŵa kuti ŵanthu ŵanyake ŵakuwona yayi ivyo mukuchita.
Wovwirani ŵana ŵinu kuti ŵajichindikenge. Nthowa yimoza yakuchitira nthena, nkhuzomerezga ŵana ŵinu kuti ŵamaranenge nagho ŵekha masuzgo ghawo, kuyana na umo ŵangafiskira. Ivi vizamuŵawovwira kusambira umo ŵangazizipizgira masuzgo na kumarana nagho. Para mwana wasambira kumarana nagho yekha masuzgo, vimovwirenge kuti wajichindikenge sono kweniso para wakura.
IVYO TIKUCHITA
Maungano gha Ŵakaboni ŵa Yehova kweniso ndondomeko yakusambizga ŵanthu Baibolo, vikovwira ŵanthu ŵanandi kusintha umoyo wawo kweniso kuti ŵajichindikenge.
MAUNGANO GHITHU GHA SABATA NA SABATA
Pa maungano ghithu sabata yiliyose, tikukondwa kupulikizga nkhani za mu Baibolo izo kanandi zikuŵa na fundo za umo tingajichindikira. Maungano ghithu ngaulere ndipo waliyose wangiza. Mwachiyelezgero, ku maungano ghithu mwamusambira . . .
-
chifukwa icho muliri ŵakuzirwa kwa Chiuta
-
chifukwa icho tiliri ŵamoyo
-
ivyo mungachita kuti muŵe paubwezi wakukhora kweniso wakukhaliska na ŵanji
Mwamusangaso ŵabwezi ŵanadi awo ŵakupwelelerako vya imwe.—1 Ŵakorinte 12:25, 26.
Kuti mumanye vinandi vyakukhwaskana na maungano ghithu, penjani vidiyo yakudumura ya mutu wakuti, Kasi pa Nyumba ya Ufumu Pakuchitika Vichi? pa jw.org
KUSAMBIRA BAIBOLO NA ŴANTHU
Tikusambira na ŵanthu Baibolo kwaulere pakugwiliskira ntchito buku la Mungakondwa na Umoyo Kwamuyirayira! Mu buku ili muli malemba ghawemi chomene, fundo zakupulikikwa makora, mafumbo ghakufika pamtima, mavidiyo yawemi chomene, kweniso vithuzi vyakutowa. Kusambira Baibolo na ŵanthu kwawovwira kuti ŵanandi ŵajichindikenge na kusintha umoyo wawo.
Kuti muwone umo kusambira Baibolo na Ŵakaboni ŵa Yehova kungamovwilirani, penjani vidiyo yakudumura ya mutu wakuti, Chifukwa Wuli Mukwenera Kusambira Baibolo? pa jw.org
Panji Mungatemwa Kuŵerengaso Nkhani Izi
WUKANI!
Kasi Mungachita Wuli Kuti Muchindikenge Mfumu panji Muwoli Winu?
Kuchindikana mu nthengwa ni nkhani yakuzirwa chomene. Kasi mungachita wuli kuti muchindikenge mfumu panji muwoli winu?
MAFUMBO AGHO BAIBOLO LIKUZGORA
Kasi Baibolo Likuti Wuli pa Nkhani ya Kujitemwa Wamwene?
Yesu wakati “Utemwenge mzengezgani wako umo ukujitemwera wamwene.” Kasi wakang’anamurangachi?
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.
MANYANI VYA ISE
Mungaluta ku Maungano
Sambirani vyakukhwaskana na maungano ghithu. Sangani maungano kufupi na uko mukukhala.
