Ŵapapi awo ŵakulongora chiyelezgero chiwemi, ŵakuchita ivyo ŵakuyowoya. Tiyelezgere kuti mundakhumbe kuyowoyeskana na munthu kuwaro, mbwe mwana winu wakumupulikani mukuyowoya kuti, “Muphalirani kuti nafumapo panyumba,” uku mulipo. Para mungachita nthena chingaŵa chakusuzga kuti mwana winu waŵe wakugomezgeka.

David wakati: “Ŵanthu ŵanandi ŵakutemwa kuyowoya kuti, ‘Kutolera ivyo ine nkhuchita yayi, muchitenge waka ivyo ine nkhuyowoya.’ Fundo iyi yikukora yayi ku ŵana. Ŵana ŵali nga ni sipanji ŵakutolera chilichose icho tikuyowoya na kuchita, ndipo ŵangatiphalira usange tikuchita nadi ivyo tikuyowoya panji yayi.”

FUNDO YA MU BAIBOLO: “Iwe ukupharazga kuti, ‘Ungibanga chara,’ kasi iwe ukwiba?”—Ŵaroma 2:21.

Kanandi ŵana ŵakulondezga chomene ivyo ŵapapi ŵakuchita kuluska munthu munyake waliyose nanga ŵangaŵa ŵanyawo. Ichi chikung’anamura kuti imwe ndimwe muli pa malo ghawemi kulongozga mwana winu munthowa yakwenelera, chikuru mukuchita ivyo mukuyowoya.

Nicole wakati: “Tingayowoya na mwana kanandi waka za chinthu chinyake, ndipo ise tingawona nga wakupulika yayi, kweni para taleka kuchita ivyo tayowoya, mwana wangatiphalira. Ŵana ŵakuwona chomene ivyo tikuchita, nangauli ise tingamanya yayi.”

FUNDO YA MU BAIBOLO: “Vinjeru vyakufuma kuchanya, . . . ni vyambura upusikizgi.”—Yakobe 3:17.

Jisandani umo mukuchitira. Kasi mukutemwa kuwonelera vyakusanguluska wuli? Kasi mukuchita nayo wuli munyinu wamunthengwa panji ŵana ŵinu? Kasi muli na ŵabwezi wuli? Kasi mukughanaghanira ŵanyinu? Mwakudumura, kasi imwe ndimwe chiyelezgero chiwemi chakuti ŵana ŵangasambirako?

Christine wakati: “Ine na mfumu wane tikukhumba yayi kuti ŵana ŵithu ŵachitenge vinthu ivyo ise tikutondeka kuchita.”

Muphepiskenge. Ŵana ŵinu ŵakumanya kale kuti namwe muli ŵakwananga. Para mukuphepiska munyinu wamunthengwa kweniso ŵana ŵinu, ndikuti mukuŵasambizga kuti ŵaŵe ŵakugomezgeka kweniso ŵakujiyuyura.

Robin wakati: “Ŵana ŵithu ŵakwenera kupulika para tikuphepiska usange tabudiska vinthu. Para tikuphepiska yayi ŵana ŵithu ŵazomerenge yayi para ŵabuda.”