Taŵanthu tikuwona kuti ntchiwemi yayi kuti ŵanthu ŵawemi ŵasuzgikenge. Lekani ŵanthu ŵanyake ŵakuwona kuti palije chifukwa chakuŵira munthu muwemi.

Ŵanthu ŵanyake ŵakugomezga kuti taŵanthu tikufwa na kubabikaso. Ŵakuyowoya kuti uyo wakuchita viwemi wakubabikira ku umoyo uwemi kweni uyo wakuchita viheni wakubabikira ku umoyo wa masuzgo. Kuyana na chigomezgo ichi, ŵakuti munthu muwemi nayo wangasangana na masuzgo para “kumanyuma” wakachitapo vinthu viheni. Usange ni nthena . . .

• Kasi masuzgo ghangamusintha wuli munthu, uku para munthu wababika wakukumbukaso yayi ivyo wakachita kumasinda?

• Chifukwa wuli tikwenera kupwelelera umoyo kweniso kugega ngozi apo tisuzgikenge kale chifukwa cha ivyo tikachita kumasinda?

  MANYANI VINANDI

  Wonelerani vidiyo ya mutu wakuti Chifukwa Wuli Chiuta Wakughalaŵiska Waka Masuzgo? pa jw.org.

Para ŵanthu ŵakusuzgika ndikuti Chiuta wakuŵalanga yayi.

Kweni kanandi masuzgo ghakutisanga chifukwa chakuti tili pa malo ghaheni kweniso pa nyengo yiheni.

Baibolo likuti: “Awo ŵakuluska pa chiphalizgano mbaluŵiro pera chara, panji vinkhara kuluska pa nkhondo, panji ŵavinjeru pera kuŵa na vyakurya, panji ŵamahara kusanga chuma, panji awo mbakumanya pera ndiwo vinthu vikuŵendera. Pakuti nyengo na vyakuchitika vyamabuchi vikuwira wose.”​—MUPHARAZGI 9: 11.

Masuzgo ghanyake tikusangana nagho chifukwa chakuti tili kuhara kwananga.

Kanandi para ŵanthu ŵakuyowoya mazgu ghakuti “kwananga” ŵakunena chinthu chiheni icho munthu wachita. Kweni nyengo zinyake para Baibolo likuyowoya za kwananga likuyowoya za kwananga uko munthu waliyose, kwali ni muwemi panji muheni wali kuhara.

Baibolo likuti: “Nkhababika wakubuda, na wakwananga kufuma waka apo amama ŵakatolera nthumbo.”​—SALIMO 51:5.

Kwananga uko tili kuhara kwapangiska masuzgo ghanandi pa umoyo wa ŵanthu.

Kwananga kukutimbanizga ubwezi withu na Yehova kweniso vilengiwa vyake vinyake. Ivi vyapangiska kuti taŵanthu tisanganenge na masuzgo. Masuzgo ghanyake munthu wangasangana nagho yekha apo ghanyake ghakuŵa gha ŵanthu wose.

Baibolo likuti: “Para nkhukhumba kuchita chiwemi, icho ntchiheni chikuŵa nane.”​—ŴAROMA 7:21.

“Chilengiwa chose pamoza chikulutilira kutampha na kupulika vyakuŵinya m’paka sono.”​—ŴAROMA 8:22.