Sankho lingakura usange tikujipatura ku ŵanthu awo tikuŵawona kuti mbambura kwenelera. Usange tikusankha ŵabwezi ŵekha awo ŵali nga ndise, tingamba kughanaghana kuti ise ndise tikuchita makora vinthu na kughanaghana mwakwenelera.

“Julani mitima yinu.”—2 ŴAKORINTE 6: 13.

Kasi fundo iyi yikung’anamurachi? Mazgu ghakuti “mtima” ghangang’anamura umo tikujipulikira na ivyo tikutemwa. Mtima withu ukukhwinyata panji kuti kujalika usange tikutemwa ŵanthu ŵekha awo ŵakuyana na ise. Kuti tigege suzgo ili, tikwenera kuŵaso paubwezi na ŵanthu awo mbakupambana na ise.

Usange taŵamanya makora ŵanthu ŵanyake, tikwamba kuŵapulikiska chifukwa icho ŵakuchitira vinthu mwakupambana na ise. Ndipo apo tikuŵa nawo paubwezi tikwamba kuŵawona nga ni ŵanthu ŵa mtundu withu. Tikwamba kuŵawona kuti mbakuzirwa ndipo para ŵakukondwa, nase tikukondwa nawo, panji para ŵali na chitima nase tikuŵa na chitima.

Wonani ivyo vikachitikira Nazaré. Iyo wakaŵa na sankho ku ŵanthu awo ŵafuma mu vyaru vinyake. Iyo wakulongosora ivyo vikamovwira. Wakuti: “Nkhamba kuchezga nawo na kugwira nawo ntchito. Nkhasanga kuti ivyo nkhawona vikapambananga chomene na ivyo ŵanthu mu chigaŵa chithu ŵakayowoyanga. Para uli paubwezi na ŵanthu ŵa fuko linyake, ndipo ukumanya kuti ni  wose yayi ŵali nga umo ŵanthu ŵakuyowoyera. Ndipo ukwamba kuŵatemwa na kuŵawona kuti mbakuzirwa.”

Sangani m’pata kuti muchezge na ŵanthu awo ŵafuma mu vyaru vinyake panji awo mukupambana mtundu na chiyowoyero. Ivyo mungachita

• Ŵafumbani kuti ŵamuphaliraniko vichoko waka vyakukhwaskana na iwoŵene.

• Ŵachemani kuti mukalyere lumoza chakurya.

• Tegherezgani para ŵakuyowoya ivyo vili kuŵachitikirapo pa umoyo wawo, ndipo yezgani kumanya ivyo ni vyakuzirwa kwa iwo.

Para mungamanya ivyo vikaŵachitikira, mungamba kuŵapulikiska umo ŵakuchitira vinthu. Ivi vingamovwirani kuti mwambe kuŵatemwa na kuŵawona mwakwenelera ŵanthu ŵa mtundu uwo.