Apo muwoli wane Kaye, wakababa mwana withu wakwamba mwanakazi, zina lake Lauren, nkhamanyanga yayi umo ningachitira kuti niŵe dada muwemi. Tati taŵa na mwana wachiŵiri mwanalume, zina lake Michael, naposo nkhamanyanga yayi umo ningaŵira dada muwemi. Nthengwa ya ŵapapi ŵane yikaŵa waka yakugazgana na kutimbana nyengo zose, ndipo paumaliro yikamara. Nangauli nkhakhumbanga kuŵa mutu uwemi wa mbumba yane, kweni nkhamanyanga yayi umo ningachitira.

 Vinthu vikanangikirathu apo nkhaŵa muwukirano, nkhatemwanga chomene kumwa moŵa na munkhwala wakutimbanizga wongo. Nati nakura, napo vikanisuzganga ni pera. Vizgoŵi viheni ivyo nkhaŵa navyo, kusazgapo kutchova njuga, vikapangiskanga kuti nileke kusankha vinthu mwamahara. Vinthu vikafikirathu paheni mwakuti Kaye wakanileka na kufumapo panyumba kweniso wakatora ŵana ŵithu ŵaŵiri. Nkhahangayika chomene.

 Nkhamufumba Kaye ivyo ine ningachita kuti iyo wawelereso panyumba. Kweni wakaŵa kuti wambapo kale kusambira Baibolo na Gloria, uyo wakaŵa yumoza wa Ŵakaboni ŵa Yehova. Ntheura wakanizgora mwakudunjika kuti: “Usambire Baibolo.” Nkhamanya yayi icho wakang’anamuranga, kweni chifukwa chakuti nkhakhumbanga Kaye wawelereso panyumba, nkhazomera kusangana na Gloria kweniso mfumu wake, Bill.

 Bill na Gloria ŵati ŵafika pa nyumba yithu, Nkhatoleka mtima chomene na ubwezi wawo wakukhora uwo ŵakalongorananga. Nkhamanya kuti ŵana ŵawo awo panyengo iyi ŵakaŵa kuti mbalara, ŵamsinkhu nga ngwane, nawo ŵakakhalanga umoyo uwemi chomene. Ntheura kwa nyengo yakwamba, nkhamba kuwona kuti Baibolo ndilo lingatovwira chomene kuti tiŵe ŵakukondwa mu mbumba yithu.

 Pa nyengo iyo Bill na Gloria wakizira panyumba, ŵakadumbiskana nane vyakukhwaskana na masuzgo ghane ghose. Ŵakanilongora ivyo Baibolo likuyowoya pa Ŵagalatiya 6:7, apo pakuti: “Icho munthu wakuseŵa, ndicho wazamuvuna.” Mbwenu nkhaghanaghana kuti, ‘Viŵenge kuti nkhalondezganga fundo iyi pa umoyo wane m’paka sono, mphanyi nagega masuzgo ghanandi chomene!’

 Pamanyuma nkhawona kuti kulondezga fundo za mu Baibolo kukawovwira chomene kusintha umoyo wane. Ine na Kaye tikaleka kukhweŵa hona, ndipo nkhawovwirikaso kumazga vizgoŵi viheni ivyo nkhaŵa navyo. Mu 1985, apo tikaŵa na mwana withu wachitatu, zina lake David, uyo tatemwanga kumuchema kuti Davey—ndipo nkhambira kujiwona kuti sono ndine dada muwemi.

 Nga mbapapi, ine na Kaye tikawona kuti kusambizga ŵana ŵithu kuti ŵatemwenge Yehova kukatovwira kuti tiŵe nayo pa ubwezi wakukhora. Tikasambira vinandi mu mabuku ghithu nga buku lakuti Kumamumvetsera Mphunzitsi Wamkuru’yo! Nakutiso mbumba zinandi mu mpingo mwithu zikaŵa chiyelezgero chiwemi kwa ise kweniso ku ŵana ŵithu.

 Pakati pajumpha nyengo, ŵana ŵithu wose ŵakaŵa ŵapayiniya. Kukwambilira kwa 2004, Lauren wakaŵa mu mpingo wa Chispanishi. Michael wakaŵa kuti wafumapo waka pa Beteli kuti wamutora, ndipo iyo na muwoli wake Diana, ŵakaŵa kuti ŵalutenge ku Guam kukapharazga. Ndipo Davey, wa vyaka 19, wakaŵa kuti wamba waka kuteŵetera ku Dominican Republic.

 Ine na Kaye tikanothanga nawo chomene ŵana ŵithu chifukwa chakuti ŵakasankha makora vinthu. Tikajipulikanga nga umo mazgu gha pa 3 Yohane 4 ghakulongosolera kuti: “Palije chinyake icho chikunikondweska chomene kuluska ichi, chakuti nipulikenge kuti ŵana ŵane ŵakulutilira kwenda mu unenesko.” Kweni tikamanyanga yayi kuti vinthu vingasintha pa umoyo withu chifukwa cha uthenga unyake wa pa foni.

 Pa April 24, 2004, ine na Kaye tikaluta kukarya chakurya chamise pamoza na mbumba zinyake ziŵiri. Pakuti resitiranti yikaŵa patali makilomita ghakujumpha 100, mbwenu tose 6 tikenda waka pa galimoto yane. Ntheura tikati tarya chakurya cha mise chira pa resitiranti iyo tikafikira mbwenu tikafumapo nakuya pa yinyake kuti tikarye twakukhizgira, kweni ine nkhaluta dankha kukapenja malo ghakwimikapo galimoto. Kwenekura foni yane yikachema. Wakaŵa mubwezi wane, ndipo wakayowoyanga uku mtima uli muchanya.

 Wakati: “Kwachitika chinthu chinyake chakofya. Davey wachita ngozi.”

 Nkhafumba kuti: “Ka ngwakuti wapwetekeka chomene ?” Apa ndikuti wofi wanikora maseŵera cha!

 Pakwamba wakakhala dankha chete kwambura kuzgora. Kweni paumaliro wakanimanyiska kuti Davey wafwa.

 Tati tamara kuyowoyeskana pa foni, nkhalomba kwa Yehova kuti wanipe nkhongono. Pamanyuma nkhaluta mu resitiranti yira mukaŵa ŵanyane na kuŵaphalira kuti nkhujipulika makora viŵi yayi ndipo chigaŵa chiwemi usange tingawelera waka kunyumba. Nkhakhumbanga yayi kumuphalira dankha Kaye ivyo vyachitikira Davey, m’paka tikaŵe kwataŵiri.

 Kuyowoya unenesko, ulendo wa maminiti 90 uwo tikenda kuwelera kunyumba ukaŵa wakuŵinya chomene. Nkhamupulikanga waka Kaye wakuphalira ŵanyithu ŵara mwakukondwa kuti wakulindilira mwakunweka kuti Davey wizenge sonosono kuzakatiwona. Nyengo yichoko waka pambere Kaye wandamanye vyakuti mwana withu wafwa, mauthenga ghakutiphepiska ghakaŵa kuti ghakwizirakwizira pa foni yane.

 Ŵanyithu ŵara tikati taŵapereka ku nyumba zawo, nase tikafika pa nyumba yithu. Kaye wakanilaŵisiska, ndipo wakamanya kuti chinyake chikaŵa makora yayi. Wakafumba kuti: “Chachitika ntchivichi?” Nkhamanya kuti ivyo niyowoyenge vimugulurenge nkhongono Kaye, nga umo vikaŵira na ine apo munyane wakanimbira foni maora ghaŵiri agho ghajumpha.

 Ine na Kaye tikaŵa kuti tasanganapo na masuzgo ghanandi kumasinda, ndipo tikamanyanga kuti Yehova wakupembuzga ŵanthu ŵake. (Yesaya 41:10, 13) Kweni suzgo ili likaŵa lakupambanako na ghanyake. Nkhagomezga yayi, ndipo kanandi nkhajifumbanga kuti, ‘chifukwa wuli ivi vyachitikira Davey—munthu uyo wachita vinandi pakuteŵetera Yehova? Chifukwa wuli Yehova wandamuvikilire?’

 Ŵana ŵithu ŵanyake nawo ŵakakhwaskika chomene. Lauren wakaŵa waka nga ni mama wachiŵiri kwa Davey, ntheura nyifwa yake yikamuŵinya chomene. Michael nayo wakakhwaskika chomene. Nangauli Michael wakaŵa kuti wafumapo pa nyumba pafupifupi vyaka vinkhondi kumanyuma, kweni wakaŵa kuti wamanya kuti munung’una wake nayo wakura ndipo wakuchita makora mwauzimu.

 Kufuma waka pakwamba, ŵabali mu mpingo withu ŵakatovwira chomene. Mwachiyelezgero, nanga ni apo Kaye mahara ghakamumalira wati wapulika vya nyifwa ya mwana withu, ŵabali na ŵadumbu mu mpingo ŵakizanga ku nyumba, kuzakatipembuzga na kutipa wovwiri wakwenelera. (Zintharika 17:17) Nizamuluwapo yayi chitemwa icho ŵakatilongora!

 Kuti tichepeskeko chitima, ine na Kaye tikalekapo yayi kulomba, kusambira Baibolo, kweniso kuwungana na mpingo. Vinthu ivi vikamazga chitima chithu yayi. Kweni tikamanyanga kuti ntchakuzirwa chomene kuchita vinthu ivyo vingatovwira kuŵa ŵakukhora mwauzimu.—Ŵafilipi 3:16.

 Uwemi ngwakuti Michael na Diana ŵakaŵa nase pafupi chomene, ndipo Lauren wakamba kuwungana nase lumoza mu mpingo wa Chingelezi. Nyengo iyo tikaŵira lumoza kwa vyaka vichoko waka vikawovwira kuti tose tambe kujipulikako makora. Ndipo pamanyuma pakuti Lauren watengwa, mfumu wake Justin, nayo wakatovwira chomene.

 Pamanyuma pakuti Davey wafwa, tikamba kuchita chinthu chinyake,—nangauli chikaŵa chakusuzga kweni chikatovwira chomene. Kaye walongosorenge nkhani yose.

 “Apo mfumu wane wakaniphaliranga kuti Davey wafwa, nkhaŵa nga nawira muchikhululu icho chili na mdima bii, ndipo nkhakhala mwenemumo kwa nyengo yitali. Nkhaŵa na chitima chikuru chomene ndipo chikaniŵira chakusuzga kuchita vinthu ivyo nkhachitanga pa umoyo wane. Kanandi nkhaliranga waka. Kuyowoya unenesko, nyengo zinyake nkhamukwiyiranga Yehova na waliyose waka. Ndipo nkhajiwonanga nga palijirethu chamahara icho ningachita.

 “Nkhakhumbanga kuluta ku Dominican Republic. Nkhakhumbanga kuluta uko Davey wakakhalanga na kuteŵetera Yehova pambere wandafwe. Pa nyengo yimozamoza pera, nkhaŵavya nkhongono, ndipo nkhawonanga kuti ningafiska yayi kwenda ulendo utali nthena.

 “Mubwezi wane wakanovwira, wakaniphalira kuti ŵabwezi ŵa Davey awo ŵali ku Dominican Republic nawo ŵakulira ndipo ŵakukhumba kuti ŵasangane na ŵa mu mbumba ya kwa Davey. Ivyo wakachita vikanovwira kusanga tunkhongono twakukakwelera ndege.

 “Ulendo uwo tikachita panyengo iyi na mbumba yithu ukaŵa nadi wakwenelera kwa ise. Tikajiwonera tekha kuti Davey wakaŵa munthu wakutemwa vyauzimu. Mubali mulara yumoza pera mu mpingo uwo Davey wakawungananga wakayowoya kuti nyengo zose wathembanga Davey kuti wafiske makora milimo yake yinyake.

 “Apo tikendanga mu msewu wa uko Davey wakakhalanga, ŵanthu ŵakizanga kwa ise na kutiphalira viwemi ivyo wakaŵachitira. Nkhamanyanga kuti nyengo zose Davey wakaŵa munthu walusungu, kweni ivyo nkhawona apa vikanovwira kusimikizga kuti mwana wane wakalondezganga nadi Yesu.

 “Tikasanganaso na munthu uyo wakasambiranga Baibolo na Davey—munthu uyu wakakhalanga mu kanyumba kachoko chomene kweniso wakatondekanga kuwuka pa bedi chifukwa cha ulwari. Wakaŵa munthu mukavu, kweni ŵabwezi ŵa mu mpingo ŵakatiphalira kuti Davey wakachitanga vinthu vyakulongora kuti wakumuchindika chomene munthu uyu. Fundo iyi yikanikondweska chomene!

 “Pa umoyo wane, ulendo uwu ukaniŵira unonono chomene. Kweni ukaŵa munkhwala withu chifukwa tikalira na kupembuzgana lumoza na wose awo ŵakamumanyanga Davey. Ntheura tikajipulikako makora mu mtima.”

 Magazini gha Wukani! ya Chicheŵa ya January 8, 2005, mukaŵa nkhani iyo yikalongosoranga vya nyifwa ya Davey kweniso vya uteŵeti uwo wakachitanga ku Dominican Republic. Pa nyengo iyi, mbumba yithu yikamanyanga yayi umo nkhani iyi yikhwaskirenge awo ŵamuyiŵazga. Mwachiyelezgero, mu May 2019 mubali munyake zina lake Nick wakatilembera kalata na kutiphalira fundo zakulondezgapo izi:

 “Kuumaliro kwa 2004, nkhaŵa ku koleji ndipo nkhaŵavya chilato chilichose chauzimu. Nkhaŵa wakukondwa yayi. Nkhalomba kwa Yehova, nkhamuphalira kuti wanovwire kugwiliskira ntchito makora vyaka ivyo vikakhalako vya uwukirano wane. Pakajumpha nyengo yichoko waka, mbwenu nkhaŵerenga nkhani ya Davey mu Wukani! Nkhani iyi yikaŵa zgoro la lurombo lwane!

 “Nkhaleka masambiro gha ku koleji na kwamba upayiniya. Kweniso nkhajiŵikira chilato chakuti nisambire Chisipanishi na kuluta ku charu chinyake. Pakati pajumpha nyengo, nkhakateŵetera ku Nicaragua ndiposo nkhanjira Sukulu ya Ŵapharazgi ŵa Ufumu lumoza na muwoli wane. Usange ŵanthu ŵakunifumba kuti kasi ntchivichi icho chikakupangiska kwamba upayiniya, mbwenu nkhuŵaphalira waka chiyelezgero chiwemi cha Davey.”

 Chakuchitika chinyake ni apo tikakumana na mudumbu munyake zina lake Abi, uyo wakatumika kuzakagwira ntchito ku hotelo pa nyengo iyo tikaluta ku Ungano wa Mitundu Yose mu 2019, ku Buenos Aires, Argentina. Tikakondwa chomene chifukwa wakaŵa walusungu kweniso wakatemwanga ŵanthu. Ine na Kaye tikawona kuti vyakuchita vyake vikayanangako na ivyo wakachitanga Davey.

 Tati tawelera mu chipinda chithu cha pa hotelo, tikamutumira Abi linki ya Wukani! iyo mukaŵa nkhani ya Davey. Wakazgora pati pajumpha maminiti ghachoko waka. Wakakhumbisiska kuyowoya nase mwakuti tikakasangana pa malo ghakupokelera ŵalendo. Tati tasangana, uku wakuthiska masozi, Abi wakatiphalira kuti, chifukwa cha chiyelezgero chiwemi cha Davey lekani nayo wakamba upayiniya mu September 2011 ndipo pamanyuma wakaluta kukateŵetera ku dera lakusoŵa. Wakayowoya kuti, “Para nasangana na masuzgo pa uteŵeti wane, mbwenu nkhuwerezgaso kuŵerenga nkhani ya Devey.” Wakaŵa na magazini yeneyiyi mu woko lake!

 Vyakuchitika vyakukhozga nga ni ivi vikulongora waka kuti tili pakati pa mbumba yimoza yakukolerana ya pa charu chose. Palije ŵanthu mu charu ichi awo mbakukolerana nga umo ŵaliri ŵanthu ŵa Yehova!

 Ine na Kaye tikupembuzgika na fundo yakuti chiyelezgero chiwemi cha Davey chawovwira ŵanthu ŵanandi chomene. Uwu mbunenesko nadi chomenechomene ku ŵawukirano ŵithu awo ŵakujipeleka kuteŵetera Yehova. Panji kwamburaso ŵeneko kumanya, ivyo ŵakuchita vikukhwaska chomene ŵanji awo ŵakuwona mwamphu wawo, ndiposo chifukwa cha chiyelezgero chawo chiwemi, ŵanji nawo ŵangamba kukhuka na kwamba kuteŵetera Yehova kuyana na nkhongono zawo.

 Pa Luka 20:37, Yesu wakayowoya mazgu gha Yehova apo Chiuta wakajichema yekha kuti “Chiuta wa Abrahamu, Chiuta wa Yisake, na Chiuta wa Yakhobe.” Yehova wakayowoyapo yayi kuti wakaŵa Chiuta wawo panyengo iyo ŵakaŵa ŵamoyo kweni wakati wachali Chiuta wawo nangauli ŵali kufwa. Chifukwa wuli? Yesu wakutiphalira mu vesi 38 kuti: “Wose mbamoyo kwa iyo.”

 Enya, Yehova wakuwona kuti ŵateŵeti ŵake wose ŵakugomezgeka awo ŵali kufwa ŵachali ŵamoyo kwa iyo; ndipo ichi chikulongora waka kuti Chiuta ngwakukhumbisiska kuzakaŵawuska! (Yobu 14:15; Yohane 5:28, 29) Nkhugomezga kuti Yehova ndimo wakujipulikira na Davey, kweniso ŵateŵeti ŵake wose awo ŵali kufwa.

 Apo nkhulindilira kuzakamuwonaso Davey, khumbo lane likuru ndakuti nizakawone Kaye ŵaliso lumoza na Davey. Wakaŵa na chitima chikuru chomene. Mazgu gha pa Luka 7:15 ghakunipembuzga chomene, ghakuti: “Munthu wakufwa yura wakawuka na kwamba kuyowoya, ndipo Yesu wakamupeleka kwa anyina.”

 Mu September 2005, nane nkhamba kuchita upayiniya lumoza na Kaye. Ni mwaŵi ukuru chomene kuchita upayiniya lumoza na muwoli wane, ŵana ŵithu kweniso ŵanyawo ŵa mu nthengwa. Nga mbumba yimoza, tikovwirana yumoza na munyake ndiposo tili na chilindizga chiwemi cha munthazi, chakuzakakhala mu charu chiphya icho tizamuŵiraso lumoza na wakutemweka withu Davey.