Nkhondo iyi yikapangiska masuzgo ghanandi ku Spain ndipo yikalutilira pafupifupi vyaka vitatu, ŵanthu ŵanandi ŵakaŵavya pakukora kweniso ŵakahangayika. Adada nawo ŵakaŵa yumoza wawo. Nyengo zose ŵakagomezganga chomene Chiuta, kweni ŵakakhuŵara ŵati ŵawona kuti ŵasembe ŵa Tchalitchi la Katolika ndiwo ŵakunjizgikamo chomene mu nkhondo iyi. Ntheura ŵakasankha kuti ine na mukuru wane tileke kubatizika mu Tchalitchi la Katolika.

 Mu 1950, Ŵakaboni ŵa Yehova ŵaŵiri ŵakafika pa nyumba yithu. Adada ŵakaŵategherezga ndipo ŵakazomera kusambira Baibolo sabata yiliyose. Pa nyengo iyi nkhaŵa na vyaka 14, ndipo nkhatemwanga chomene bola. Adada ŵakanichiskanga kuti niŵerengengeko mabuku agho ŵakagharekanga Ŵakaboni ŵara, kweni nkhakhumbanga yayi. Zuŵa linyake muhanya nati nawelera kunyumba pamanyuma pakuti nafuma waka ku bola, nkhafumba amama kuti, “Amama, kasi ŵasambizgi ŵa Baibolo ŵangwizaso mwahuno?” Ŵakazgora kuti, “Enya, ŵali mu chipinda chakulyera icho na Adada ŵako.” Mwaluŵiro nkhawelera, na kuchimbilira ku msewu.

 Uwemi ngwakuti, adada ŵakazomerezga yayi kuti vinthu ivyo ine nkhachitanga chifukwa cha kutinkha kusambira Baibolo viŵawezgere nyuma. Nakuti ŵakatemwanga chomene unenesko uwo ŵakasambiranga, mwakuti mu 1953 ŵakabatizika na kuŵa yumoza wa Ŵakaboni ŵa Yehova. Apa ndipo nkhajulikira kumaso, na kwamba kuŵafumba mafumbo ghanandi. Nkhaŵapempha kuti nane niŵe na Baibolo lane. Ŵakapempha Máximo Murcia, Kaboni muwukirano, kuti wasambirenge nane Baibolo. Pamanyuma pa vyaka viŵiri, apo nkhaŵa na vyaka 19, nkhabatizika na kuŵa Kaboni wa Yehova, nkhabatizikira mu mlonga wa Jarama, cha kumanjiliro gha dazi kwa Madrid.

 Cha m’ma 1950, chikaŵa chakusuzga chomene kupharazga kweniso kuwungana pamoza. Muwusi wankhaza Francisco Franco wakawusanga ku Spain, ndipo wakakhumbanga kuti waliyose mu charu waŵe Mukatolika. Pa chifukwa ichi, ŵapolisi ŵakasuzganga chomene Ŵakaboni ŵa Yehova. Tikawungananga mu nyumba za ŵabali na kuwoneseska kuti ŵazengezgani ŵaleke kutikayikira na kukatiphara ku polisi. Kweniso tikapharazganga nyumba na nyumba kweni mwakuchenjera chomene, tikapharazganga nyumba ziŵiri panji zitatu mwakusinthana waka ndipo mwaluŵiro tikafumangapo na kuya ku chigaŵa chinyake. Ŵanthu ŵanandi ŵakazomeranga uthenga withu, nangauli ni wose yayi awo ŵakawutemwanga.

 Nkhukumbuka kuti pa nyumba yinyake nkhasangana na wasembe wa Chikatolika. Nati nayowoya icho nkhizira, wakanifumba kuti: “Kasi mazaza waghakuchitira ivi waghatora nkhu? Kasi ukumanya kuti ningakakuphara ku polisi?” Nkhalongosora kuti tili ŵakunozgeka kusangana na vinthu vya nga ni ivi. Nkhasazgirapo kuti, “Ŵalwani ŵa Yesu Khristu ndiwo ŵakapangiska kuti Yesu wakakike. Kasi chingaŵa chakuzizika nthena kuti awo ŵakumulondezga nawo ŵasuzgike mwakuyana waka? Wakakondwa navyo yayi ivyo nkhamuzgora, ndipo wasembe yura wakanjira munyumba kuti wakayimbire foni ŵapolisi. Apa naneso nkhafumapo waka pa malo agha mwaluŵiro chomene.

 Nangauli pakaŵa masuzgo ghanandi, kweni ŵapharazgi ŵachoko waka awo ŵakaŵa mu Spain ŵakawona kuti mu charu ichi vuna yacha kale. Mu February 1956, apo nkhaŵa nichali na vyaka 19, nkhimikika kuti nkhateŵetere nga mupayiniya wapadera. a Ŵapayiniya ŵanandi tikaŵa ŵawukirano kweniso tikaŵavya maluso ghanandi. Ntheura tikawonga chomene ŵamishonale awo ŵakatipokelera na mawoko ghose kweniso ŵakatisambizga na kutikhozga, ivi ndivyo tikakhumbikwiranga nadi! Pamoza na mupayiniya munyane muwukirano, nkhatumika kukateŵetera mu msumba wa Alicante, ndipo uku ntchito yithu yakupharazga yikaŵa kuti yindambe. Pakati pajumpha myezi yichoko waka, tikaŵa na masambiro ghanandi gha Baibolo kweniso tikagaŵira mabuku ghanandi chomene.

 Nga umo vikuŵiranga, mulimo withu ukumanyikwa luŵiro chomene ku ŵanthu. Tati takhala myezi yichoko waka ku Alicante, ŵapolisi ŵakatikaka na kutipoka ma Baibolo. Ŵakatijalira kwa mazuŵa 33, pamanyuma ŵakatitolera ku Madrid, ndipo uku ndiko ŵakatifumiskira. Nyengo yichoko waka iyo tikaŵira mu jele yikaŵa nga nkhucheta waka vinthu ivyo tisanganenge navyo munthazi.

 Apo nkhaŵa na vyaka 21, nkhaphalirika kuti ninjire usilikari. Nkheneranga kuluta ku malo agho kukukhala ŵasilikari ku Nador—msumba uwo pa nyengo iyo ukaŵa pasi pa Spain ndipo ukaŵa cha kumpoto kwa Morocco. Pamaso pa mulara wa ŵasilikari nkhayowoya mwantchindi ivyo nkhugomezga. Nkhati nigwirenge ntchito zausilikari yayi, nesi kuvwara yunifomu yawo. Ŵasilikari ŵakanitora na kukanipelekezga ku jele la Rostrogordo, ku Melilla, kulindilira kuti khoti la ŵasilikari lizakeruze mulandu wane.

 Pambere mulandu wane underuzgike, mulara wa ŵasilikari wa ku Spain, uyo wakaŵa ku Morocco, wakawona kuti ŵasilikari aŵa ŵakeneranga kunitimba kuti panji ningasintha maghanoghano. Pa chifukwa ichi nkhayuzgika uheni chomene, nkhathyapulika na vimapayipi kwa maminiti 20, ŵakanibafura m’paka nkhawa pasi thafya. Ŵakakhorwa yayi, mulara uyo wakalaŵiliranga ŵasilikari ŵanyake wakanidyaka kumutu na chijombo chake, wakanileka wati wawona kuti ndopa zamba kufuma. Pamanyuma nkhatolekera ku ofesi yake, ndipo wakakalipa chomene wakati: “Ungaghanaghananga kuti namarana nawe yayi. Uŵe wakunozgeka kuti ivi ndivyo uviwonenege zuŵa lililose, ndipo panji vingajumphaso apa!” Wakaphalira ŵalinda kuti ŵakanijalire mu jele lapasi. Mukati mu jele mukaŵa mtika kweniso chisi, ndipo nkhakhazganga kuti nisanganenge na masuzgo ghanandi ghakuŵa nga ni chisi chakuti biii.

 Nkhukumbuka kuti pa nyengo yira nkhagona pasi peneko mu selo yane, uku mutu wose ni ndopa pera khachikhachi. Nkhaŵavya kalikose kweni nkhaŵa waka na kabulangeti kachoko waka kakuti nidike kweniso mu selo mukaŵa mbeŵa izo zikendendekanga waka bwekabweka. Icho nkheneranga kuchita mbwe nkhulomba kwa Yehova kuti wanipe nkhongono ndiposo kuti nizizipizge. Mu selo ya mdima na yakuzizima yira nkhalombanga mwakuwerezga. b

 Zuŵa lakulondezgapo, nkhatimbikaso, kweni awo ŵakanitimbanga ŵakaŵa ŵalaraŵalara ŵanyake ŵa ŵasilikari. Kapitawo wawo wakalaŵiliranga waka nkhutchayika m’paka wakakhorwa kuti apa natimbika nadi! Nkhamba kughanaghanira usange nilutilirenge kuzizipizga masuzgo agha nyengo yitali. Mu usiku wachiŵiri uwo nkhaŵira mu jele, nkhalomba Yehova kuti wanovwire.

 Pa zuŵa lachitatu, nkhatolekeraso ku ofesi ya kapitawo. Nkhatenthema chomene kuti uku panji ŵamunitimbaso. Apo nkhanjiranga mu ofesi, nkhalomba kwa Yehova. Don Esteban, c uyo wakaŵa mulembi wa ŵasilikari wakanilindiliranga. Wakeneranga kusayina ivyo khoti la ŵasilikari ligamurenge.

 Kweni Don Esteban wati wawona kuti nakakika mabandeji mu mutu, wakanifumba icho chikachitika. Chifukwa cha wofi kuti ningatimbikaso nkhatondekanga kumuphalira kalikose, paumaliro mbwenu nkhamuphalira waka unenesko wose. Wati wapulika ivyo vikachitika, Don Esteban wakayowoya kuti: “Ine ningakuvikilira yayi kuti uleke kuluta ku khoti la ŵasilikari na kweruzgika. Sono chakuti umanye ntchakuti mulimose umo vingaŵira, paŵavyenge waliyose uyo wakutimbengeso.”

 Ntheura nyengo yose iyo nkhaŵira mu jele, pakaŵavya uyo wakanitimbaso. Nkhumanya makora yayi chifukwa icho, Don Esteban, wakayowoyera nane pa zuŵa lira. Kweni icho nkhumanya ntchakuti malurombo ghane ghakazgoreka mu nthowa iyo nkhakhazganga yayi. Nkhawona umo Yehova wakanithaskira mu ora la mdima ndipo wakazomerezga yayi kuti niyezgeke na kutondeka kuzizipizga. (1 Ŵakorinte 10:13) Apo nkhaŵa mu khoti la ŵasilikari, nkhaŵa na chigomezgo chose kuti Yehova wanovwirenge.

 Khoti la ŵasilikari likeruzga kuti nkhakhale mu jele vyaka 19, kweni pamanyuma ŵakasazgirako vyaka vitatu chifukwa cha kuleka “kupulikira.” Nati nakhala ku Morocco pafupifupi chaka na myezi yitatu, ŵakanitumizga ku jele la ŵanthu awo ŵapalamura milandu yakofya ku Ocaña, kufupi na Madrid, kuti ndiko nkhagwilire jele lane. Kutumizgika ku Ocaña likaŵa thumbiko lakufuma kwa Yehova. Kukaŵa nga nkhuparadiso para nkhayaniskanga na ku Rostrogordo. Mu jele mukaŵa bedi, matiresi, na vyakudika. Pakati pajumpha nyengo, nkhapika mulimo wakuti nilembenge vyakukhwaskana na ndalama za jele ili. Nyengo yitali iyo nkhaŵira mu jele yikapangiska kuti niŵengeso na phukwa chomene. Chiyezgo chikuru chomene ntchakuti nkhaŵavya mwaŵi wakuchezga na ŵabali ŵane ŵauzimu.

 Nyengo zinyake ŵapapi ŵane ŵakizanga kuzakaniwona, kweni nkhakhumbikwiranga kuti ŵanji nawo ŵanikhozgengeko. Ŵapapi ŵane ŵakaniphalira kuti ŵabali ŵanji nawo ŵali kukana kunjira usilikari chifukwa cha njuŵi yawo. Ntheura nkhalomba kwa Yehova, kumupempha kuti mphanyi vyanguŵa makora usange mubali yumoza ŵanga mutumizga ku jele ilo ine nkhaŵa. Apa napo Yehova wakazgora malurombo ghane kuluska umo nkhakhazgiranga. Na nyengo wuwo yayi, ŵabali ŵatatu ŵakukhora mwauzimu—Alberto Contijoch, Francisco Díaz, na Antonio Sánchez—ŵakaŵasamuskira ku Ocaña ndipo tikaŵira lumoza mu jele. Pamanyuma pa vyaka vinayi nili nekha, sono nkhaŵa na ŵabali ŵane ŵauzimu. Tose ŵanayi tikasambiranga Baibolo pamoza na kupharazgira ŵanyithu awo tikaŵira lumoza mu jele.

 Paumaliro mu 1964, nkhafwatulika mwaluŵiro chifukwa cha nkharo yane yiwemi. Vyaka 22 ivyo nkhaphalirika kuti nikhalirenge mu jele vikakhira kufika pa vyaka 6 na hafu. Zuŵa lenelira nkhafumira mu jele, nkhakondwa na maungano ghakwamba agho nkhachita. Nangauli nkheneranga kugwiliskira ntchito kandalama ako nkhasunga kuti nikwelere galimoto kuwelera ku Madrid, kweni ku maungano nkhakafika pa nyengo yake. Ili likaŵa thumbiko lamaseŵera yayi kuŵiraso lumoza na ŵabali! Kweni khumbo lane likaŵa waka lakuti nkhawunganeso na ŵabali yayi. Nkhakhumbanga kulutizga upayiniya nyengo yeneyiyo. Nangauli ŵapolisi ŵakachitanga nkhaza, kweni ŵanthu ŵakategherezganga makani ghawemi, ndipo mulimo wakuti uchitike ukaŵa unandi chomene.

 Pa nyengo iyi, nkhasangana na Mercedes, mudumbu muwukirano wamwamphu uyo wakaŵa mupayiniya wapadera. Mercedes wakaŵa mudumbu wakujiyuyura uyo wakaŵa na mwamphu kupharazgira waliyose uyo wasangana nayo. Wakaŵaso walusungu kweniso wakupa, mikhaliro iyo nkhatoreka nayo chomene mtima. Tikaŵa pa chibwezi, ndipo pati pajumpha chaka chimoza tikatorana. Kuŵa lumoza na Mercedes likaŵa thumbiko likuru chomene kwa ine.

 Pamanyuma pa myezi yichoko waka tati tatorana, tikapempheka kuti tikachite uteŵeti wakwendakwenda. Sabata yiliyose tikenderanga mipingo yakupambanapambana, tikaŵirangaso lumoza na ŵabali pa maungano kweniso kupharazga nawo. Mipingo yikasazgikiranga mwaluŵiro chomene mu Spain mose, ndipo ŵabali ŵakhumbikwiranga wovwiri na kukhozgeka. Nyengo yinyake, nkhaŵa na mwaŵi wakovwira ŵabali pa ofesi ya Ŵakaboni ŵa Yehova iyo yikaŵa yakubisilizga ku Barcelona.

 Sono mulimo withu uwo tikachitanga mwachibisibisi ukamara mu 1967, apo boma likaŵika dango lakuti visopa vyose mu Spain vili na wanangwa wakusopa pakweru. Paumaliro mu 1970, Ŵakaboni ŵa Yehova ŵakazomerezgeka na dango la boma lakuti ŵangamba kusopa mwawanangwa. Pa nyengo iyi ndipo tikamba kuwungana mwawanangwa, kuŵa na Nyumba za Ufumu, kweniso tikajulira ofesi ya munthavi.

 Mu 1971, ine na Mercedes tikachemeka kuti tikateŵeterenge pa ofesi yiphya ya munthavi ku Barcelona. Kweni chaka chakulondezgapo, Mercedes wakaŵa na nthumbo ndipo wakababa mwana msungwana, wakutowa chomene zina lake Abigail. Apa tikaleka dankha kuteŵetera pa Beteli na kwamba uteŵeti unyake wakulera mwana withu.

 Abigail wati wakwaniska vyaka vya m’ma 18, ofesi ya munthavi yikatipempha usange tingaweleraso pa uteŵeti wakwendakwenda. Mwakawiro, tikalomba kwa Chiuta vya nkhani iyi kweniso tikafumba ŵabali ŵakukhwima mwauzimu. Mubali munyake mulara wakati: “Jesús, usange ŵakukukhumba kuti wambeso mulimo wakwendakwenda, ukwenera kuzomera.” Ntheura tikambaso uteŵeti unyake uphya uwu. Pakwamba, tikenderanga mipingo yapafupi na nyumba yithu mwakuti tilutilire kupwelelera mwana withu Abigail. Kweni apo wakakuranga na kuŵa mulara mwakuti wangajichitira yekha vinthu, mbwenu kwa ise ukaŵa mwaŵi wakuti tichite vinandi pa uteŵeti wa nyengo zose.

 Ine na Mercedes tateŵetera vyaka 23 pa uteŵeti wakwendakwenda. Nkhakondwa chomene kupika mwaŵi uwu, uwo ukanovwira kuti nikhozge ŵawukirano na vinthu ivyo ine nkhasangana navyo pa umoyo. Nyengo yinyake iyo nkhateŵeterapo nga msambizgi wa ŵabali ŵalara na awo ŵakuchita uteŵeti wanyengozose, tikakhalanga ku Beteli ya Madrid. Chakukondweska chomene ntchakuti, mlonga wa Jarama, uwo uli pa mtunda wa makilomita pafupifupi ghatatu kufuma pa Beteli, ndiwo ine nkhabatizikiramo kumanyuma uku mu 1955. Nkhaghanaghanangako yayi nga umo vinthu vikaŵira kumanyuma kuti nyengo yinyake nizamwizaso ku chigaŵa ichi na kovwira ŵawukirano ŵanalume na ŵanakazi kuti nawo ŵanozgekerenge milimo yakusazgikira mu gulu la Yehova.

 Kufuma mu 2013, tikambaso kuchita upayiniya wapadera. Kuyowoya unenesko chikaŵa chakusuzga kuleka uteŵeti wakwendakwenda na kwamba upayiniya, kweni pamasinda nkhawamo kuti kusintha uku kukaŵa na vyandulo viwemi. Sonosono apa, nasangana na masuzgo gha muthupi, kusazgapo opareshoni yikuru ya mtima. Pa nyengo za nga ni izi, nagomezganga chomene Yehova kuti wanovwirenge, nga umo wakanovwilirapo kale kumanyuma ndipo apa napo wanisidenge nekha yayi. Ndiposo kwa vyaka 56, nawovwirika mwapadera chomene na muwoli wane Mercedes, ndipo waŵa nadi movwiri wane wakwenelera pa mauteŵeti ghose agho nachita mu gulu la Yehova.

 Kanandi nkhughanaghanira umo nkhakondweranga apo nkhaŵanga msambizgi. Mu maghanoghano nkhuwonanga ŵawukirano ŵali mu kilasi, ŵa visko vya chimwemwe. Para nkhuwona mwamphu wawo nkhukumbuka umo nane nkhaŵira wamwamphu apo nkhambanga waka uteŵeti wanyengozose. Mbunenesko kuti nkheneranga kuzizipizga mu nyengo za mdima kweni uwemi ngwakuti nasangaso vinthu vinandi vyakukondweska. Kweniso mu nyengo zakusuzga nasambirapo sambiro lakuzirwa chomene lakuti nkhwenera chara kugomezga nkhongono zane pera. Masuzgo ghanipa mwaŵi wakuti niwone woko lankhongono la Yehova, woko ilo lanikhozganga nyengo zose nanga mpha ora la mdima.—Ŵafilipi 4:13.