MILTIADIS STAVROU | NKHANI YAKULONGOSORA UMOYO WA MUNTHU
“Tajiwonera Tekha Umo Yehova Wakatilongozgera Kweniso Kutipwelelera”
Apo nkhaŵa na vyaka 13, nga umo vikuŵira na ŵana wose, nkhatemwanga kuwonelera galimoto para zikujumpha mumphepete mwa msewu wakwithu ku Tripoli, Lebanon. Nkhakopeka na galimoto yinyake yiswesi ya ku America kweni mweneko wakaŵa wa ku Syria. Nkhazizwa chomene apo wasembe wa Tchalitchi la Orthodox wakatiphalira kuti galimoto iyi tiyiswe na malibwe chifukwa mweneko ni Kaboni wa Yehova!
Tikamuphalira wasembe yura kuti mbwenu tipwetekenge dilayivala. Kweni wakazgora kuti: “Mumukome waka. Mungatora munjilira wane kuti ndiwo mufyulire ndopa zake mu mawoko ghinu!” Nangauli nkhanothanga na Tchalitchi cha Greek Orthodox, kweni mazgu ghaukali agho wasembe wakayowoya ghakapangiska kuti nifume tchalitchi ili. Para nkhukumbuka nkhani iyi, vikunovwira kumanya kuti ivyo vikachitika pa nyengo iyi ndivyo vikanovwira kuti nimanye unenesko wakukhwaskana na Yehova.
Kusanga Unenesko Wakukhwaskana na Yehova
Apo nkhakuranga, mu msumba ukuru wa Tripoli mukaŵa ŵanthu ŵanandi chomene awo ŵakapambananga mitheto, viyowoyero kweniso visopa. Mbumba yiliyose yikanothanga na uko yili kufuma, ndimo vikaŵiraso na mbumba yakwithu. Ine na mukuru wane tikanjira gulu ilo likamanyikwanga kuti Soldiers of the Faith, a (Ŵasilikari ŵa Chipulikano) ndipo likalimbananga chomene na Ŵakaboni ŵa Yehova. Tikaŵa kuti tindasanganepo na Kaboni waliyose, kweni wasembe withu wakatenge Ŵakaboni nkhagulu ka vigeŵenga ako kakulimbana na Tchalitchi cha Greek Orthodox ndipo mulongozgi wawo mulara ni Yehova. Kanandi waka wasembe withu wakatiphaliranga kuti kulikose uko tasanga Kaboni wa Yehova tikwenera kumuwukira, kumuleka waka yayi.
Nangauli nkhamanyanga makora yayi, kweni ŵakuru ŵane ŵatatu ŵakaŵa kuti ŵakumanapo na Ŵakaboni ŵa Yehova. M’malo mwakuti ŵaŵayuzge na kwambiska viwawa, ŵakuru ŵane aŵa ŵakazomera kusambira Baibolo kuti ŵawone usange mbanthu ŵaheni. Mise yinyake, nati nafika pa nyumba nkhasanga kuti pa balaza pali Ŵakaboni ndipo ŵakadumbirananga nkhani za mu Baibolo na mbumba yakwithu na ŵazengezgani ŵithu ŵanyake. Nkhakhuŵara chomene! Mu mtima nkhati, ‘Chifukwa wuli ŵakuru ŵane ŵakwendera mphiska chisopa chithu cha Orthodox?’ Nkhakhumbanga kufumapo waka, kweni mzengezgani withu uyo wakaŵa dokotala wa mino wakumanyikwa chomene kweniso wakaŵa Kaboni wa Yehova ndiyo wakaniphalira kuti nikhale dankha pasi na kutegherezga. Munyane wakaŵerenga mwakukwezga lemba la Salimo 83:18 mu Baibolo lane. Nyengo yeneyiyo, nkhamanya kuti wasembe withu yura wakatipusikanga waka. Yehova ni mulongozgi wa vigeŵenga yayi, kweni ni Chiuta waunenesko yekha!
Pamanyuma pakuti nabatizika
Nkhakhumbanga kumanya vinandi vyakukhwaskana na Yehova, ntheura nkhamba kusambira Baibolo pa nyumba pithu na Mubali Michel Aboud. Zuŵa linyake, munthu uyo wakaŵapo pa sambiro wakafumba fumbo ilo nkhaghanaghanirangako yayi kufuma waka apo nkhaŵa muchoko. Wakafumba kuti, “Tiphalirani, ni njani wakalenga Chiuta?” Mubali Aboud wakatovwira, wakatilongora chona uyo wakagona pa mpando. Wakalongosora kuti chona wakupulika yayi ivyo ŵanthu ŵakuyowoya kweniso umo ŵakughanaghanira. Mwakuyana waka, tingapulikiska vyose yayi vyakukhwaskana na Chiuta. Chiyelezgero ichi chikanovwira kupulikiska chifukwa icho nkhutondekera kupulikiska vinthu vinyake vyakukhwaskana na Yehova. Pakajumpha nyengo yichoko waka, mu 1946 nkhajipatulira kwa Yehova Chiuta na kubatizika. Apa nkhaŵa na vyaka 15.
Upayiniya Ukanijulira Nthowa
Mu 1948, nkhagwiranga ntchito ya kujambura vithuzi lumoza na mukuru wane Hanna. Apo tikagwiliranga ntchito pakaŵa pafupi na sitoro ya kuguliskiramo penti ya mubali Najib Salem. b Najib wakaŵa mupharazgi wambura wofi ndipo wakalutilira kupharazga m’paka apo wakafwira na vyaka 100. Usange nenda nayo kukapharazga mu mizi, nkhawonanga kuti wakaŵa wachikanga nangauli tikasangananga na ŵakususka. Kweniso wakambiskanga chidumbirano cha uthenga wa mu Baibolo na munthu waliyose vilije kanthu kuti ngwa chisopa wuli. Chiyelezgero chake chiwemi chili kunovwira chomene.
Najib Salem (mzere wa kumasinda, kumalyero) ndiyo wakanichiska chomene
Zuŵa linyake apo tikaŵa ku ntchito, kukiza Mary Shaayah, mudumbu wa ku Lebanon kweni wakafuma ku United States. Nangauli wakaŵa mama wakutangwanika, kweni wakaŵaso mupayiniya wamwamphu. Kwiza kwa mudumbu uyu kukanovwira chomene kusintha umoyo wane. Mary wakamaliranga maora ghaŵiri panji kujumpha apa, kutiphalira ivyo wakakumanapo navyo mu uteŵeti. Pambere wandawere, Mary wakanilaŵiska na kuyowoya kuti: “Milto, iwe uchali undatore, chifukwa wuli ukuchita upayiniya yayi?” Nkhajikhungulufya na kuzgora kuti ningachita yayi upayiniya chifukwa nkhukhumba kugwira ntchito yakuti nisangenge ndalama zakukwana pa umoyo wane. Wakanifumbaso kuti: “Kasi nakhala nyengo yitali wuli pano kufuma waka mulenji uwu?” Nkhazgora kuti: “Pafupifupi maora ghaŵiri.” Mary wakati: “Nindakuwone kuti wanguŵa na ntchito yinandi pa nyengo iyi. Usange ungapharazga kufiska maora ghanthena agha zuŵa lililose, mbwe ungaŵa mupayiniya. Uyezge waka kwa chaka chimoza pamanyuma uzamuwona wekha usange ungalutizga panji yayi.”
Nangauli kuyana na mitheto yithu ntchakusuzga kuti mwanalume wapulikire ulongozgi wakufuma ku ŵanakazi, kweni ivyo wakayowoya vikaŵa vyakupulikikwa kwa ine. Pamanyuma pa myezi yiŵiri, mu January 1952, nkhamba kuchita upayiniya. Pakati pajumpha chaka na myezi 6, nkhapokera kalata kuti nkhanjire Sukulu ya Giliyadi kilasi nambara 22.
Ŵa mu mbumba yane na ŵabwezi tikulayirana apo nkhunyamuka kuya ku sukulu ya Giliyadi mu 1953
Nati namara masambiro agha, nkhatumika ku Middle East. Pambere chaka chindamare nkhatorana na Doris Wood, wakaŵa mu mishonale uyo wakafuma ku England, kweni wakateŵeteranga kwenekuku ku Middle East.
Kupharazga Unenesko wa mu Baibolo ku Syria
Pamanyuma pakuti tatorana, ine na Doris ŵakatituma ku Aleppo, Syria. Pakuti ku malo agha ntchito yakupharazga yikaŵa yakukanizgika, mbwenu tikachitanga kuphalirika vya ŵanthu awo ŵangatemwa kusambira Baibolo.
Zuŵa linyake tikasangana na mwanakazi uyo wakanweka chomene na uthenga wa mu Baibolo. Wakaŵa na wofi apo wakajuranga chijaro na kutiphalira kuti: “Muchenjere chomene! Ŵapolisi ŵanguŵa pano, sonosono apa nthe. Ŵakhumbanga kumanya uko mukukhala.” Apa ntchakuwonekerathu kuti ŵapolisi ŵakamanyanga uko tikachitiskanga masambiro ghithu gha Baibolo. Tikaŵaphalira ŵabali awo ŵakalaŵiliranga ntchito ya kupharazga ku Middle East, ndipo ŵakatiphalira kuti tikwenera kufumamo mu charu ichi mwaluŵiro chomene. Nangauli chitima chikatikora kuti tilekenge masambiro ghithu gha Baibolo, kweni tikawona kuti Yehova wakutitemwa ndipo wakukhumba tiŵe ŵakuvikilirika.
Tikajiwonera Tekha Kuti Yehova Wakutilongozga ku Iraq
Mu 1955, tikatumikaso ku Baghdad Iraq. Nangauli tikapharazganga mwakubisirizga kwa waliyose ku Iraq, kweni chilato chithu chomene chikaŵa tikapenjanga awo ŵakamanyangako vya Chikhristu.
Nili na ŵamishonale ŵanyane ku Iraq
Tikayezgangaso kuyowoya nawo mwaubwezi Ŵasilamu na kuŵaphalira nkhani izo ŵangakondwa nazo, kwali nkhu msika panji mu nthowa. Kanandi Doris wakatemwanga kuyowoya vinthu ivyo ŵanthu ŵangatemwa kutegherezga. Mwachiyelezgero, wakayowoyanga kuti: “Adada ŵakatemwanga kuyowoya kuti tose tizamuzgora kwa Chiuta pa vyakuchita vithu.” (Ŵaroma 14:12) Wakalutizganga kuti: “Fundo iyi ndiyo yikunovwira nyengo zose pa umoyo wane. Kasi imwe mukuti wuli pa nkhani iyi?”
Tikakondwa chomene kuteŵetera ku Baghdad pafupifupi vyaka vitatu, kovwira ŵabali kuti mulimo wa kupharazga ulutilire kuchitika kweni mwachibisibisi. Maungano tikachitiranga mu nyumba ya ŵamishonale mu chiyowoyero cha Chiarabu. Tikakondwanga chomene kupokelera ŵanthu kufuma ku Assyria, ŵa mitundu yakupambanapambana awo ŵakuchemeka kuti Ŵakhristu. Para ŵawona umo tikutemwerana kweniso kukolerana uko tikalongoranga pa maungano ghithu, mbwenu ŵakamanyanga kuti ndise ŵalondezgi nadi ŵa Khristu.—Yohane 13:35.
Tikachitiranga maungano mu nyumba ya ŵamishonale ku Baghdad
Munyake uyo wakazomera luŵiro uthenga withu wa mtende wakaŵa Nicolas Aziz, wakaŵa munthu wakujiyuyura uyo ŵapapi ŵake ŵakaŵa ŵa ku Armenia kweniso ku Assyria. Nicolas na muwoli wake Helen, mwaluŵiro ŵakazomera ivyo Baibolo likusambizga vyakukhwaskana na Yehova na Mwana wake, Yesu, ndipo ŵakamanya fundo yakuti ŵaŵiri aŵa mbakupambana. (1 Ŵakorinte 8:5, 6) Nichali kukumbuka zuŵa ilo Nicolas na ŵanthu ŵanyake 20 ŵakabatizikira mu Mlonga wa Yufurate.
Tikajiwonera Tekha Kuti Woko la Yehova Likaŵa Nase ku Iran
1958, ku Iran
Nyengo yinyake kukawuka viwawa ku Iraq, ivyo vikapangiska kuti Themba Faisal likomeke pa July 14, 1958, ndipo ivi vikapangiska kuti tifumeko na kuluta ku Iran. Tikalutilira kupharazga mwakuchenjera chomene ku ŵanthu ŵachilendo awo tikaŵasanganga kwa myezi pafupifupi 6.
Pambere tindafumeko ku Tehran, msumba ukuru wa Iran, ŵapolisi ŵakanitora kuti ŵakanifumbe mafumbo. Apa nkhamanya kuti ŵapolisi ŵakatilondalondanga. Nati nafumbika mafumbo, nkhamulembera kalata Doris na kumuphalira kuti ŵapolisi ŵakatiwonanga ivyo tikuchita. Na chilato chakuti tiŵe ŵakuvikilirika, tikazomerezgana kuti nileke kuwelera ku nyumba ndipo waliyose wakhale dankha kwayekha m’paka tiwukemo mu charu ichi.
Doris wakasanga malo ghakuvikilirika ghakukhala m’paka apo tikasanganirana pa chiŵanja cha ndege. Kweni kasi wachitenge wuli kuti wafumeko ku malo agha kwambura ŵapolisi kumanya? Doris wakaphalira Yehova nkhani iyi mu lurombo.
Mwamabuchi kukamba kulokwa chivula chikuru, icho chikapangiska kuti waliyose wachimbire na kubisama dankha, kusazgapo na ŵapolisi wuwo. Mu misewu mukaŵavya ŵanthu, ndipo Doris wakafumako ku malo ghara kwambura suzgo. Doris wakati, “Chivula chira chikaŵa munthondwe nadi!”
Tati tafumako ku Iran, tikatumika ku dera linyake, uko tikapharazganga ku ŵanthu ŵakufuma mu mafuko ghakupambanapambana na visopa vyakupambanaso. Mu 1961, tikachitanga uteŵeti wakwendera dera, mu vigaŵa vyakupambanapambana ku Middle East.
Mzimu wa Yehova Ukatovwira pa Mulimo Withu
Pali vinandi ivyo nkhajiwonera nekha umo mzimu utuŵa wa Chiuta ukatovwilira pa uteŵeti withu ku Middle East. Nichali kukumbuka umo tikasambiliranga Baibolo maso na maso na ŵanthu ŵaŵiri ŵakufuma ku Palestina, Eddy na Nicolas. Wose ŵakatemwanga chomene kusangikapo pa maungano ghithu, kweni ŵakaleka luŵiro kusambira Baibolo chifukwa ŵakatemweseskanga chomene ndyali. Nkhalomba kuti Yehova wajure mitima yawo. Ŵati ŵamanya kuti Chiuta wazamumazga masuzgo, gha Ŵapalestina pera yayi kweni gha ŵanthu wose, mbwenu ŵakambaso kusambira. (Yesaya 2:4) Ŵakaleka kughanaghana kuti mtundu wawo ngwapachanya chomene kuluska yinyake, ndipo paumaliro ŵakabatizika. Pamanyuma Nicolas wakaŵa mulaŵiliri wakwendakwenda wamwamphu chomene.
Apo tikendanga kufuma charu chinyake kuluta chinyake, ine na Doris tikachonthekanga chomene chifukwa cha kugomezgeka kwa ŵabali ŵithu, vilije kanthu kuti kwali vili wuli pa umoyo wawo. Pakuti nawo ŵakajumphanga mu vinandi, chilato chane chikaŵa chakuŵapembuzga ŵabali na ŵadumbu para namuchezgera nga mulaŵiliri wa dera. (Ŵaroma 1:11, 12) Kuti nifiske chilato ichi, nyengo zose nkhajikumbuskanga kuti nili wapachanya yayi kuluska ŵabali na ŵadumbu. (1 Ŵakorinte 9:22) Nkhakondwanga chomene kukhozga Ŵakhristu ŵanyane awo ŵakukhumbikwira wovwiri.
Ntchakukondweska chomene kuwona ŵanthu ŵanandi awo ŵanyake tasambiranga nawo Baibolo, sono mbateŵeti ŵakugomezgeka ŵa Yehova. Ŵachoko waka ndiwo ŵali kusamira mu vyaru vinyake pamoza na mbumba zawo kuchimbira viwawa ivyo vikaŵa mu charu chawo. Kweni ŵanthu aŵa likaŵa thumbiko likuru chomene ku awo ŵakateŵeteranga mu vigaŵa ivyo ŵakuyowoya Chiarabu ku Australia, Canada, Europe, na United States. Mu vyaka vyasonosono apa, ŵana ŵawo awo pasono mbalaraŵalara ŵali kuwelera ku Middle East kuti ŵakateŵetere ku vigaŵa vyakusoŵa na kukhozga ŵabali na ŵadumbu. Ine na Doris tili ŵakukondwa chomene chifukwa tili na ŵabali na ŵadumbu ŵanandi awo ŵali nga mbana ŵithu na ŵazukuru vithu!
Kudemelera kwa Yehova Muyirayira
Pa umoyo withu wose, tawona kuti Yehova wakutipwelelera na kutilongozga mu nthowa zakupambanapambana. Nkhukondwa chomene kuti wanovwira kuwuskamo thinkho kweniso kunotha uko nkhaŵa nako chifukwa cha mtundu wane apo nkhaŵa muwukirano. Masambiro agho napokera kufuma ku ŵabali ŵachikanga kweniso ŵambura thinkho ndigho ghanovwira kuti nipharazge makora unenesko wa mu Baibolo ku ŵanthu ŵakupambanapambana. Para tikufuma mu charu chinyake kuluta chinyake, ine na Doris tasangananga na masuzgo ghanandi ndipo nyengo zinyake tikamanyanga yayi kuti machero kuwengechi. Kweni ivi vikatisambizga kuti tigomezgenge chomene Yehova Chiuta m’malo mwa ise taŵene.—Salimo 16:8.
Para nkhughanaghanira vyaka vinandi kumanyuma ivyo nateŵetera Yehova, mbwenu nkhukumbuka kuti Adada ŵithu ŵakuchanya ndiwo ŵakwenera kupokera malumbo. Nkhukolerana na muwoli wane Doris, kanandi wakatemwanga kuyowoya kuti palije icho chingatitondeska kuteŵetera Yehova na mtima wose, palijirethu, nanga ni nyifwa! Nyengo zose tikuwonga chomene kuti Yehova wakatizomerezga kupharazga makani ghamtende ku Middle East. (Salimo 46:8, 9) Tikulaŵiska munthazi na chigomezgo chose pakumanya kuti Yehova walutilirenge kutilongozga na kupwelelera waliyose uyo wakudemelera kwa iyo.—Yesaya 26:3.
a Kuti mumanye vinandi vyakukhwaskana na gulu ili, wonani Buku Lapachaka la Ŵakaboni ŵa Yehova la 1980, peji 186-188.
b Nkhani yakulongosora umoyo wa Najib Salem yili mu Gongwe la Mulinda la Chicheŵa la September 1, 2001, peji 22-26.