Apo nkhondo yikulutilira ku Ukraine, ŵalongozgi ŵanandi ŵa matchalitchi gha Chikhristu ŵakukhozgera chomene nkhondo iyi. Wonani umo ŵaliska aŵa ŵakukhozgera nkhondo iyi ku vigaŵa vyose viŵiri:

•   “Ntchindi zilute ku ŵasilikari ŵithu wose awo ŵakuŵikapo mtima kuvikilira charu chithu cha Ukraine kwa mulwani . . . Manyani kuti muli mwekha yayi, nyengo zose tikumulomberani ndipo tilutilirenge kumovwirani.”—Bishopu Mulara Epiphanius I wa ku Kyiv, nga umo yikawoyera nyuzipepara ya The Jerusalem Post, pa March 16, 2022.

•   “Mulara wa Tchalitchi la Orthodox ku Russia wakachitiska ungano wa ŵasilikari ŵa ku Russia pa Sabata, ndipo pa ungano uwu wakaŵachiska ŵasilikari aŵa kuti ŵaŵikepo mtima kuvikilira charu chawo ‘chifukwa ŵanthu ŵa ku Russia pera ndiwo ŵangachita ivi’ apo ŵasilikari aŵa ŵakulutilira kurwa nkhondo ku Ukraine.”—Reuters, April 3, 2022.

 Kasi Ŵakhristu ŵakwenera kunjilirapo pa nkhondo? Kasi Baibolo likutipo wuli?

 Baibolo likulongora kuti awo ŵakulondezga nadi Yesu Khristu ŵakunjilirapo yayi pa nkhondo.

•   “Wezgera lupanga lwako mu malo ghake, pakuti wose awo ŵakukora lupanga ŵafwenge na lupanga.”—Mateyu 26:52.

   Kasi munthu uyo wakukhozgera nkhondo panji wakurwako ndikuti wakupulikira nthena mazgu gha Yesu?

•   “Nkhumupani dango liphya, lakuti mutemwanenge, nga umo ine namutemwerani, ndimo namwe mutemweranenge. Usange mukutemwana, wose ŵamanyenge kuti ndimwe ŵasambiri ŵane.”—Yohane 13:34, 35.

   Kasi munthu uyo wakukhozgera nkhondo ndikuti wakulongora chitemwa icho Yesu wakati chizamuŵa chimanyikwiro cha ŵasambiri ŵake, panji kuti ŵalondezgi ŵake?

 Kuti mumanye vinandi, ŵazgani nkhani yakuti “Kodi Akhristu Ayenera Kumenya Nawo Nkhondo?”

 Kasi vingachitika kuti Ŵakhristu ŵaleke kunjilirapo pa nkhondo mazuŵa ghano? Enya. Baibolo likayowoyerathu kuti mu nyengo yithu yino, iyo yikuchemeka kuti “mazuŵa ghaumaliro,” kuzamuŵa ŵanthu ŵakufuma mu mitundu yose awo “ŵazamusambiraso nkhondo chara,” kuyana na ivyo Yesu wakasambizga.—Yesaya 2:2, 4.

•   Ŵazgani nkhani za mu Gongwe la Mulinda za mutu wakuti “Kasi Chiuta Wakuti Wuli pa Nkhani ya Nkhondo?” kuti mumanye vinandi.

 Sonosono apa Yehova a, uyo ni “Chiuta wa mtende,” wazamugwiliskira ntchito boma lake la kuchanya kuti wathaske ŵanthu “ku kuyuzga na nkhaza.”—Ŵafilipi 4:9; Salimo 72:14.

•   Kuti mumanye umo wazamuchitira, wonelerani vidiyo yakuti, Kasi Ufumu wa Chiuta Ni Vichi?