MUŴENGE MASO!

2022: Chaka Chakuzura na Masuzgo—Kasi Baibolo Likutipo Wuli?

JULANI

Mu chaka cha 2022, takhaliranga waka kupulika nkhani zakukhwaskana na nkhondo, masuzgo gha vya chuma, na masoka gha chilengiwa. Baibolo lekha ndilo likutiphalira unenesko pa nkhani ya icho chikupangiska vyose ivi.

Ng’anamuro lenecho la vinthu ivyo vyachitika mu 2022

Vinthu ivyo vyachitika chaka chamara ichi, vikulongoraso waka ukaboni wakuti tili nadi mu nyengo iyo Baibolo likuti ni “mazuŵa ghaumaliro.” (2 Timote 3:1) Nyengo iyi yikamba mu chaka cha 1914. Wonani umo vyakuchitika ivi vikulongolera kuti vikukolerana na ivyo Baibolo likayowoyerathu vyakukhwaskana na nyengo yithu yino:

“Nkhondo.”—Mateyu 24:6.

“Chaka cha 2022 Changuŵa Chaka Chachitima Chifukwa cha Nkhondo ya ku Europe.” a

Wonani nkhani ya mutu wakuti “Boma la Russia Lawukira Charu cha Ukraine.”

“Njara.”—Mateyu 24:7.

“Njara ya mu 2022 Njambura Kuyigwentha.” b

Wonani nkhani ya mutu wakuti “Nkhondo Iyo Yikuchitika ku Ukraine Yapangiska Kuti Suzgo la Kusoŵa kwa Chakurya Liye Munthazi pa Charu Chose.”

“Nthenda Zakwambukira.”—Luka 21:11

“Kwambiraso kwa nthenda ya poliyo, kuya munthazi kwa chikhoso chakufuma kweniso COVID-19, vyapangiska kuti ŵanthu ŵaŵe pangozi ya kulwara nthenda zinandi zakwambukira.” c

Wonani nkhani yakuti “Ŵanthu 6 Miliyoni Ŵafwa na Muliri wa COVID-19.”

‘Vinthu vyakofya.’—Luka 21:11

“Kotcha chomene kwa charu, vilangalanga, moto wakwamba wekha, na kututuka kwa maji. Nakuti chaka cha 2022 tichiluwenge yayi chifukwa cha masoka ghanandi agho ghakamba chifukwa cha kusintha kwa nyengo ndipo ghakasakaza vinthu vinandi chomene, kukoma ŵanthu ŵanandi kweniso kupangiska kuti ŵanthu ŵanandi ŵasoŵe pakukhala pa charu chose.” d

Wonani nkhani yakuti “Vyaru Vinandi Vyasangana na Suzgo Lakotcha Chomene.”

“Mautimbanizgi [panji kuti, “vivulupi; vitimbaheti,” mazgu ghamusi].”—Luka 21:9

“Chifukwa cha kusazgikira kwa suzgo la vya chuma, chomene pa nkhani ya kukwera mtengo kwa vinthu, vyapangiska kuti ŵanthu ŵachite chomene viwoneskero mu chaka cha 2022.” e

Wonani nkhani yakuti “Kukwera Mtengo kwa Vinthu pa Charu Chose na Kuchepa Nkhongono kwa Ndalama.”

Kasi chaka chikwiza chizenge na vichi?

Palije uyo wangamanyirathu ivyo vichitikenge mu chaka cha 2023. Icho tikumanya ntchakuti sonosono apa, Ufumu wa Chiuta, panji kuti boma lakuchanya linjilirengepo kuti limarane na masuzgo agho ghahangayiska ŵanthu pa charu chapasi. (Daniyeli 2:44) Boma ili lizamuwuskapo masuzgo ghose gha ŵanthu na kuwoneseska kuti khumbo la Chiuta lafiskika pa charu chapasi.—Mateyu 6:9, 10.

Tikumuchiskani kuti mulondezgenge ulongozgi wa Yesu Khristu wakuti “muŵenge maso” kuti mumanye umo vyakuchitika vya mu charu ichi vikufiskira uchimi wa mu Baibolo. (Mariko 13:37) Para mungatemwa kusambira umo Baibolo lingamovwilirani pasono nthena kweniso kumupani chigomezgo chanadi chamunthazi, mungafumba Kaboni wa Yehova waliyose.

a AP News, “2022 Was Year the Horror of War Returned to Europe,” by Jill Lawless, December 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.

d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.

e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.